২ বংশধর 22 - Chakma Bible

যিহূদার রাজা অহসিয়

¹ যিরূশালেমর মানুচ্চুনে যিহোরামর চিগোন্‌ পুয়ো অহসিয়রে যিহোরামর জাগানত্‌ রাজা বানেলাক্‌, কিত্যে লুদেয়্যেগুনে আরবীয়গুনো সমারে লুদেবাত্তে এইনে যিহোরামর বেক্‌ দাঙর্‌ পুয়োগুনোরে মারে ফেলেয়োন। সেনত্তে যিহূদার রাজা যিহোরামর পুয়ো অহসিয় রাজাগিরি গরানা আরাম্ভ গুরিলো।

² অহসিয় বেইশ বজর্‌ বয়জত্‌ রাজা ওইয়্যে আর এক বজর্‌ সং যিরূশালেমত্‌ রাজাগিরি গোজ্যে। তা মাবো অথলিয়া অলদে অম্রির নাদিন্‌।

³ অহসিয়য়ো আহাবর বংশর মানুচ্চুনোর পধেদি চলিদো, কিত্তে তা মাবো তারে বজং কাম গুরিবাত্তে সল্লা দিদো।

⁴ অহসিয় আহাব বংশর মানুচ্চুনো ধোক্ক্যেন লগেপ্রভুর চোগেদি যিয়েনি ভান্ন্যেই সিয়েনি গুরিদো, কিত্তে তা বাপ্পোর্‌ মরাণার পরেন্দি সে বংশর মানুচ্চুনে তারে সল্লা দিদাক্‌। সিয়েনত্তে তার্‌ পতন ওইয়্যে।

^5-6 তে তারার্‌ সল্লামজিম্‌ ইস্রায়েল রাজা আহাবর পুয়ো যোরাম লগে রামোৎ-গিলিয়দত্‌ অরামর রাজা হসায়েল বিরুদ্ধে যুদ্ধো গুরিবাত্তে গেলঅ। সেক্কে অরামীয়গুনে যোরামরে আঘাত্‌ গুরিলাক্‌। সে আঘাত্‌তানত্তুন গম্‌ অবাত্তে যোরামে যিষ্রিয়েলত্‌ ফিরি গেলঅ। আহাবর পুয়ো যোরামে আঘাত্‌ পেইয়্যে বিলিনে যিহূদার রাজা যিহোরাম পুয়ো অহসিয় তারে চেবাত্তে যিষ্রিয়েলত্‌ গেলঅ।

⁷ ইয়েনর্‌ মাধ্যমে গোজেনে অহসিয়র পতন ঘোদেল। অহসিয় সিদু লুমিনে যোরাম লগে নিম্‌শির পুয়ো যেহূর বিরুদ্ধে যুদ্ধো গুরিবাত্তে গেলঅ। এ যেহূরে লগেপ্রভু আহাবর বংশবোরে ভস্ত গুরিবাত্তে অভিষেগ্ গোজ্যে।

⁸ যেহূ যেক্কেনে আহাব বংশর মানুচ্চুনোরে সাজা দের্‌ সে অক্তত্‌ তে অহসিয়র বল্ দিয়্যে যিহূদার নেতাগুনোরে আর তার্‌ বেক্‌ ভেই পুদ্‌তুনোরে দেগিনে তারারে মারে ফেলেল।

⁹ সে পরেন্দি তে অহসিয়রে তোগেবাত্তে নিগিলিলো। অহসিয় শমরিয়াত্‌ পৌল্যেই থেলঅ আর যেহূর মানুচ্চুনে তারে ধুরিনে যেহূর ইদু নেযেইনে তারে মারে ফেলেলাক্‌। তারা তারে গোর্ দিলাক্‌, কিত্তে তারা কোইয়োন্দে, “ইবে সেই যিহোশাফটর নাদিন যিবে পুরো মনান্‌ দিইনে লগেপ্রভুর আওজ্ মজিম্‌ চলিদো।” অহসিয়র বংশত্‌ রাজা অয়দ্যে ধোক্ক্যেন খেমতা কারর্‌অ ন-এলঅ।

অথলিয়া আর যোয়াশে

¹⁰ অহসিয়র মা অথলিয়া যেক্কে দেগিলো, তা পুয়োবো মুরি যেইয়্যে সেক্কে তে যিহূদার রাজার বেক্‌ পুয়োগুনোরে ভস্ত গুরিলো।

^11-12 মাত্তর্‌ বেক্‌ রাজার্‌ পুয়োগুনোরে মারে ফেলেবার আগেন্দি রাজা যিহোরামর ঝি অহসিয়র বোন যিহোশেবা অহসিয়র পুয়ো যোয়াশরে রাজার পুয়োগুনো ভিদিরেত্তুন্‌ চুর্‌ গুরিনে আনিলো। অথলিয়ার ইত্তুন্‌ লুগেই রাগেবাত্তে যিহোশেবা যোয়াশ আর তার্‌ ওঝাবুড়িবোরে এক্কো ঘুম যেবার্‌ গুদিত্‌ রাগেল। সেনত্তে অথলিয়া তারে মারে ফেলেই ন-পারে। যিহোশেবা ধর্মগুরু যিহোয়াদার মোগ্‌ এলঅ বিলিনে অথলিয়া যে ছঅ বজর দেজত্‌ রাজাগিরি গোজ্যে সে বজরুনোত্‌ যোয়াশে গোজেন ঘরত্‌ পৌল্যেই রলঅ।