২ বংশধর 24 - Chakma Bibleউপাসনা-ঘর ঠিগ্ গরানা 1 সাত বজর্ বয়জত্ যোয়াশে রাজা ওইয়্যে আর যিরূশালেমত্ চোল্লিশ বজর সং রাজাগিরি গোজ্যে। তা মাবোর্ নাঙান্ এলদে সিবিয়া; তে বের্-শেবা শঅরর্ মিলে। 2 ধর্মগুরু যিহোয়াদার পূরো জিংকানিগানত্ যোয়াশে লগেপ্রভুর চোগেন্দি যিয়েনি দোল্ সিয়েনি গুরিদো। 3 যিহোয়াদা তারে দ্বিবে মোক্ আনি দিয়্যে আর তার্ ঝি-পুয়ো ওইয়োন। 4 পরেন্দি যোয়াশে লগেপ্রভুর ঘরান্ ঠিগ্ গুরিবাত্তে মনান্ দিলো। 5 তে ধর্মগুরু আর লেবীয়গুনোরে ডাগিনে এগত্তর্ গুরিনে কলঅ, “তুমি পত্তি বজর্ তমা গোজেন ঘরান্ ঠিগ্ গুরিবাত্তে বেক্ ইস্রায়েলীয়গুনো ইত্তুন্ টেঙা আদায় গুরিবাত্তে যিহূদার বেক্ আদামানিত্ আর শঅরানিত্ যঅ। এ কামান্ তুমি যাদিমাদি গরঅ।” মাত্তর্ লেবীয়গুনে সে কামান্ যাদিমাদি ন-গুরিলাক্। 6 সেনত্তে রাজা আজল্ ধর্মগুরু যিহোয়াদারে ডাগি আনিনে কলঅ, “সাক্ষ্য-তাম্বুলোত্তে লগেপ্রভুর চাগর্ মোশি ইস্রায়েলর বেক্ মানুচ্চুনো উগুরে যে খাজানা বোজেয়্যে সিগুন্ যিহূদা আর যিরূশালেমত্তুন্ আদায় গুরিবাত্তে তুই লেবীয়গুনোরে পাধেই ন-দুয়োচ্ কিত্তে?” 7 সে বজং মিলেবো অথলিয়ার পুয়োগুনে লগেপ্রভুর ঘরান্ ভাঙিনে চোম্মোন্ আর সুদ্ধো-সাংগ পযাপিরানিয়ো বাল দেবেদার পূজোত্ বেবহার্ গোজ্যন্। 8 রাজার উগুমে এক্কো বাক্সু বানেইনে লগেপ্রভুর ঘর গেদোত্ ঠিগ্ বারেন্দি থুয়ো অলঅ। 9 সে পরেন্দি যিহূদা আর যিরূশালেমত্ এক্কান্ ফগদাঙ্ গরা অলদে, গোজেনর্ চাগর্ মোশি ধূল্যেচর-চাগালাত্ ইস্রায়েলীয়গুনো উগুরে যে খাজানাগুন্ বোজেয়্যে সিগুন্ যেনে মানুচ্চুনে লগেপ্রভু ইদু আনন্। 10 সিয়েনত্তে নেতাগুনে আর মানুচ্চুনে হুজি ওইনে তারার্ খাজানাগুন্ আনিনে সে বাক্সুবোত্ ফেলা ধুরিলাক্; সেক্কে বাক্সুবো ভুরিদো। 11 লেবীয়গুনে পত্তিদিন সে বাক্সুবো রাজার কামগুরিয়্যেগুনো ইদু আনিদাক্। যেক্কেনে সিবে ভিদিরে ভালোক্কুন্ টেঙা দেগা যেদঅ সেক্কে রাজার লিগিয়্যেবো আর আজল্ ধর্মগুরুবোর্ কামগুরিয়্যেবো এইনে বাক্সুবো খালি গুরিনে আরঅ সিবে তা জাগানত্ থোই দিদো। এধোক্ক্যেন গুরিনে ভালোক্কুন্ টেঙা জমা অলাক্। 12 যিগুনো উগুরে লগেপ্রভুর ঘরান্ ঠিগ্ গুরিবার্ কামান্ এলঅ রাজা আর যিহোয়াদা সে টেঙাগুন্ তারা আঢত্ দিলো। তারা লগেপ্রভুর ঘরান্ আরঅ ঠিগ্ গুরিবাত্তে রাজমিস্ত্রি আর গাজমিস্ত্রি কামত্ লাগেয়োন্ আর লুয়ো আর পিদোলর্ কালিগরঅ কামত্ লাগেয়োন। 13 যিগুনে ঠিগ্ গুরিবার্ কামানি গোজ্যন্ তারা অমকদ কাম্ গুরিদাক্, আর তারা কামন্দি উজেই যেদাক্। গোজেন ঘরান্ তারা আগঅ অবস্থাত্ ফিরেই আনিলাক্ আর সিয়েন্ জদবদে দরমর গুরিলাক্। 14 কামানি থুম্ গুরিনে তারা বাদবাগি টেঙাগুন্ রাজা আর যিহোয়াদা ইদু আনিলাক্ আর সে টেঙাগুন্দোই লগেপ্রভুর ঘরর্ এ পযাপিরানি বানা অলঅ-সেবা-কামর্ আর পূজ্যে-উৎসর্বত্তে পযাপিরা, লুয়োর্ চামেচ্ আর অন্য সোনা-রূবোর্ পযাপিরানি। যেদকদিন যিহোয়াদা বাঁজি এলঅ সেদকদিন সং লগেপ্রভুর ঘরত্ সুদোম মজিম্ পূজ্যে-উৎসর্বর পরব্ গরা অদঅ। 15 যিহোয়াদা বুড়ো ওইনে পুরো বয়জসান্ পেলঅ আর একশঅ ত্রিশ বজর বয়জত্ মুরি গেলঅ। 16 ইস্রায়েল ভিদিরে গোজেনত্তে আর তা ঘরত্তে তে যেদক্কানি গম্ কাম্ গোজ্যে সেনত্তে তারে দায়ূদ-শঅরত্ রাজাগুনোর লগে গোর্ দিয়্যে অলঅ। যোয়াশর পাজি কামানি 17 যিহোয়াদার মরাণার পরেন্দি যিহূদার নেতাগুনে এইনে রাজারে জু জু জানেলাক্ আর রাজা তারা কধানি শুনিলো। 18 তারা তারার্ পূরোণি মানুচ্চুনোর গোজেন লগেপ্রভুর ঘরান্ ছাড়িনে আশেরা-খুদো আর মূত্তি পূজো গরা ধুরিলাক্। তারার্ এ পাপত্তে গোজেন রাগ্কান যিহূদা আর যিরূশালেম উগুরে লামি এলঅ। 19 যুনিয়ো লগেপ্রভু মানুচ্চুনোরে তাইদু ফিরেই আনিবাত্তে ভাববাদীগুনোরে পাদেল আর তারা মানুচ্চুনোরে উজিয়ার্ গুরিলাক্ তো তারা ন-শুনিলাক্। 20 সেক্কে গোজেনর আত্মাগান্ ধর্মগুরু যিহোয়াদার পুয়ো সখরিয় উগুরে এলঅ। তে মানুচ্চুনোর্ মুজুঙোত্ থিয়্যেইনে কলঅ, “গোজেনে এ কধাগান কোইয়্যেদে, ‘লগেপ্রভুর উগুমান্ তুমি কিত্তেই অমান্য গোজ্য? তুমি ইয়োত্ ফোলেই ন-পারিবা। তুমি লগেপ্রভুরে ছাড়ি যেইয়ো বিলিনে তেয়ো তমারে ছাড়ি যেইয়্যে।’” 21 মাত্তর্ মানুচ্চুনে সখরিয়র বিরুদ্ধে কুজুরোমি গুরিলাক্ আর রাজার উগুমে লগেপ্রভুর ঘর উদোনত্ তারে ঢলা মারিনে মারে ফেলেলাক্। 22 সখরিয় বাপ্পো যিহোয়াদা রাজা যোয়াশ উগুরে যে বিশ্বেজ্ছান্ দেগেয়্যে সিয়েন্ যোয়াশে মনত্ ন-রাগেইনে তা পুয়োবোরে মারে ফেলেল। সখরিয় মুরি যেবার অক্তত্ কোইয়্যেদে, “লগেপ্রভু এ কামান্ দেগিনে তরে সাজা দিবো।” 23 যের বজরত্ অরামর সৈন্যগুনে যোয়াশ বিরুদ্ধে এলাক্। তারা যিহূদা আর যিরূশালেমান আক্রমণ গুরিনে বেক্ নেতাগুনোরে মারে ফেলেলাক্ আর দামেস্কত্ তারার্ রাজা ইদু বেক্ লুদেয়্যে পযাপিরানি পাধেই দিলাক্। 24 যিহূদার মানুচ্চুনে তারার্ পূরোণি মানুচ্চুনোর গোজেন লগেপ্রভুরে ছাড়ি যেইয়োন্ বিলিনে অরামীয় সৈন্যদলত্ কম্ মানুচ্ থেলেয়ো লগেপ্রভু বোউত্ দাঙর্ সৈন্যদলরে তারা আঢত্ তুলি দিলো। এধোক্ক্যেন গুরিনে অরামীয়গুনোরে দিইনে যোয়াশরে সাজা দিয়্যে অলঅ। 25 আহত অবস্থায় যোয়াশরে ফেলেই রাগেইনে অরামীয়গুনে গেলাক্। ধর্মগুরু যিহোয়াদার পুয়োবোরে মারে ফেলানার্ কারনে যোয়াশর কামগুরিয়্যেগুনে তা বিরুদ্ধে কুজুরোমি গুরিনে বিচ্ছোন উগুরে তারে মারে ফেলেলাক্। তে মুরি যানার্ পরেন্দি তারে দায়ূদ-শঅরত্ গোর্ দিয়্যে অলঅ, মাত্তর্ রাজাগুনোর্ গোরত্ তারে গোর্ দিয়্যে ন-অলঅ। 26 যে কামগুরিয়্যেগুনে রাজার বিরুদ্ধে কুজুরোমি গোজ্যন্ তারা অলাক্ শিমিয়ৎ নাঙে এক্কো অম্মোনীয় মিলের্ পুয়ো সাবদ আর শিম্রীৎ নাঙে এক্কো মোয়াবীয় মিলের্ পুয়ো যিহোষাবদ। 27 যোয়াশ পুয়োগুনোর কধানি, তা পৌইদ্যেনে বোউত্ আগাম্ কধা আর গোজেনর ঘরান্ ঠিগ্ গরানার কধানি “রাজাগুনোর বিজগ” নাঙে বোইবোত্ লেগা আঘে। পরেন্দি তা জাগানত্ তার্ পুয়ো অমৎসিয় রাজা অলঅ। |
Copyright © 2021 Bangladesh Bible Society
Bangladesh Bible Society