২ বংশধর 31 - Chakma Bible1 পরবর্ বেক্কানি থুম্ অনার্ পরেন্দি সিয়েনত্ আঝিল্ ওইয়্যে ইস্রায়েলীয়গুনে নিগিলিনে যিহূদার শঅরানিত্ যেইনে পূজোর্ পাত্তরুন্, আশেরা-খুদোগুন, পূজোর্ অজল্ জাগায়ান আর ডালিপূজোগুন্ এক্কুবারে ভস্ত গুরি দিলাক্। তারা যিহূদা, বিন্যামীন, ইফ্রয়িম আর মনঃশি-গুট্টির পুরো চাগালাত্ একই কাম্ গুরিলাক্। ইয়েনি বেক্কানি ভস্ত গরানার পর্ ইস্রায়েলীয়গুনে আদামত্ আর শঅরত্ নিজোর্ নিজোর্ জাগাত্ ফিরি গেলাক্। উবোসনাত্তে দান 2 পূজ্যে-উৎসর্ব আর উদোলোলি-উৎসর্বর পরব্পান গুরিবাত্তে, সেবা-কামত্তে আর গোজেনর ঘরত্ পাত্তুরু তুরু আর নাঙ্ গিনেদে-গীদ গুরিবাত্তে হিষ্কিয় ধর্মগুরু আর লেবীয়গুনোর্ পত্তিজনর্ কাম্ মজিম তারারে নানান্ বাবোত্যে দলরে নেযেল। 3 লগেপ্রভুর্ রীদি-সুদোমত্ যেধোক্ক্যেন লেগা আঘে সেধোক্ক্যেন বেন্যে আর বেল্যে পূজ্যে উৎসর্বত্তে আর জিরেবার্ দিনোত্, আঙোস্যেত্ আর ঠিগ্ গোজ্যে পরবর্ অক্তত্ পূজ্যে-উৎসর্বত্তে রাজা তার্ নিজোর্ সোম্বোত্তিত্তুন্ দান গুরিলো। 4 ধর্মগুরু আর লেবীয়গুনে যেনে লগেপ্রভুর রীদি-সুদোমানি পালানা পৌইদ্যেনে নিজোরে পুরোপুরিভাবে কামত্ রাগেই পারন্ সেনত্তেই তারার্ পাওনা ভাগ্কো দিবাত্তে তে যিরূশালেমত্ বজত্তিগুরিয়্যে মানুচ্চুনোরে উগুম দিলো। 5 এ উগুমান্ ফগদাঙ্ অনার্ লগে লগে ইস্রায়েলীয়গুনে তারার্ ক্ষেত-ক্ষেত্তিগানি, নূয়ো আংগুর-রস, তেল আর মধুর পোইল্যা ভাগ্কো আর ক্ষেদত্ যিয়েনি জর্মায় সিয়েনির্অ পৌইল্যা ভাগ্কো ভালোক্কানি দান গুরিলো। ইয়েনিবাদেয়ো তারা বেক্কানির্ দশ ভাগর্ একভাগ্ আনিলাক্ আর সিয়েনি বেক্কানিয়ে বোউত্ অলঅ। 6 ইস্রায়েল আর যিহূদার যিদুক্কুন মান্জ্যে যিহূদার আদাম আর শঅরানিত্ বজত্তি গুরিদাক্ তারায়ো তারার্ গোরু, ভেড়া আর ছাগল পালর্ দশ ভাগর্ এক ভাগ্ আনিলাক্ আর তারার্ গোজেন লগেপ্রভুর নাঙে যুদো গুরি রাগেইনে জিনিজোর্ দশ ভাগর্ একভাগ আনিনে কয়েক্কো কুড়্ বানেলাক্। 7 তিন মাজত্ এ কামান্ আরাম্ভ গুরিনে তারা সাত্ মাজত্ থুম্ গুরিলাক্। 8 হিষ্কিয় আর তার্ কাম্গুরিয়্যেগুনে এইনে সে কুড়ুন্ দেগিনে লগেপ্রভুর বাঈনী গুরিলাক্ আর তার্ মানুচ্ ইস্রায়েলীয়গুনোরে বাঈনী গুরিলো। 9 হিষ্কিয় সে কুড়ুনোর্ কধা ধর্মগুরু আর লেবীয়গুনোরে পুযোর্ গুরিলো। 10 সেক্কে সাদোকর্ বংশর অসরিয় নাঙে আজল্ ধর্মগুরুবো জোবত্ কলদে, “লগেপ্রভুর ঘরত্ মানুচ্চুনে যেক্কে তারার্ দানুন্ আনদে আরাম্ভ গুরিলাক্ সেক্কেত্তুন্ ধুরি আমা খানাগানিয়ো যেধোক্ক্যেন যগাজ্যে ওইয়্যে সেধোক্ক্যেন বেশ্অ আঘে বোউত্, কিত্যে লগেপ্রভু তা মানুচ্চুনোরে আশিদ্বাদ গোজ্যে, আর এ বেক্ জিনিসছানি ভালোক্কানি উগুজ্যে।” 11 সেক্কে হিষ্কিয় লগেপ্রভুর ঘরত্ কয়েক্কান্ ভান্ডাল-ঘর বানেবাত্তে উগুম্ দিলো আর সিয়েনি বানা অলঅ। 12 সে পরেন্দি মানুচ্চুনে বক্শিজ্, বেক্ জিনিসছানিত্তুন্ দশ ভাগর্ একভাগ আর লগেপ্রভুর নাঙে যুদো রাগেয়্যে জিনিস্ছানি বিশ্বেজর্ লগে ভান্ডাল-ঘরত্ আনা ধুরিলাক্। কনানিয় নাঙে এক্কো লেবীয় উগুরে এলদে এ পুরো জিনিসছানির্ চেই চিদিবার্ ভারান্ আর তার্ ভেই শিমিয়ি তার্ এযাল্দিয়্যে এলঅ। 13 এ দ্বিজনর্ অধীনোত্ রাজা হিষ্কিয় আর লগেপ্রভুর ঘরর্ আজল্ কাম্গুরিয়্যে অসরিয়র উগুমে যিহীয়েল, অসসিয়, নহৎ, অসাহেল, যিরীমোৎ, যোষাবদ, ইলীয়েল, যিস্মখিয়, মাহৎ আর বনায়ে চেইচিদিবার্ ভারান্ পেলাক্। 14 মানুচ্চুনোরে নিজোর্ আওজে গরানা উৎসর্বর জিনিজোর্ ভারান্ এলদে পূগেন্দি গেদোর্ চুগিদার্-লেবীয় যিম্নার পুয়ো কোরির উগুরে। লগেপ্রভুরে দিয়্যে বেক্ বক্শিজ্ছানি আর দাঙর্ সুদ্ধো-সাংগ জিনিস্ছানি ভাগ গুরি দিবার্ ভারান্অ এলদে তা উগুরে। 15 ধর্মগুরুগুনোর্ শঅরানি আর আদামানিত্ তারার্ নানান্ দলত্ বয়জে চিগোন্ বা দাঙর্ তারার্ সমাজ্যে ধর্মগুরুগুনোরে ঠিগ্ গুরিনে ভাগ্ গুরি দিবাত্তে কোরির অধীনোত্ এদন, বিন্যামীন, যেশূয়, শময়িয়, অমরিয় আর শখনিয় বিশ্বেজর্ লগে কাম্ গুরিদাক্। 16 ইয়েনিবাদেয়ো নানান্ দল অনুসারে যিদুক্কুন্ ধর্মগুরুয়্যে পত্তিদিনোর্ কামানি পালেবাত্তে লগেপ্রভুর ঘরত্ চোমেদাক্ তারারেয়ো খানার্ ভাগ্ তারা দিদাক্। ইগুনে এলাক্ তিন বজর্ আর তাত্তুন্ বেশ্ বয়জর্ মরদ্ যিগুনোর্ নাঙান্ ধর্মগুরুগুনোর্ বংশ-নাঙানিত্ লেগা এলঅ। 17 বংশ-নাঙানিত্ ধর্মগুরুগুনোর্ নাঙানি বাবর্ বংশ মজিম্ লেগা ওইয়্যে আর কুড়ি বজর্ আর তাত্তুন্ বেশ্ বয়জর্ লেবীয়গুনোর্ নাঙানির্ কাম ভারান্ আর নানান্ দল মজিম্ লেগা ওইয়্যে। 18 ইগুন্বাদে তারার্ মোগ্ আর ঝি-পুয়োগুনোর্, অত্তাৎ পুরো সমাজর্ নাঙানি বংশ-লিস্টিত্ লেগা ওইয়্যে, কিত্যে ধর্মগুরু আর লেবীয়গুনে বিশ্বেজর্ লগে গোজেনর নাঙে নিজোরে যুদো গোজ্যন্। 19 যে ধর্মগুরুগুনে, অত্তাৎ হারোণর যে গুট্টিগুনে নিজোর্ নিজোর্ শঅর্ আর আদামর্ চেরোকিত্তে ক্ষেদর্ ভূইয়োত্ বজত্তি গুরিদাক্ তারার্ খানার্ ভাগ্কো দিবাত্তে পত্তি শঅর্ আর আদামত্ কয়েক্কো মান্জ্যর্ নাঙ্ ফগদাঙ্ গুরিনে নেযা ওইয়্যে। তারা পত্তি ধর্মগুরুরে আর বংশ নাঙানিত্ লেখ্যে পত্তি লেবীয়রে খানার্ ভাগ্ দিদাক্। 20 হিষ্কিয় যিহূদার বেক্ জাগানিত্ এধোক্ক্যেন গুরিনে কাম্ গুরিলাক্। তার্ গোজেন লগেপ্রভুর চোগেন্দি যিয়েনি গম্, ন্যায্য আর সত্য তে সিয়েনিই গুরিলো। 21 গোজেনর আওজ্ মজিম্ আদিবাত্তে গোজেনর্ ঘরর্ কামত্ আর রীদি-সুুদোম পালানা পৌইদ্যেনে তে যে কামানি গুরিদো সাৎ সিয়েনি বেক্কানি মন্ দিইনে গুরিলো, আর সেনত্তেই তে ফোলেল। |
Copyright © 2021 Bangladesh Bible Society
Bangladesh Bible Society