২ বংশধর 27 - Chakma Bibleযিহূদার রাজা যোথম 1 যোথমে পোশোজ্ বজর বয়জত্ রাজা ওইয়্যে আর যিরূশালেমত্ ষুলো বজর্ রাজাগিরি গোজ্যে। তা মাবোর্ নাঙান্ অলদে যিরূশা; তে অলদে সাদোকর ঝি। 2 যোথমে তা বাবঅ ধোক্ক্যেন লগেপ্রভুর চোগেন্দি যিয়েনি গম্ সিয়েনি গুরিদো। সিয়েনিবাদেয়ো তে তা বাবঅ ধোক্ক্যেন ভুল্ ন-গরে; আগর্বাট্টি জ্বালেবাত্তে তে লগেপ্রভুর ঘরত্ ন-যায়। তো মানুচ্চুনে ভান্ন্যেই কামানি গুরিদাক্। 3 যোথমে লগেপ্রভুর ঘরর্ অজল্ জাগান গেট্টো ঠিগ্ গোজ্যে আর ওফল মুড়োবোর্ দেবালর্ ভালোক্কানি জাগা দরমর গুরিলো। 4 তে যিহূদার মুড়োমুড়িগুনোত্ দেবাল-ঘিজ্যে আদাম বানেল আর ঝাড় চাগালাত্ তাম্বুল আর অজল্ চুগিদার-ঘর বানেল। 5 অম্মোনীয়গুনোর রাজার বিরুদ্ধে যুদ্ধো গুরিনে তে তারারে ওদেই দিলো। সেক্কে সে বজরত্ অম্মোনীয়গুনে তারে তিন আজার নয়শঅ কেজি রূবো, এক আজার আস্তো টন গম্ আর এক আজার আস্তোশঅ টন মোক্ক্যে দিলাক্। দ্বিবজরত আর তিন বজরত্অ তারা আগঅ সিদুক্কুন্ দিলাক্। 6 এধোক্ক্যেন গুরিনে যোথমে দরমর ওই উদিলো, কিত্তে তে বিশ্বেজ্ গুরিনে তার্ গোজেন্ লগেপ্রভুর পধেন্দি চলিদো। 7 যোথমর অন্য বেক্ কামর্ কধানি, তার্ বেক্ যুদ্ধোর্ কধানি আর তার্ চালচলনর্ কধানি বেক্কানি “ইস্রায়েল আর যিহূদার রাজাগুনোর্ বিজগ” নাঙে বোইবোত্ লেগা আঘে। 8 তে পোজোশ্ বজর্ বয়জত্ রাজা ওইয়্যে আর যিরূশালেমত্ ষুলো বজর্ রাজাগিরি গোজ্যে। 9 যেরেন্দি যোথমে তার্ পূরোণি মানুচ্চুনোর্ ইদু গেলগোই আর তারে দায়ূদ-শঅরত্ গোর্ দিয়্যে অলঅ। ইয়েন পরেন্দি তা পুয়োবো আহসে তা জাগানত্ রাজা অলঅ। |
Copyright © 2021 Bangladesh Bible Society
Bangladesh Bible Society