২ বংশধর 29 - Chakma Bibleহিষ্কিয় তবনা-ঘরান্ সিজি গুরিলো 1 হিষ্কিয় পোজোশ্ বজর্ বয়জত্ রাজা ওইনে যিরূশালেমত্ ঊনত্রিশ বজর্ রাজাগিরি গোজ্যে। তা মাবো নাঙান্ এলদে অবিয়া; তে অলদে সখরিয়র ঝি। 2 হিষ্কিয় তার্ পূরোণি মানুচ্ দায়ূদো ধোক্ক্যেন লগেপ্রভুর চোগেন্দি যিয়েনি গম্ সিয়েনি গুরিদো। 3 তার্ রাজাগিরির পত্তম বজরর্ পত্তম মাজত্ তে লগেপ্রভুর ঘরর্ দোরানি খুলি দিলো আর ঠিগ্ গুরিলো। 4 তে পূগোন্দি উদোনত্ ধর্মগুরু আর লেবীয়গুনোরে এগত্তর্ গুরিনে কলঅ, 5 “লেবীয়গুন্, মঅ কধাগান শুনো; তুমি নিজোর্ আর তমার্ পূরোণি মানুচ্চুনোর্ গোজেন লগেপ্রভুর ঘরান্ সিজি গরঅ। এ সুদ্ধো-সাংগ জাগানত্তুন্ বেক্ অসিজি জিনিসছানি দূর্ গরঅ। 6 আমা পূরোণি মানুচ্চুনে অবিশ্বেজি ওইয়োন; আমা গোজেন লগেপ্রভুর চোগেন্দি যিয়েনি ভান্ন্যেই তারা সিয়েনি গুরিলাক্ আর তারে ছাড়িনে গেলাক্। লগেপ্রভুর থেবার জাগানত্তুন্ তারা মুয়োনি ফিরেই নেযেয়োন আর তাত্তুন্ পিজেন্দি ফিজ্যন্। 7 তারা আস্ছালার্ দোরানিয়ো নাঢি দুয়োন্ আর চেরাগ্কুন্ মারে ফেল্যন্। এ সুদ্ধো-সাংগ জাগানত্ তারা ইস্রায়েলর গোজেন নাঙে আগর্বাট্টি ন-জ্বালান বা কনঅ পূজ্যে-উৎসর্বর অনুষ্ঠান ন-গরন্। 8 সেনত্তে যিহূদা আর যিরূশালেম উগুরে লগেপ্রভুর রাগ্কান লামি এলঅ। তুমি নিজো চোগেন্দি দেগর্, তে তারারে অমকদ দর্গরেপারা আর ঘিনাইদে ধোক্ক্যেন গুরি তুলিলো; তারারে দেগিনে মানুচ্চুনে আমক্ অদন্। 9 ইয়েনত্তে আমা পূরোণি মানুচ্চুনে যুদ্ধোত্ মারা পোজ্যন্ আর আমা মোগ্কুনে আর ঝি-পুয়োগুনে বন্দী ওইয়োন্। 10 মুই ইক্কিনে ইস্রায়েলর গোজেন লগেপ্রভুর লগে এক্কো চুক্তি গুরিবাত্তে চাং যেনে তার্ দর্গরেপারা রাগ্কান আমা উগুরেত্তুন্ যাইয়োই। 11 ও মর্ পুয়োগুন্, তুমি ইক্কিনে আর বোই ন-থেবা, কিত্তে লগেপ্রভুর মুজুঙোত্ থিয়্যেই থাগদে আর তার্ সেবাগুরিয়্যে ইজেবে তার্ কাম্ গুরিবাত্তে আর আগর্বাট্টি জ্বালেবাত্তে তে তমারে বেঈ লোইয়্যে।” 12 সেক্কে বেক্ লেবীয়গুনে কামত্ গেলাক্-কহাতীয়গুনো ভিদিরেত্তুন্ অমাসয়র পুয়ো মাহৎ আর অসরিয়র পুয়ো যোয়েল; মরারীয়গুনো ভিদিরেত্তুন্ অব্দির পুয়ো কীশ আর যিহলিলেল পুয়ো অসরিয়; গের্শোনীয়গুনো ভিদিরেত্তুন্ সিম্মোর্ পুয়ো যোয়াহ আর যোয়াহর পুয়ো এদন; 13 ইলীষাফণর বংশধরুনো ভিদিরেত্তুন্ শিম্রি আর যিয়ূয়েল; আসফর বংশধরুনো ভিদিরেত্তুন্ সখরিয় আর মত্তনিয়; 14 হেমন বংশধরুনো ভিদিরেত্তুন্ যিহূয়েল আর শিমিয়ি আর যিদূথূনোর বংশধরুনো ভিদিরেত্তুন্ শময়িয় আর উষীয়েল। 15 তারা তারার্ লেবীয় ভেইয়ুনোরে এগত্তর্ গুরিনে লগেপ্রভুর নাঙে নিজোরে ফারগ্ গুরিলাক্। সে পরেন্দি লগেপ্রভুর কধামজিম্ রাজার্ উগুম্ মজিম তারা লগেপ্রভুর ঘরান্ সিজি গুরিবাত্তে ভিদিরে গেলাক্। 16 ধর্মগুরুগুনে সিদু যেদক্কানি অসিজি জিনিস পেলাক্ সিয়েনি বেক্কানি লগেপ্রভুর ঘর উদোনত্ নিগিলেই আনিলো। লেবীয়গুনে সিয়েনি বুয়োইনে কিদ্রোণ কিজিঙোত্ নেযেলাক্। 17 তারা বেক্কুনে পত্তম মাজর্ পত্তম দিনোত্ লগেপ্রভুর ঘরান্ সিজি গুরিবাত্তে আরাম্ভ গুরিনে মাজর্ আস্তো দিনোত্ ঘর আস্ছালা সং এলাক্। আরঅ আস্তো দিন সং তারা লগেপ্রভুর ঘরান্ সিজি গুরিলাক্ আর পত্তম মাজর্ ষুলো দিনোত্ সিয়েন্ থুম্ গুরিলাক্। 18 সে পরেন্দি তারা রাজা হিষ্কিয় ইদু যেইনে কলাক্, “আমি পূজ্যে-উৎসর্বর পূজো আর তার্ বাজোন্-কদরা আর মুজুঙো-রুটি রাগেবার টেবিলান্ আর তার্ বেক্ পযাপিরানি সুদ্ধো লগেপ্রভুর ঘরান্ সিজি গোজ্যেই। 19 লগেপ্রভু উগুরে অবিশ্বেজি ওইনে রাজা আহসে তার্ রাজাগিরির্ সময়োত্ যেদক্কানি জিনিস বাদ দিয়্যে সিয়েনি আমি আরঅ ঠিগ্-ঠাগ্ গুরি নেযেয়্যেই। সিয়েনি ইক্কিনে লগেপ্রভুর ডালিপূজোর্ মুজুঙোত্ রোইয়্যে।” 20 তার্ কেল্যে বেন্যেপোত্যে রাজা হিষ্কিয় শঅরর্ মুরুব্বীগুনোরে এগত্তর্ গুরিনে লগেপ্রভুর ঘরত্ গেলঅ। 21 তারা রেজ্যত্তে, তবনা-ঘরত্তে আর যিহূদার মানুচ্চুনোত্তে পাপ-উৎসর্ব ইজেবে সাত্তো বলদ, সাত্তো ভেড়াছাগল, সাত্তো ভেড়া ছাগল ছঅ আর সাত্তো ছাগল আনিলাক্। সে পরেন্দি রাজা ধর্মগুরুগুনোরে, অত্তাৎ হারোণর বংশধরুনোরে সিগুন্ লগেপ্রভুর পূজোবো উগুরে উৎসর্ব গুরিবাত্তে উগুম্ দিলো। 22 ধর্মগুরুগুনে পত্তমে সে বলদ গোরুগুনোরে কাবিনে বেক্কুনোর্ লো-গানি নেযেইনে পূজোবো উগুরে ছিদিই দিলাক্; সে পরেন্দি ভেড়াগুন আর যেরেন্দি ভেড়া ছঅগুন্ কাবিনে সিগুনোর্ বেক্কুনোর্ লো-গানি ছিদি দিলাক্। 23 সে পরেন্দি ধর্মগুরুগুনে পাপ-উৎসর্বত্তে ছাগলুনোরে রাজা আর বেক্ মানুচ্চুনো মুজুঙোত্ আনিলাক্ যেনে তারা সিগুনোর্ মাধা উগুরে আঢ্তানি রাগেই পারন্। 24 ইয়েন পরেন্দি ধর্মগুরুগুনে সে ছাগলুন্ কাবিলাক্ আর বেক্ ইস্রায়েলীয়গুনোর্ পাপ্পানি ঢাগিবার্ আজাই পূজোগুনো উগুরে সে লো-গানিলোই পাপ-উৎসর্বর পরব্ গুরিলাক্। বেক্ ইস্রায়েলীয়গুনোত্তে পূজ্যে-উৎসর্ব আর পাপ-উৎসর্ব গুরিবার উগুমান রাজা দিয়্যে। 25 রাজা দায়ূদ, তার্ চেইচিদিয়্যে গাদ আর ভাববাদী নাথনর উগুম্ মজিম্ রাজা হিষ্কিয় লেবীয়গুনোরে কলদে যেনে তারা ঝোন্ঝোনি, বাশি আর হার্মনি লোইনে লগেপ্রভুর ঘরত্ যান্। লগেপ্রভু তার্ ভাববাদীগুনোর্ মাধ্যমে এ উগুমানি দিয়্যে। 26 সেনত্তে লেবীয়গুনে দায়ূদোর্ বাজানাগুন্ লোইনে আর ধর্মগুরুগুনে তারার্ তূরীগুন্ লোইনে সিদু যেইনে থিয়্যেলাক্। 27 সে পরেন্দি হিষ্কিয় পূজোবো উগুরে পূজ্যে-উৎসর্বর পরবর্ উগুমান্ দিলো। এ উৎসর্বর পরব্পান আরাম্ভ অলে লগেপ্রভুর নাঙে গান্অ আরাম্ভ অলঅ আর তা লগে ইস্রায়েলর রাজা দায়ূদোর্ বাজানা আর তূরীগুন্ বাজা অলঅ। 28 গানগেইয়্যেগুনে গান গেবাত্তে আর তূরী বাজেয়্যেগুনে তূরী বাজেইলে বেক্ মানুচ্চুনে মাদিত্ মাধা নিগিরিনে লগেপ্রভুরে ভোক্তি জানেলাক্। পূজ্যে-উৎসর্বর পরব্পান থুম্ ন-অনা সং ইয়েনি বাজেলাক্। 29 উৎসর্বর পরব্পান থুম্ অনার্ পরেন্দি রাজা আর তা সমারে বেক্কুনে আদু পাদিনে লগেপ্রভুরে ভোক্তি জানেলাক্। 30 রাজা হিষ্কিয় আর তার্ কাম্গুরিয়্যেগুনে দায়ূদোর্ আর চেইচিদিয়্যে আসফর রোজেয়্যে-গান্নোলোই লগেপ্রভুর নাঙে বাঈনী গুরিবাত্তে লেবীয়গুনোরে উগুম্ দিলো। সেক্কে তারা হুজি ওইনে নাঙ গিনেদে-গান গেলাক্ আর মাদিত্ মাধা নিগিরিনে লগেপ্রভুরে ভোক্তি জানেলাক্। 31 ইয়েন পরেন্দি হিষ্কিয় কলঅ, “তুমি ইক্কিনে লগেপ্রভু ইদু নিজোরে দুয়ো। এবেরা তুমি এইনে লগেপ্রভুর ঘরত্ এ্যামান্-উৎসর্ব আর ভালেদি জানানার্-উৎসর্বর পরবর্ জিনিসছানি আনঅ।” সেক্কে বেক্কুনে সিয়েনি আনিলাক্ আর যিগুনোর্ মনানি চেলঅ তারা পূজ্যে-উৎসর্বর পরবর্ জিনিসছানিয়ো আনিলাক্। 32 তারা পূজ্যে-উৎসর্বত্তে সত্তুর্বো বলদ, একশবো ভেড়া আর দ্বিশঅ ভেড়া ছাগল ছঅ আনিলাক্। ইয়েনি অলদে লগেপ্রভুর নাঙে পূজ্যে-উৎসর্বর পরবত্তে। 33 উৎসর্বত্তে যিদুক্কুন্ এ্যামান্ যুদো গুরি রাগা ওইয়্যে সিগুন্ অলাক্কে ছয়শঅ বলদ গোরু আর তিন আজার ছাগল-ভেড়া। 34 ধর্মগুরুগুনে কম্ অনায় তারা বেক্ পূজ্যে-উৎসর্বর য়েমান চামানি চুলি ন-পারিলাক্; সেনত্তে কাম্ থুম্ ন-অনা সং আর অন্য ধর্মগুরুগুনে সিজি ন-অনা সং তারার্ লেবীয় ভেইয়ূনে তারা কামত্ বল্ দিলাক্, কিত্তে নিজোরে সিজি গরানা পৌইদ্যেনে ধর্মগুরুগুনোত্তুন্ লেবীয়গুনে আরঅ বেশ্ মনযোগী এলাক্। 35 উদোলোলি-উৎসর্বর তেল্ পূজ্যে পরব্পান আর পূজ্যে-উৎসর্বর পরব্পান আর সিয়েন লগে ঢাল্যে-উৎসর্বর পরব্পানিলোই ভালোক্কুন্ উৎসর্বর পরব্ গরা অলঅ। এধোক্ক্যেন গুরিনে লগেপ্রভুর ঘরর্ সেবা কামানি আরঅ আরাম্ভ গরা অলঅ। 36 গোজেনে তা মানুচ্চুনোত্তে এ বেক্ কামানি খুব্ যাদিমাদি গোজ্যে বিলিনে হিষ্কিয় আর বেক্ মানুচ্চুনে রঙ্গ-ফুত্তি গুরিলাক্। |
Copyright © 2021 Bangladesh Bible Society
Bangladesh Bible Society