২ বংশধর 3 - Chakma Bibleতবনা-ঘর বানানা 1 শলোমনে যিরূশালেমত্ মোরিয়া মুড়োবোত্ লগেপ্রভুর ঘরান্ বানেবাত্তে আরাম্ভ গুরিলো। এ মোরিয়া মুড়োবোত্ যিবূষীয় অরৌণা খামারবোত্ লগেপ্রভু তা বাপ্পো দায়ূদোরে দেগা দিয়্যে। দায়ূদে এ জাগায়ান্ তবনা-ঘরত্তে ঠিগ্ গুরিনে ফেলে যেইয়্যে। 2 শলোমনর্ রাজাগিরির্ চের্ বজরত্ দ্বিমাজর্ দ্বিদিনোত্ শলোমনে কাম্ আরাম্ভ গুরিলো। 3 গোজেন ঘর বানেবাত্তে তে পুরোণি মাপ ধোক্ক্যেন ষায়েট্ আত্ লাম্বা আর কুড়ি আত্ পাদাজ্যে গড়াগান্ দিলো। 4 ঘর মুজুঙেন্দি আস্ছালা ঘরানর্ পাদাজ্যে মাপ ধোক্ক্যেন কুড়ি আত্ পাদাজ্যে আর সিয়েনর্ ছালান্ একশ কুড়ি আত্ অজল্ গুরিনে দিয়্যে অলঅ আর সিয়েন ভিদিরেন্দিগান্ গম্ সোনালোই বেড়েই দিয়্যে অলঅ। 5 আজল্ দাঙর্ গুদিবো শলোমনে পত্তমে বেরস গাজ তক্তালোই ঢাগি দিলো আর সে পরেন্দি সিয়েন্ গম্ সোনালোই বেড়েই দিলো, আর সিয়েন্ খাজোর্ আর শিগল আরুক্কোই সাজা অলঅ। 6 ইয়েনিবাদেয়ো মংগা মংগা পাত্তর্লোই তে ঘরান্ সাজেল। সে সোনাগান্ তে বেবহার গুরিলো সিয়েন্ অলদে পর্বয়িম দেজর্। 7 দেবালানিত্ তে করূবপুনোর আরুক্ কাবিনে বানেল আর ছাল তক্তানি, দোরান ফ্রেমানি, দেবাল আর দোরানি সোনালোই বেড়েই দিলো। 8 সে পরেন্দি তে দাঙর্ সুদ্ধো-সাংগ জাগায়ান্ বানেল। সিয়েন্ ঘরানর্ পাদাজ্যে অনুসারে কুড়ি আত্ পাদাজ্যে আর কুড়ি আত্ লাম্বা গরা অলঅ। তেইশ্ টন চেরশত্ কেজি গম্ সোনালোই তে ভিদিরেন্দিগান্ বেড়েই দিলো। 9 সোনার পেরেক্কুনোর্ ভারান্ এলদে ছয়শঅ পঞ্চাশ গ্রাম। তে উগুরে গুদিগুন্অ সোনালোই বেড়েই দিলো। 10 দাঙর্ সুদ্ধো-সাংগ জাগায়ানত্ তে এক জোড়া করূবোর মূত্তি সাজিসাজাই কাবিনে বানেল আর সোনালোই বেড়েই দিলো। 11-13 পত্তি করূবোর দ্বিয়েন্ ডুয়ো এলদে পাচ্ আত্ গুরিনে লাম্বা। এক্কো করূবোর ডুয়ো এক দেবাল আর অন্য করূব্পোর্ ডুয়োগান্ অন্য দেবালত্ বাজেয়্যে রলঅ, আর ঘরর্ সংমোধ্যে তারার্ অন্য ডুয়ো দ্বিয়েনে এক্কান্ আরেক্কানর্ লগে বাস্যে রলঅ। এ করূব দ্বিবের ডুয়োগানর্ মাপ মেল্যে অবস্থায় এলদে কুড়ি আত্। তারা টেঙোই থিয়্যেইয়্যে এলঅ আর তারার্ মুয়োনি এলদে আজল্ দাঙর্ গুদিবোর্ ইন্দি। 14 শলোমনে য়েল্, বিগুনো রংয়র্, রাঙা সুদো আর মসীনা সুদোলোই পর্দা বানেল আর সিয়েন ভিদিরে করূবোর আরুক্কান্ সিলেল। 15 তবনা-ঘর মুজুঙেন্দি তে দ্বিবে খুদো বানেল। সিগুন্ অলাক্কে পাত্রিশ আত্ অজল। এক এক্কোর মাঢাগুন মাপ্পো এলদে পাচ্ আত্। 16 তে পাগেয়্যে শিগোল বানেইনে খুদো দ্বিবের মাঢা উগুরে দিলো, আর একশত্তুয়ো ডালোম বানেইনে সে শিগোলান উগুরে জড়া দিলো। 17 সে খুদো দ্বিবে তবনা-ঘর মুজুঙোত্ দোগিণেন্দি এক্কো আর উত্তোরেন্দি আর এক্কো উজু গুরিনে দিয়্যে অলঅ। যিবের দোগিণেন্দি এলঅ সিবের্ নাঙান্ তে দিলোদে যাখীন (যিয়েনর্ ভেদ্তান্ “তে থিবিদে গোজ্যে”) আর যিবে উত্তোরেন্দি এলঅ সিবের্ নাঙান্ দিলোদে বোয়স (যিয়েনর্ ভেদ্তান্ “তা ভিদিরেই বল্”)। |
Copyright © 2021 Bangladesh Bible Society
Bangladesh Bible Society