২ বংশধর 28 - Chakma Bibleযিহূদার রাজা আহস 1 আহসে কুড়ি বজর্ বয়সত্ রাজা ওইয়্যে আর যিরূশালেমত্ ষুলো বজর্ রাজাগিরি গোজ্যে। তার্ পূরোণি মানুচ্ দায়ূদে যেন্ লগেপ্রভুর চোগেন্দি যিয়েনি গম্ সিয়েনি গুরিদো তে সেধোক্ক্যেন ন-গুরিদো। 2 তে ইস্রায়েলর রাজাগুনো ধোক্ক্যেন চলিদো আর বাল দেবেদাগুনোরে পূজো গুরিবাত্তে তে ছাজি ঢালিনে মূত্তি বানেয়্যে। 3 তে বিন্-হিন্নোম কিজিঙোত্ আগর্বাট্টি জ্বালেদ আর লগেপ্রভু যিদুক্কুন্ জাদরে ইস্রায়েলীয়গুনো মুজুঙোত্তুন্ ধাবেই দিয়্যে তারার্ জঘন্য কামানি ধোক্ক্যেন তেয়ো তার্ পুয়োগুনোরে আগুনোত্ পুড়িনে উৎসর্ব গুরিলো। 4 তে পূজোর্ অজল্ জাগায়ানিত্, মুড়োবো উগুরে আর পত্তি ডেলা ছিদিপোজ্যে য়েল্ গাজ তলে য়েমান উৎসর্ব গুরিদো আর আগর্বাট্টি জ্বালেদ। 5 সেনত্তে তার্ গোজেন লগেপ্রভু তারে অরামর রাজা আঢত্ তুলি দিলো। অরামীয়গুনে তারে ওদেই দিলাক্ আর তার্ ভালোক্কুন্ মান্জ্যরে বন্দী গুরিনে দামেস্কত্ নেযেল। তারেয়ো ইস্রায়েলর রাজা পেকহের আঢত্ তুলি দিয়্যে অলঅ। ইস্রায়েলর রাজা তার্ বোউত্ মান্জ্যরে মারে ফেলেল। 6 রমলিয়র পুয়ো পেকহে একদিনো ভিদিরে যিহূদাত্ এক লাখ্ কুড়ি আজার সৈন্যরে মারে ফেলেয়্যে, কিয়া যিহূদার মানুচ্চুনে তারার্ পূরোণি মানুচ্ গোজেন লগেপ্রভুরে ছাড়ি যেইয়োন। 7 সিখ্রি নাঙে এক্কো ইফ্রয়িমীয় যোদ্ধা রাজার পুয়ো মাসেয়রে আর রাজঘরর্ ভারান্-পেইয়্যে কাম্গুরিয়্যে অস্রীকামরে আর রাজার পরেন্দি দ্বিলম্বর্ জাগানত্ যিবে এলঅ সে ইল্কানারে মারে ফেলেল। 8 ইস্রায়েলীয়গুনে তারার্ জাদ-ভেইয়ূনো ভিদিরেত্তুন্ মিলে আর ঝি-পুয়োগুনোরে বানিনে নেযেলাক্। তারা জনেদি এলাক্কে দ্বিলাখ্। তারা ভালোক্কানি পযাপিরায়ো লুদেইনে শমরিয়াত্ নেযেলাক্। 9 ওদেদ নাঙে লগেপ্রভুর এক্কো ভাববাদী শমরিয়াত্ এলঅ। সৈন্যদলুনে যেক্কে শমরিয়াত্ ফিরি এত্তন্ সেক্কে তে তারা লগে দেগা গুরিনে কলঅ, “তমা পূরোণি মানুচ্চুনোর গোজেন লগেপ্রভু যিহূদা উগুরে অমকদ বেজার্ ওইয়্যে বিলিনে তে তারারে তমা আঢত্ তুলি দিয়্যে। মাত্তর্ রাগর্ সুরে তুমি তারারে যেধোক্ক্যেন গুরিনে মারে ফেল্য সে কধাগান স্বর্গয়ান সং লুম্মেগি। 10 আর ইক্কিনে তুমি যিহূদা আর যিরূশালেম মানুচ্চুনোরে তমার্ চাগর্-চাগরানি বানেবাত্তে চর্। মাত্তর্ তমা গোজেন লগেপ্রভু ইদু কি তুমিয়ো দুষি নয়? 11 ইক্কিনে তুমি মঅ কধাগান শুনো। তমা জাদ্-ভেইয়ূনো ভিদিরেত্তুন্ যিগুনোরে তুমি বানিনে আন্য তারারে তুমি ফেরৎ পাধেই দুয়ো, কিত্তে লগেপ্রভুর দর্গরেপারা রাগকান্ তমা উগুরে আঘে।” 12 সেক্কে যুদ্ধোত্তুন্ যিগুনে ফিরি এত্তন্ ইফ্রয়িমর কয়েক্কো নেতা তারা বিরুদ্ধে থিয়্যেলাক্। সে নেতাগুনে অলাক্ যিহোহানন পুয়ো অসরিয়, মশিল্লেমোতর পুয়ো বেরিখিয়, শল্লুমোর পুয়ো যিহিষ্কিয় আর হদ্লয়র পুয়ো অমাসা। 13 তারা কলাক্কে,“সে বন্দীগুনোরে তুমি ইদু ন-আনিবা; আনিলে আমি লগেপ্রভুর ইদু দুষি অবং। আমার্ পাপ আর দুজ্ছানি লগে কি তুমি আরঅ কিজু মিজেবাত্তে চঅ? আমি দঅ অমকদ দুষি ওইনে আগিই আর লগেপ্রভুর দর্গরেপারা রাগ্কান ইস্রায়েল উগুরে রোইয়্যে।” 14 সেক্কে সৈন্যগুনে সে নেতাগুনোর্ আর বেক্ মানুচ্চুনোর মুজুঙোত্ সেই বন্দীগুনোর্ আর লুদেয়্যে পযাপিরানি রাগেলাক্। 15 সে নেতাগুনে যেক্কে লুদেয়্যে পযাপিরানিত্তুন্ কাবড়-চুগোড় লোইনে বন্দীগুনো ভিদিরে যিগুনে কাবড়-চুগোর্ নেইয়্যে এলাক্ তারারে বেক্কুনোরে কাবড় উরেলাক্। তারা তারারে কাবড়-চুগোড়, জদা আর হানা-দানা দিলাক্ আর তারার্ ঘা গানি উগুরে তেল্ ঢালি দিলাক্। বল্পোজ্যেগুনোরে তারা গাধা উগুরে চোড়েইনে যিরীহোত, অত্তাৎ খাজোর্-শঅরত্ তারার্ নিজোর্ মানুচ্চুনো ইদু ফিরেইনে নেযেলাক্। যেরেন্দি তারা শমরিয়াত্ ফিরি এলাক্। 16 সে অক্তত্ রাজা আহসে সাহায্য চেবাত্তে আসিরিয়ার রাজা ইদু মানুচ্ পাদেল। 17 ইয়েন অলদে, ইদোমীয়গুনে আরঅ এইনে যিহূদা আক্রমণ গুরিনে মানুচ্চুনোরে বন্দী গুরিনে নেযেলাক্। 18 ইন্দি আরঅ পলেষ্টীয়গুনে সেক্কে তলে মুড়োমুড়ি চাগালার্ আদামানিত্ আর যিহূদার নেগেভত্ হানা দুয়োন্। তারা বৈৎ-শেমশ, অয়ালোন, গদেরোৎ আর কায়-কুরে জাগানিসুদ্ধো সোখো, তিম্না আর গিম্সো গজক্ গুরিনে সিদু বজত্তি গোজ্যন্। 19 রাজা আহসত্তে লগেপ্রভু যিহূদারে তলে ফেলেল, কিত্তে আহসে যিহূদাত্ ভান্ন্যেইয়ানি বাড়েবাত্তে দিয়্যে আর নিজে লগেপ্রভু উগুরে অমকদ অবিশ্বেজি ওইয়্যে। 20 আসিরিয়ার রাজা তিগ্লৎ-পিলেষরে তাইদু এচ্ছ্যে মাত্তর্ তে সাহায্যর্ বদলে আহসরে দুঘ্ দিলো। 21 সেক্কে আহসে লগেপ্রভুর ঘরান্ আর রাজঘরত্তুন্ আর নেতাগুনোত্তুন্ কিজু মংগা পযাপিরা লোইনে আসিরিয়া রাজারে বক্শিজ্ দিলো, মাত্তর্ কিচ্ছু ন-অলঅ। 22 তার্ এ দুগোত্ রাজা আহসে লগেপ্রভু উগুরে আরঅ অবিশ্বেজি অলঅ। 23 দামেস্ক দেবেদাগুনে তারে ওদেই দুয়োন্ মনে গুরিনে তে সে দেবেদাগুনো ইদু এ্যামান্ উৎসর্ব গুরিলো। তে মনে গুরিলোদে, “অরাম রাজাগুনোর্ দেবেদাগুনে তারারে বল্ দুয়োন্, সেনত্তে বল্ পেবাত্তে মুই সে দেবেদাগুনো ইদু এ্যামান্ উৎসর্ব গুরিম্।” মাত্তর্ সে দেবেদাগুনেয়ই অলাক্ তার্ আর পুরো ইস্রায়েলর সর্বনাশর কারন। 24 আহসে গোজেন ঘরর্ পযাপিরানি একলগে এগত্তর্ গুরি কাবিনে কট্টা কট্টা গুরিলো। লগেপ্রভুর ঘরর্ দোরানি তে নাঢি দিলো আর যিরূশালেমর বেক্ জাগায়ানিত্ ডালিপূজো বানেই দিলো। 25 দেব-দেবেদাগুনোর্ নাঙে আগর্বাট্টি জ্বালেবাত্তে তে যিহূদার পত্তি শঅর্ আর আদামত্ পূজো গুরিবার্ অজল্ জাগা বানেইনে তার্ পূরোণি মানুচ্চুনোর্ গোজেন লগেপ্রভুরে বেজার্ বানেল। 26 আহসর অন্য বেক্ কাম কধানি আর তার্ বেক্ চাল্চলনর কধানি পৌইল্যাত্তুন্ ধুরিনে থুম্ সং “যিহূদা আর ইস্রায়েলর রাজাগুনোর বিজগ” নাঙে বোইবোত্ লেগা আঘে। 27 যেরেন্দি আহসে তার্ পূরোণি মানুচ্চুনো ইদু গেলগোই আর যিরূশালেম শঅরত্ তারে গোর্ দিয়্যে অলঅ, মাত্তর্ ইস্রায়েল রাজাগুনোর গোরানত্ তারে গোর্ দিয়্যে ন-অয়। তা জাগানত্ তার্ পুয়ো হিষ্কিয় রাজা অলঅ। |
Copyright © 2021 Bangladesh Bible Society
Bangladesh Bible Society