২ বংশধর 30 - Chakma Bibleহিষ্কিয়োর উদ্ধোর্-পরব্পো পালানা 1 ইস্রায়েলর গোজেন লগেপ্রভুর নাঙে উদ্ধোর্-পরব্পো পালেবাত্তে মানুচ্চুনে যেনে যিরূশালেমত্ লগেপ্রভুর ঘরত্ এজন্ সেনত্তে হিষ্কিয় পুরো ইস্রায়েলত্ আর যিহূদাত্ হবর্ পাদেল আর ইফ্রয়িম আর মনঃশি-গুট্টির্ মানুচ্চুনোরে চিদি লিগিলো। 2 রাজা আর তার্ কাম্গুরিয়্যেগুনে আর যিরূশালেমর বেক্ মানুচ্চুনে ঠিগ্ গুরিলাক্, দ্বিতীয় মাজত্ উদ্ধোর্-পরব্ পালা অবঅ। 3 ইয়েনর্ কারনান্ অলঅ, বোউত্ ধর্মগুরুয়্যে নিজোরে সিজি ন-গরন্ আর মানুচ্চুনেয়ো এইনে যিরূশালেমত্ এগত্তর্ ন-অন্ বিলিনে অক্ত মজিম্ তারা ইয়েন্ পালেই ন-পারন্। 4 এ সল্লাগান রাজা আর বেক্ মানুচ্চুনো ইদু যগাজ্যে বিলিনে মনে অলঅ। 5 ইস্রায়েলর গোজেন লগেপ্রভুর নাঙে উদ্ধোর্-পরব্ পালেবাত্তে যেনে বেক্কুনে যিরূশালেমত্ এজন্ সেনত্তে তারা বের্-শেবাত্তুন্ দান সং ইস্রায়েলর বেক্ জাগানিত্ মানুচ্ পাধেইনে ফগদাং গুরিলাক্। ভালোক্ বজর্ ধুরিনে তারা সুদোম মজিম্ ভালোক্কুন্ মানুচ্ এগত্তর্ ওইনে এ পরব্পো ন-পালান্। 6 রাজার উগুমে রাজা আর তার্ কামগুরিয়্যেগুনো ইত্তুন্ চিদি নেযেইনে মানুচ্চুনে ইস্রায়েল আর যিহূদার বেক্ জাগানিত্ যেইনে এ কধাগান ফগদাঙ্ গুরিলাক্, ও ইস্রায়েলীয়গুন, তুমি অব্রাহাম, ইসহাক আর ইস্রায়েলর গোজেন লগেপ্রভু ইদু ফিরি এজঅ, সেক্কে যিগুনে আসিরিয়ার রাজা আঢত্তুন্ রোক্ষ্যে পেইয়োন্ তারা ইদু, অত্তাৎ তমা ইদু তেয়ো ফিরি এবঅ। 7 তুমি তমা পূরোণি মানুচ্ আর ইস্রায়েলীয় ভেইয়ুনো ধোক্ক্যেন ন-অবা। তারা তারার্ পূরোণি মানুচ্চুনোর্ গোজেন লগেপ্রভু উগুরে অবিশ্বেজি ওইয়োন্ বিলিনে তে তারারে অমকদ সাজা দিলো। তুমি দঅ সিয়েনি দেগর্। 8 “তুমি তমা পূরোণি মানুচ্চুনো ধোক্ক্যেন গত্তনাগুন্ দর ন-গুরিবা বরং লগেপ্রভুর আঢত্ নিজোরে দি দুয়ো। যে সুদ্ধো-সাংগ ঘরানরে তে উমরত্তে নিজোর্ নাঙে যুদো গোজ্যে তুমি সে ঘরানত্ এজঅ আর তোমা গোজেন লগেপ্রভুরে সেবা গরগি যেনে তমা উগুরেত্তুন্ তার্ দর্গরেপারা রাগকান্ যাইয়োই। 9 যুনি তুমি লগেপ্রভু ইদু ফিরি এজঅ সালে তমা ভেই আর ঝি-পুয়োগুনোরে যিগুনে বন্দী গুরি রাগেয়োন্ তারা সিগুনো উগুরে দোয়্যে দেগেবাক্। সেক্কে তারা এ দেজত্ ফিরি এই পারিবাক্, কিত্তে তমা গোজেন লগেপ্রভুর দোয়্যে আর মেইয়্যে ভরা। তুমি তাইদু ফিরি এলে তে তার্ মুয়োন্ ফিরেই ন-রাগেব।” 10 হবর্ বোইয়্যেগুনে ইফ্রয়িম আর মনঃশির বেক্ আদাম আর শঅরত্ আর সবূলূন সং গেলাক্, মাত্তর্ সিদুগোর্ মানুচ্চুনে তারারে ইংসে-নিন্দে গরা ধুরিলাক্। 11 তো আশের, মনঃশি আর সবূলূন-গুট্টির কিজু মানুচ্ নিজোর্ আওজ্ মজিম্ যিরূশালেমত্ গেলাক্। 12 গোজেন আঢ্তান যিহূদার মানুচ্চুনো উগুরেয়ো এলঅ, সেনত্তে লগেপ্রভুর কধা মজিম্ রাজা আর তার্ কামগুরিয়্যেগুনোর উগুম্ পালেবাত্তে তে তারার্ মনান্ এক গুরিলো। 13 দ্বিমাজত্ সদানেইয়্যে রুটির পরব্ পালেবাত্তে ভালোক্কুন্ মানুচ্ যিরূশালেমত্ এগত্তর্ অলাক্। 14 পূজো গুরিবাত্তে এ্যামান্-উৎসর্বর যিদুক্কুন্ পূজো আর যিদুক্কুন্ আগর্বাট্টি টগ্ যিরূশালেমত্ এলাক্ তারা সিগুনোরে সোরেই নেযেইনে কিদ্রোণ কিজিঙোত্ ফেলেই দিলাক্। 15 তারা দ্বিতীয় মাজত্ চৌদ্দ দিনোত্ উদ্ধোর্-পরবর্ ভেড়া ছাগল কাবিলাক্। সেক্কে ধর্মগুরু আর লেবীয়গুনে লাজেইনে নিজোরে সিজি গুরিলাক্ আর লগেপ্রভুর ঘরত্ পূজ্যে-উৎসর্বর জিনিস আনিলাক্। 16 সে পরেন্দি গোজেন মানুচ্চো মোশির রীদি-সুদোম্ মজিম্ তারার্ ঠিগ্ গোজ্যে জাগানত্ যেইনে থিয়্যেলাক্। ধর্মগুরুগুনে লেবীয়গুনোর্ আঢত্তুন্ লো নেযেইনে ছিদি দিলাক্। 17 মানুচ্চুনো ভিদিরেত্তুন্ ভালোকজনে নিজোরে সিজি ন-গরন্। সেনত্তে ইগুনোর্ ওইনে লগেপ্রভুর নাঙে উৎসর্ব গুরিবাত্তে উদ্ধোর-পরবর্ ভেড়া ছঅ লেবীয়গুনোত্তুন কাবা পোজ্যে। 18-19 ইফ্রয়িম, মনঃশি, ইষাখর আর সবূলূন-গুট্টির ভালোক্কুনে নিজোরে সিজি ন-গুরিনে সুদোমর বিরুদ্ধে উদ্ধোর্-পরবর্ হানা হেইয়োন। মাত্তর্ হিষ্কিয় তারাত্তে তবনা গুরিনে কলদে, “যুনিয়ো তবনা-ঘরর্ সুদোম্ মজিম্ তারা সিজি ন-অন্ তো যিগুনে তারার্ পূরোণি মানুচ্চুনোর্ গোজেন লগেপ্রভুর আওজ্ মজিম্ আঢিবাত্তে মনান্ ঠিগ্ গোজ্যন্, মংগলময় গোজেনে যেনে তারারে বেক্কুনোরে খেমা গরে।” 20 লগেপ্রভু হিষ্কিয়োর তবনাগান শুনিনে মানুচ্চুনোরে খেমা গুরিলো। 21 যিদুক্কুন্ ইস্রায়েলীয় যিরূশালেমত্ লুম্মোন্দি তারা অমকদ রঙ্গ-ফুত্তি গুরিনে সাত দিন সং সদানেইয়্যে রুটির পরব্পো পালেলাক্; আর ইন্দি লেবীয় আর ধর্মগুরুগুনে পত্তিদিন লগেপ্রভুর নাঙে বাজানা বাজেইনে নাঙ্ গিনেদে-গান গরা ধুরিলাক্। 22 লগেপ্রভুর সেবা-কামত্ যিদুক্কুন্ লেবীয় কাবিল্ এলাক্ হিষ্কিয় তারারে উচ্চোমি তুলি দিইনে কধা কলঅ। তারা উদোলোলি-উৎসর্বর পরব্ গুরিনে সাত দিন ধুরিনে হানা-দানা গুরিলাক্ আর তারার্ পূরোণি মানুচ্চুনোর্ গোজেন লগেপ্রভুরে বাঈনি গুরিলাক্। 23 সে পরেন্দি বেক্ মানুচ্চুনে আরঅ সাত দিন সং সে পরব্পো পালেবাক্ বিলিনে ঠিগ্ গুরিলাক্; সেনত্তে আরঅ সাত দিন সং তারা রঙ্গ-ফুত্তি গুরিনে সে পরব্পো পালেলাক্। 24 যিহূদার রাজা হিষ্কিয় বেক্ মানুচ্চুনোত্তে এক আজার বলদ গোরু আর সাত আজার ভেড়া দিলো আর মুরুব্বী বাবোত্যে কাম্গুরিয়্যেগুনে দিলাক্ এক আজার বলদ আর দশ আজার ভেড়া। ধর্মগুরুগুনো ভিদিরে ভালোক্ জনে নিজোরে সিজি গুরিলাক্। 25 যিহূদার বেক্ মানুচ্চুনে, ধর্মগুরুগুনে, লেবীয়গুনে, ইস্রায়েলত্তুন্ এইচ্ছ্যে মানুচ্চুনে আর ইস্রায়েল আর যিহূদাত্ বজত্তিগুরিয়্যে যে বিদেশীগুনে এচ্চোন্ তারা বেক্কুনে ফুত্তি গুরিলাক্। 26 যিরূশালেমত্ খুব্ রঙ্গ-ফুত্তি অলঅ; ইস্রায়েলর রাজা দায়ূদোর পুয়ো শলোমন পরেন্দি যিরূশালেমত্ আর এধোক্ক্যেন গুরিনে পরব্ পালা গরা ন-অয়। 27 যেরেন্দি যে লেবীয়গুনে ধর্মগুরু এলাক্ তারা থিয়্যেইনে মানুচ্চুনোরে বর্ দিলাক্, আর গোজেনে তারার্ তবনাগান শুনিলো, কিত্তে তারার্ তবনাগান্ স্বর্গত্ তার্ পবিত্র থেবার্ জাগানত্ লুম্মেগোই। |
Copyright © 2021 Bangladesh Bible Society
Bangladesh Bible Society