২ বংশধর 26 - Chakma Bibleযিহূদার রাজা উষিয় (অসরিয়) 1 সে পরেন্দি যিহূদার বেক্ মানুচ্চুনে উষিয়রে তা বাপ্পো অমৎসিয় জাগানত্ রাজা বানেলাক্। সেক্কে তা বয়জসান্ এলদে ষুলো বজর্। 2 অমৎসিয় তার্ পূরোণি মানুচ্চুনো ইদু যানার পরেন্দি উষিয় এলৎ শঅরান্ আরঅ বানেল আর যিহূদার অধীনোত্ আনিলো। 3 উষিয় ষুলো বজর বয়জত্ রাজা ওইয়্যে আর যিরূশালেমত্ বায়ুন্ন বজর্ রাজাগিরি গোজ্যে। তা মাবো নাঙান্ এলদে যিখলিয়া; তে অলদে যিরূশালেম শঅর মিলে। 4 উষিয় তা বাপ্পো অমৎসিয় ধোক্ক্যেন লগেপ্রভুর চোগেন্দি যিয়েনি গম্ সিয়েনি গুরিদো। 5 সখরিয় অক্তত্ তে গোজেনর আওজ্ মজিম্ চলিদো। গোজেনরে দোরেবাত্তে সখরিয় তারে শল্লা দিদো। যেদকদিন তে লগেপ্রভুর আওজ্ মজিম্ চলিদো সেদকদিন গোজেনেয়ো তারে সফলতা দান গোজ্যে। 6 তে পলেষ্টীয়গুনো বিরুদ্ধে যুদ্ধো গুরিলো আর গাৎ, যব্নির আর অস্দোদ দেবালান্ ভাঙি ফেলেল। সে পরেন্দি তে অস্দোদ চাগালাত্ আর পলেষ্টীয়গুনোর অন্য জাগায়ানিত্ কয়েক্কান্ দেবাল-ঘিজ্যে আদাম আরঅ তুলিলো। 7 গোজেনে পলেষ্টীয়গুনোরে, গূরবালত্ বজত্তিগুরিয়্যে আরবীয়গুনোরে আর মিয়ূনীয়গুনোর বিরুদ্ধে তারে বল্ দিলো। 8 অম্মোনীয়গুনে উষিয়রে হাজানা দিদাক্। তে অমকদ দরমর ওইনে উঠ্যে বিলিনে মিসর দুযি সং তার্ সুনাঙ্ ছিদি পড়িলো। 9 উষিয় যিরূশালেমর কোণা গেট্টোত্, কিজিঙো-গেট্টোত্ আর দেবাল কোণাবোত্ অজল্ চুগিদার-ঘর্ বানেইনে সিয়েনিরে দরমর গুরিলো। 10 তলেন্দি মুড়ো চাগালাত্ আর সংজাগাত্ তার্ ভালোক্কুন্ এ্যামানপাল এলাক্; সেনত্তে তে ধূল্যেচর-চাগালাত্ অজল্ অজল চুগিদার-ঘর বানেল আর ভালোক্কুন্ কূয়ো খুড়িলো। তা মানুচ্চুনে বোল্বোল্যে ভূইয়োত্ চাজ্ গুরিদাক্ আর মুড়োমুড়ি ইদু আংগুর ক্ষেত্ গুরিদাক্, কিত্তে তে চাজ্বাজ কাম্ কোচ্পেদঅ। 11 উষিয়োর এক্কো দরমর সৈন্যদল এলঅ। তারা হনানীয় নাঙে এক্কো সেনাপতির পরিচালনার অধীনোত্ এলাক্ আর লিগিয়্যে যিয়ূয়েল আর মুরুব্বী মাসেয়র ঠিগ্ গোজ্যে সোংখ্যে মজিম্ তারা দল্ দল্ গুরিনে যুদ্ধোত্ যেবাত্তে যুক্কোল্ থেদাক্। 12-13 তারা বেক্কুনে এলাক্ তিন লাখ্ সাত্ আজার পাচশঅ। এ বেক্ কাবিল্ যোদ্ধাগুনে দ্বিআজার ছয়শঅ গুট্টি-নেতার অধীনোত্ এলাক্। শত্রুগুনোর্ বিরুদ্ধে রাজারে বল্ দিবাত্তে ইগুনে এলাক্ এক্কো বোলী সৈন্যদল। 14 উষিয় বেক্ সৈন্যদলুনত্তে ঢাল, সেল্, মাঢাবো রোক্ষ্যে গুরিবার্ টোক্ক্যে, যাদি, ধনু আর ফিংগার পাত্তর্ যুগেই দিদাক্। 15 তে যিরূশালেমত্ কাবিল্ মানুচ্চুনোর্ বানেয়্যে মেশিনানি অজল্ চুগি দিবার্-ঘরানিত্ আর দেবালর্ কুণে কুণে রাগেল যেনে সিয়োত্তুন্ সেল্ আর দাঙর্ দাঙর্ পাত্তর্ মেলা দিইনে মুরি যান্। তা নাঙান্ চেরোকিত্তে ছিদি পড়িলো। তে গোজেনর বোউত্ বল্ পেইনে দরমর ওই উদিলো। 16 উষিয় বোলী ওই উদোনার্ পরেন্দি তা মনত্ বাড়্বোগান্ অলঅ আর সেক্কে তার্ অধপতন অলঅ। তে আগর্বাট্টি-পূজোত্ আগর্বাট্টি জ্বালেবাত্তে লগেপ্রভুর ঘরত্ সোমেইনে তার্ গোজেন প্রভুর বিরুদ্ধে পাপ গুরিলো। 17 সেক্কে দাঙর্ ধর্মগুরু অসরিয় আর লগেপ্রভুর আশিজন সাহসী ধর্মগুরু রাজার পিজে পিজে ভিদিরে গেলাক্। 18 তারা তারে মানা গুরিবাত্তে কলাক্, “উষিয়, লগেপ্রভুর নাঙে আগর্বাট্টি জ্বালেবার অধিকার তর্ নেই। হারোণর বংশধরুন, যিগুনোরে আগর্বাট্টি জ্বালেবাত্তে ফারক্ গরা ওইয়্যে, সে ধর্মগুরুগুনোর অধিকার আঘে। এ সুদ্ধো-সাংগ জাগানত্তুন্ তুই নিগিলি যাহ্, কিত্তে তুই পাপ গোজ্যস্। ইয়েনত্তে গোজেন লগেপ্রভু হামাক্কাই তরে সাজা দিবো।” 19 সেক্কে উষিয় রাগে আগুনো ধোক্ক্যেন ওই গেলঅ; তা আঢত্ আগর্বাট্টি জ্বালেবাত্তে এক্কো আগর্বাট্টি থগ্ এলঅ। লগেপ্রভুর ঘরত্ আগর্বাট্টি-পূজোবোর্ মুজুঙোত্ ধর্মগুরুগুনো উগুরে যেক্কে তে রাগ্ গোজ্যে সেক্কে তা কবালত্ এক্কান্ ফারাঙি দেগা দিলো। 20 আজল্ ধর্মগুরু অসরিয় আর অন্য বেক্ ধর্মগুরুগুনে তাইন্দি চেইনে তা কবালানত্ সে ফারাঙিগান্ দেগিলাক্। সেনত্তে তারা যাদিমাদি তারে নিগিলেই দিলাক্। তে নিজেয়ো যাদিমাদি নিগিলি যেবাত্তে চেলঅ, কিত্তে লগেপ্রভু তারে আঘাত্ গোজ্যে। 21 মরণ সং রাজা উষিয় ফারাঙিবলা এলঅ। তে এক্কান্ যুদো ঘরত্ বজত্তি গুরিদো, কিত্তে লগেপ্রভুর ঘরত্ যানাত্তুন্ তে বাদ পোজ্যে। সেক্কে রাজার কামান্ তার্ পুয়ো যোথম উগুরে পড়িলো আর তে দেজর্ মানুচ্চুনোরে শাজন্ গরা ধুরিলো। 22 উষিয়র অন্য বেক্ কামর্ কধানি পৌইল্যাত্তুন্ ধুরি থুম্ সং আমোসর পুয়ো ভাববাদী যিশাইয় লিগি রাগেয়্যে। 23 যেরেন্দি উষিয় তার পূরোণি মানুচ্চুনো ইদু গেলগোই। তারে রাজাগুনোর্ গোরান কায়-কুরে এক্কো মাদত্ তার্ পূরোণি মানুচ্চুনোর্ লগে গোর্ দিয়্যে অলঅ, কিত্তে মানুচ্চুনে কলাক্, “তার্ ফারাঙি ওইয়্যে।” তা জাগানত্ তার্ পুয়ো যোথমে রাজা অলঅ। |
Copyright © 2021 Bangladesh Bible Society
Bangladesh Bible Society