২ বংশধর 25 - Chakma Bibleযিহূদার রাজা অমৎসিয় 1 অমৎসিয় পোজোশ্ বজর বয়জত্ রাজা ওইয়্যে আর ঊনত্রিশ বজর সং যিরূশালেমত্ রাজাগিরি গোজ্যে। তা মাবোর্ নাঙান্ এলদে যিহোয়দ্দন; তে অলদে যিরূশালেম শঅরর্ মিলে। 2 লগেপ্রভুর চোগেন্দি যিয়েনি গম্ অমৎসিয় সিয়েনিই গুরিদো মাত্তর্ পুরো মন্ দিইনে ন-গুরিদো। 3 রেজ্যগান্ দরমরগুরিনে তা অধীনোত্ আনানার্ পরেন্দি যে কামগুরিয়্যেগুনে রাজারে, অত্তাৎ তা বাপ্পোরে মারে ফেল্যন্ তারারে তে মারে ফেলেল। 4 মাত্তর্ তে তারার্ ঝি-পুয়োগুনোরে মারে ন-ফেলেল বরং মোশির বোইবোত্ যে রীদি-সুদোমানি লেগা এলঅ সে মোজিম্ কাম্ গুরিলো। সে বোইবোত্ লগেপ্রভুর এ উগুমান্ লেগা এলঅ, “ঝি-পুয়োগুনোর পাপত্তে বাবত্তুন্ বা বাপ্পোর পাপত্তে ঝি-পুয়োগুনোরে মারে ফেলানা ন-চলিবো, মাত্তর্ বেক্কুনোত্তুন্ তার্ নিজোর্ পাপত্তে মরা পুরিবো।” 5 অমৎসিয় যিহূদার বেক্ মানুচ্চুনোরে ডাগিনে এগত্তর্ গুরি গুট্টি অনুসারে পুরো যিহূদা আর বিন্যামীনর মানুচ্চুনোর ভিদিরেত্তুন্ আজার উগুরে সৈন্যর সেনাপতিগুনোর আর শত উগুরে সৈন্যর সেনাপতিগুনোর্ অধীনোত্ রাগেল। তে কুড়ি বজর বা তাত্তুন্ অ বেশ্ বয়জর মানুচ্চুনোরে গুণি চেলদে, যুদ্ধোত্ যেবাত্তে তিন লাখ্ যোগাজ্যে মানুচ্ আগন্ যিগুনে সেল্ আর ঢাল বেবহার গুরি জানন্। 6 তে তিন আজার নয়শঅ কেজি রূবোলোই ইস্রায়েলত্তুন্ এক লাখ্ যোদ্ধা ভাড়া গুরিলো। 7 মাত্তর্ গোজেনর এক্কো মানুচ্ এইনে তারে কলঅ, “ও মহারাজ, ইস্রায়েলর এ সৈন্যদল্লো তঅ লগে যেনে ন-যায়, কিত্তে লগেপ্রভু ইস্রায়েলর লগে, অত্তাৎ ইফ্রয়িমর কারঅ লগে নেই। 8 যুনি তুই তারারে নেযাচ্ সালে সাহস গুরিনে যুদ্ধো গুরিলেয়ো শত্রুর ইদু গোজেনে তরে ওদেই দিবো, কিয়া বল্ দিবার্ বা ওদেই দিবার্ খেমতা গোজেনর আঘে।” 9 সেক্কে অমৎসিয় গোজেন মানুচ্চোরে কলঅ, “এই ইস্রায়েলীয় সৈন্যগুনোত্তে মুই যে তিন আজার নয়শঅ কেজি রূবো দুয়োং সিয়েনির্ কি অবঅ?” জোবত্ গোজেনর মানুচ্চো কলঅ, “গোজেনে তরে তাত্তুন্অ বেশ্ দি পারে।” 10 সেক্কে অমৎসিয় ইফ্রয়িমত্তুন্ তা ইদু এইচ্ছ্যে সৈন্যদল্লোরে বিদেয় গুরিনে তারারে ঘরত্ পাধেই দিলো। সে সৈন্যগুনে যিহূদার মানুচ্চুনো উগুরে অমকদ রাগে আগুন্ ওইনে নিজোর্ দেজত্ ফিরি গেলাক্। 11 অমৎসিয় মনত্ সাহস নিইনে নুন্ কিজিঙোত্ তার্ সৈন্যদল্লোরে পরিচালনা গুরিলো। সিয়েনত্ তে সেয়ীরোর্ দশ আজার মান্জ্যরে মারে ফেলেল। 12 যিহূদার সৈন্যগুনে আরঅ দশ আজার মান্জ্যরে জেদা ধুরিনে মুড়ো উগুরে নেযেইনে সিয়েনত্তুন্ তলেন্দি ফেলেই দিলাক্। সেক্কে তারা বেক্কুনে কট্টা কট্টা ওই গেলাক্। 13 ইন্দি যে সৈন্যগুনোরে অমৎসিয় যুদ্ধো গুরিবাত্তে ন-দিইনে ফেরৎ পাদেয়্যে তারা শমরিয়াত্তুন্ বৈৎ-হোরণ সং যিহূদার বেক্ আদামানি আর শঅরানি আক্রমণ গুরিলাক্। তারা তিন আজার মান্জ্যরে মারে ফেলেলাক্ আর ভালোক্কানি পযাপিরা লুদেইনে নেযেলাক্। 14 অমৎসিয় ইদোমীয়গুনোরে মারে ফেলেইনে ফিরি এবার্ অক্তত্ সেয়ীরোর্ মানুচ্চুনোর্ মূত্তিগুন্ লগে গুরি নেযেইনে এলঅ। সিগুনোরে তে নিজোর্ দেব-দেবেদা ইজেবে বোজেই দিলো তারারে পূজো গুরিবাত্তে আর তারার্ নাঙে আগর্বাট্টি জ্বালা ধুরিলো। 15 সেক্কে অমৎসিয় উগুরে লগেপ্রভুর রাগ্কান জুলি উদিলো। তে এক্কো ভাববাদীরে তাইদু পাধেই দিলো। সে ভাববাদীবো কলঅ, “সে মানুচ্চুনোরে যে দেবেদাগুনে তঅ আঢত্তুন্ তারার্ মানুচ্চুনোরে উদ্ধোর্ গুরি ন-পারন্ তুই কিত্তে তারাত্তুন্ বল্ চেলে?” 16 ভাববাদীবোর্ কধাগান থুম্ অদে ন-অদে রাজা তারে কলঅ, “আমি কি রাজারে শল্লা দিয়্যে ইজেবে তরে নেযেয়্যেই? তুই মঅ অ, নলে তরে মারে ফেলা অবঅ।” সেক্কে সে ভাববাদীবো মঅ অলঅ, তো কলে, “মুই হবর্ পাং, তুই এ কামান্ গোজ্যস্ আর মঅ শল্লাগান্ কান ন-পাদচ্ বিলিনে গোজেনে তরে ভস্ত গুরিবাত্তে ঠিগ্ গোজ্যে।” 17 পরেন্দি যিহূদার রাজা অমৎসিয় তা মন্ত্রীগুনো সমারে সল্লা গুরিনে যেহূর নাদিন, অত্তাৎ যিহোয়াহসর পুয়ো ইস্রায়েলর রাজা যিহোয়াশর ইদু কোই পাদেল, “এজঅ, আমি যুদ্ধোত্তে মুজুঙোমুজুঙি ওই।” 18 মাত্তর্ ইস্রায়েলর রাজা জোবত্ যিহূদার রাজারে কোই পাদেল, “লেবাননর এক্কো কাদাগাজে লেবাননর এরস গাজর্ ইদু কোই পাদেল, ‘মঅ পুয়োবো সমারে তঅ ঝিবোরে বৌ দে।’ সে পরেন্দি লেবাননর এক্কো ঝার্বো য়েমানে এইনে সে কাদাগাজ্সোরে টেঙ্গোই উরিলো। 19 ‘ইদোমরে ওদেই দুয়োং,’ মনে মনে এ কধাগান ভাবিনে তুই বার্বো গুরিনে ফুলি উত্যেস্। ইক্কিনে তুই নিজোর্ ঘরত্ থাগ্। কিত্তে দযাগান্ ডাগি আনিবে আর তা লগে ডাগি আনিবে নিজোর্ আর যিহূদার ভস্ত অনাগান্?” 20 মাত্তর্ অমৎসিয় সে কধাগান্ কান্ ন-পাদিলো। ইয়েন্ গোজেনত্তুন্ অলঅ, কিত্তে মানুচ্চুনে ইদোমর দেব-দেবেদাগুনোত্তুন্ বল্ চেইয়োন্ বিলিনে গোজেনে যিহোয়াশর আঢত্ তারারে তুলি দিবাত্তে চেইয়্যে। 21 সেনত্তে ইস্রায়েলর রাজা যিহোয়াশে তারারে আক্রমণ গুরিলো। তে আর যিহূদার রাজা অমৎসিয় যিহূদার বৈৎ-শেমশত্ একজনে আরেকজনর মুয়ো-মি অলাক্। 22 ইস্রায়েল ইদু যিহূদা পূরোপুরিভাবে উদি গেলঅ আর পত্তিজনে নিজোর্ নিজোর্ ঘরত্ ধেই গেলাক্। 23 ইস্রায়েলর রাজা যিহোয়াশে বৈৎ-শেমসত্ অহসিয়র নাদিন, অত্তাৎ যোয়াশর পুয়ো যিহূদার রাজা অমৎসিয়রে বন্দী গুরিলো। সে পরেন্দি যিহোয়াশে যিরূশালেমত্ যেইনে সিদুগোর্ দেবালান্ ইফ্রয়িম-গেদোত্তুন্ কোণাবোর্ গেট্টো সং পেরায় চের্শঅ আত্ লাম্বা এক্কান্ কট্টা ভাঙি দিলো। 24 গোজেন ঘরর্ যেদক্কানি সোনা-রূবো আর পযাপিরার্ ভার্ ওবেদ-ইদোম উগুরে এলঅ সিয়েনি বেক্কানি তে নেযেল। ইয়েনিবাদেয়ো তে রাজঘরর্ ধন-সোম্বোত্তি আর জামিন ইজেবে কয়েক্কো মান্জ্যরে লোইনে শমরিয়াত্ ফিরি গেলঅ। 25 ইস্রায়েলর রাজা যিহোয়াহসর পুয়ো যিহোয়াশর মরানার্ পরেন্দি যিহূদার রাজা যোয়াশর পুয়ো অমৎসিয় আরঅ পনর বজর বাঁজি এলঅ। 26 অমৎসিয়র অন্য বেক্ কামর্ কধানি পত্তম হইতে থুম্ সং “যিহূদা আর ইস্রায়েলর রাজাগুনোর বিজগ” নাঙে বোইবোত্ লেগা আঘে। 27 অমৎসিয় লগেপ্রভুর পধত্তুন্ সুরি যানার্ পরেন্দি মানুচ্চুনে যিরূশালেমত্ তার্ বিরুদ্ধে কুজুরোমি গুরিলাক্। সেক্কে তে লাখীশোত্ ধেই গেলঅ, মাত্তর্ মানুচ্চুনে লাখীশোত্ মানুচ্ পাদেইনে সিদু তারে মারে ফেলেল। 28 তা মরা কিয়্যেগান্ ঘোড়া পিদিত্ গুরি আনিনে যিহূদার শঅরত্ তার্ পূরোণি মানুচ্চুনোর লগে গোর্ দিয়্যে অলঅ। |
Copyright © 2021 Bangladesh Bible Society
Bangladesh Bible Society