২ বংশধর 23 - Chakma Bible1 সাত্ বজরত্ যিহোয়াদা নিজোরে দরমর গুরিনে যিহোরামর পুয়ো অসরিয়, যিহোহাননর পুয়ো ইশ্মায়েল, ওবেদর পুয়ো অসরিয়, অদায়ার পুয়ো মাসেয় আর সিখ্রির পুয়ো ইলীশাফটর লগে এক্কান চুক্তি গুরিলো। ইগুনে বেক্কুনে অলাক্ শত উগুরে সৈন্যর নেতা। 2-3 ইগুনে যিহূদার বেক্ জাগানিত্ যেইনে পুরো শঅর্ আর আদামানিত্তুন্ লেবীয়গুনোরে আর ইস্রায়েলীয়গুনোর বেক্ বংশর নেতাগুনোরে এগত্তর্ গুরিলাক্। তারা যিরূশালেমত্ এইনে বেক্কুনে মিলিনে গোজেন ঘরত্ রাজা যোয়াশ লগে এক্কান চুক্তি গুরিলাক্। যিহোয়াদা তারারে কলঅ, “দায়ূদোর বংশধরুনো পৌইদ্যেনে লগেপ্রভু যে শমক্কান্ গোজ্যে সেই মজিম রাজার পুয়োগুনে রাজাগিরি গুরিবাক্। 4 ইক্কিনে তমার্ যে কামান্ গরা পুরিবো সিয়েন এধোক্ক্যেন: যিদুক্কুন্ ধর্মগুরু আর লেবীয় জিরেবার দিন্নোত্ উবোসনা-ঘরত্ কাম্ গুরিবাক তারাত্তুন্ তিন ভাগর্ এক ভাগ্ গেদোত্ চুগি দিবাক্, 5 এক ভাগ্ চুগি দিবাক্ রাজঘরত্ আর এক ভাগ চুগি দিবাক্ গড়া-গেট্টোত্ আর বাদবাগি বেক্কুনে থেবাক্ লগেপ্রভুর ঘর উদোনত্। 6 ধর্মগুরুগুনে আর সেবা-কামত্তে থেইয়্যে লেবীয়গুনে বাদেয়ো আর কনজনে লগেপ্রভুর ঘরত্ ন-সুমিবা। ইগুনে সোমেবাক্, কিত্তে ইগুনে গোজেন নাঙে ফারগ্ গোজ্যে, মাত্তর্ অন্য বেক্ মানুচ্চুনে লগেপ্রভুর উগুম্ মজিম বারেন্দি থেবাক্। 7 লেবীয়গুনে পত্তিজনে নিজোর্ নিজোর্ আত্যেরানি আঢত্ লোইনে রাজার চেরোকিত্তে ঘিরি থেবাক্। কনজনে তবনা-ঘরত্ সুমিলে তারে মারে ফেলেবাক্। রাজা যিদু যেদঅ সাৎ তুমি তা কায়-কুরে থেবা।” 8 ধর্মগুরু যিহোয়াদা যে উগুমান্ দিলো লেবীয়গুনে আর যিহূদার শত্ শত্-সেনাপতিগুনে বেক্কুনে সিয়েনই গুরিলাক্। সেনাপতিগুনে পত্তিজনে নিজোর্ নিজোর্ মানুচ্চুনোর, অত্তাৎ জিরেবার দিন্নোত্ যিগুনে কাম পালা বুদুলিবাত্তে এচ্ছ্যন্ আর যিগুনে কামত্তুন্ ফিরোদন্ তারারে আনিলাক্। ইগুনোর্ কনঅ দলরে ধর্মগুরু যিহোয়াদা ছুটি ন-দে। 9 রাজা দায়ূদোর যিদুক্কুন্ সেল্ আর চিগোন্ আর দাঙর্ ঢাল গোজেন ঘরত্ এলঅ সিয়েনি লোইনে তে সে সেনাপতিগুনোর্ আঢত্ দিলো। 10 রাজারে রোক্ষ্যে গুরিবাত্তে যিহোয়াদা বেক্ মানুচ্চুনোর্ পত্তিজনরে আত্যের্ আঢত্ গুরি উবোসনা-ঘর মুজুঙোত্ ডালিপূজোবো ইদু দোগিনেন্দিত্তুন্ উত্তোরেন্দি সং থিয়্যেইনে রাগেল। 11 সে পরেন্দি যিহোয়াদা আর তার্ পুয়োগুনে রাজার পুয়োবোরে নিগিলেই আনিনে তার্ মাঢাবোত্ মুকুট পিনেই দিলাক্। তারা তা আঢত্ সুদোম বোইবো দিলাক্ আর তারে রাজা ইজেবে অভিষেগ্ গুরিলাক। সেক্কে মানুচ্চুনে রঅ ছাড়িনে কলাক্, “রাজা ভালোক্ দিন সং বাঁজোক্।” 12 মানুচ্চুনোর্ ধাবাদেদি আর রাজার নাঙ্ গিনেনার্ রঅবো শুনিনে অথলিয়া লগেপ্রভুর ঘরত্ তারা ইদু গেলঅ। 13 তে দেগিলোদে, লগেপ্রভুর ঘরত্ সোমেবার্ পথ্তানত্ রাজা তার্ থুনিবো কায়-কুরে থিয়্যেই আঘে আর সেনাপতিগুনে আর তূরী বাজেয়্যেগুনে রাজার্ কায়-কুরে আগন্। দেজর্ বেক্ মানুচ্চুনে হুুজি-ফুত্তি গত্তন্ আর তূরী বাজাদন্ আর গান গেইয়্যেগুনে বাজনা বাজেইনে নাঙ্ গিনেদে-গান গত্তন্। ইয়েনি দেগিনে অথলিয়া তার্ কাবড়্-চুগোড়ানি ফাদিনে রঅ ছাড়িনে কলঅ, “ইয়েন্ দঅ বেঈমানি! বেঈমানি!” 14 সেক্কে ধর্মগুরু যিহোয়াদা সৈন্যদল উগুরে নেযেয়্যে শত-উগুরে সেনাপতিগুনোরে বারেন্দি আনিনে কলঅ, “তারে সৈন্যগুনোর সুরোর্ সংমোধ্যে থোইনে ইয়োত্তুন্ নিগিলেই নেযঅ। যে তার্ পিজে পিজে এবঅ তারে মারে ফেলেবা।” ইয়েন আগেন্দি তে উগুম্ দিয়্যেদে, লগেপ্রভুর ঘর ভিদিরে অতলিয়ারে মারে ফেলানা উজিত্ ন-অবঅ। 15 সেনত্তে তারা অথলিয়ারে ধুরিলাক্ আর রাজঘরর্ ঘোড়া-গেট্টোত্ সুমিবার্ পথ্তানত্ নেযেইনে তারে মারে ফেলেলাক্। 16 সে পরেন্দি যিহোয়াদা, রাজা আর মানুচ্চুনে মিলিনে এ চুক্তিবো গুরিলাক্, তারা লগেপ্রভুর মানুচ্ ইজেবে চলিবাক্। 17 সে পরেন্দি বেক্ মানুচ্চুনে বাল দেবেদা মন্দিরোত্ যেইনে সিয়েন্ ভাঙি ফেলেলাক্। তারা ডালিপূজো আর মূত্তিগুন ভাঙি দিলাক্ আর ডালিপূজোগুনো মুজুঙোত্ বাল দেবেদার ধর্মগুরু মত্তনরে মারে ফেলেলাক্। 18 সে পরেন্দি যিহোয়াদা লগেপ্রভুর ঘরান্ চেইচিদিবার্ ভারান্ ধর্মগুরুগুনোর্ আঢত্ দিলো। ইগুনে অলাক্ লেবীয়। ইগুনো উগুরে দায়ূদে লগেপ্রভুর ঘরর্ ভারান্ দিলো যেনে তারা দায়ূদোর্ উগুম মজিম্ হুজি-ফূত্তি গুরিনে গান গেইনে মোশির রীদি-সুুদোম মজিম লগেপ্রভুর নাঙে পূজ্যে-উৎসর্বর অনুষ্ঠান্ গুরি পারন্। 19 কনঅ বাবোত্যে অসিজি মানুচ্ যেনে সুমিই ন-পারন সেনত্তে তে লগেপ্রভুর ঘরর্ গেট্টুনোত্ চুগিদারুনোরে রাগেল। 20 যিহোয়াদা শত উগুরে-সেনাপতিগুনোরে, মুরুব্বীগুনোরে, মানুচ্চুনোর্ নেতাগুনোরে আর দেজর্ বেক্ মানুচ্চুনোরে লোইনে লগেপ্রভুর ঘরত্তুন্ রাজারে নিগিলেই আনিলো। তারা অজল্ জাগান গেট্টোন্দি রাজঘরত্ গেলাক্ আর রাজারে রাজ-সিংহাসনত্ বোজেলাক্। 21 অথলিয়ারে মারে ফেলানার পরেন্দি শঅরান্ শান্ত অলঅ আর দেজর্ বেক্ মানুচ্চুনে হুজি ফূত্তি গুরিলাক্। |
Copyright © 2021 Bangladesh Bible Society
Bangladesh Bible Society