২ বংশধর 21 - Chakma Bible1 পরেন্দি যিহোশাফটে তা পূরোণি মানুচ্চুনো ইদু গেলগোই আর দায়ূদ-শঅরত্ তার্ পূরোণি মানুচ্চুনোর লগে তারে গোর্ দিয়্যে অলঅ। তা জাগানত্ তার্ পুয়ো যিহোরামে রাজা অলঅ। 2 তা ভেইয়ূনোরে, অত্তাৎ যিহোশাফট পুয়োগুনোর্ নাঙানি অলদে অসরিয়, যিহীয়েল, সখরিয়, অসরিয়, মীখায়েল আর শফটিয়। ইগুনে বেক্কুনে অলাক্ ইস্রায়েলীয়গুনোর রাজা যিহোশাফটর পুয়ো। 3 তারা বাপ্পো তারার্ সোনা, রূবো আর মংগা মংগা জিনিজ্ আর যিহূদা দেজত্ দেবাল-ঘিজ্যে আদাম্ আর শঅর্ দিয়্যে, মাত্তর্ যিহোরামে দাঙর্ পুয়ো বিলিনে তারে রেজ্যগান্ দিয়্যে। যিহূদার রাজা যিহোরাম 4 যিহোরামে তা বাবর্ রেজ্যগান নিজোর্ গজগত্ আনিনে নিজোরে দরমর গুরিলো। তে নিজোর্ বেক্ ভেইয়ূনোরে আর ইস্রায়েলর কয়েক্কো উজু পধর্ কাম্গুরিয়্যেরে মারে ফেলেল। 5 যিহোরামে বত্রিশ বজর বয়জত্ রাজা ওইয়্যে আর যিরূশালেমত্ আস্তো বজর্ রাজাগিরি গোজ্যে। 6 আহাব বংশর মানুচ্চুনো ধোক্ক্যেন তে ইস্রায়েলর রাজাগুনোর পধেন্দি চলিদো, কিত্তে তে আহাবর এক্কো ঝিরে লোইয়্যে। লগেপ্রভুর চোগেন্দি যিয়েন্ বজং তে সিয়েনই গুরিদো। 7 তো লগেপ্রভু দায়ূদোত্তে যে সুদোমান্ থিদেবর্ গোজ্যে সেনত্তে তা বংশবোরে তে ভস্ত গুরিবাত্তে ন-চেলঅ। তে দায়ূদ আর তার্ বংশধরুনোরে উমরত্তে এক্কো চেরাগ্ দিবো বিলিনে এগেম্ গোজ্যে। 8 যিহোরাম সময়োত্ ইদোম দেজর্ মানুচ্চুনে যিহূদার বিরুদ্ধে উল্লোমি গুরিনে নিজোত্তে এক্কো রাজা ঠিগ্ গুরি নেযেয়োন্। 9 সেনত্তে যিহোরামে তার্ সেনাপতিগুনোরে আর বেক্ রথ্তানিলোই সিদু গেলঅ। ইদোমীয়গুনে তারে আর তা রথ্তানর্ সেনাপতিগুনোরে ঘিরিলাক্, মাত্তর্ তে রেদো অক্তত্ উদিনে ঘিজ্যেগান্ ভাঙি নিগিলি গেলঅ। 10 ইদোমে এজঅ সং যিহূদার বিরুদ্ধে উল্লোমি ওই আঘে। যিহোরামে তা পূরোণি মানুচ্চুনোর গোজেন লগেপ্রভুরে ছাড়ি যেইয়্যে বিলিনে একই সময়োত্ লিব্নাও উল্লোমি গুরিলো। 11 তে যিহূদার মুড়োগুনো উগুরে পূজোর্ অজল্ জাগায়ান্ বানেল আর তাত্তে যিরূশালেম মানুচ্চুনে বানেয়্যে মূত্তি পূজোবোত্ নিজোরে দিলাক্ আর যিহূদার মানুচ্চুনে অন্য পধেদি গেলাক্। 12-13 সেক্কে যিহোরামে ভাববাদী এলিয় ইত্তুন্ এক্কান্ চিদি পেলঅ। সিয়েনত্ লেগা এলদে, “তর্ পূরোণিমানুচ্ দায়ূদোর গোজেন লগেপ্রভু কোইয়্যেদে, ‘তুই তর্ বাব্ যিহোশাফট বা যিহূদার রাজা আসার পধেদি ন-আদিজ্, মাত্তর্ ইস্রায়েল রাজাগুনোর্ পধেদি চোল্যজ্। তত্তেই আহাব বংশর মানুচ্চুনো ধোক্ক্যেন যিহূদা আর যিরূশালেম মানুচ্চুনে বানেয়্যে মূত্তি পূজিনে নিজোরে বিজি দুয়োন্। ইয়েনিবাদেয়ো তুই তর্ নিজো ভেইয়ূনোরে মারে ফেলেয়োচ্, যিগুনে এলাক্কে তর্ লো-য়েরা আর তত্তুন্অ বেশ্ গম্। 14 সেনত্তে লগেপ্রভু ইক্কিনে তঅ মানুচ্চুনোরে, তর্ পুয়োগুনোরে আর তর্ মোগ্কুনো উগুরে দর্গরেপারা আঘাত্ গুরিবো আর তর্ বেক্ সোম্বোত্তিগানি ভস্ত গুরিবো। 15 তুই নিজেয়ো পেদঅ অসুগোত্ ভুগিবে আর সে পিড়েগান্দোই তর্ আদুরিগান্ নিগিলি এবঅ।’ ” 16 লগেপ্রভু যিহোরাম বিরুদ্ধে পলেষ্টীয়গুনোরে আর কূশীয়গুনো ইদু বজত্তি গোজ্যে আরবীয়গুনো মনত্ শত্রুতাভাব্ জাগেই দিলো। 17 তারা যিহূদাগান আক্রমণ গুরিনে সিদু সুমিনে রাজঘরর্ বেক্ পযাপিরানি আর যিহোরাম পুয়োগুনোর আরি মোগ্কুনোরে নেযেল। তার্ চিগোন্ পুয়ো অহসিয় (যিহোয়াহস) বাদে আর কনঅ পুয়ো তাইদু ন-রলাক্। 18 এ পুরো ঘটনাগানির পরেন্দি লগেপ্রভু যিহোরামরে এন্ পেদঅ অসুগ্ দিলো যিয়েন্ গম্ গরা ন-যায়। 19 পরেন্দি দ্বিবজর শেজত্ সে পিড়েগানর্ কারনে তার্ আদুরিগান্ নিগিলি এলঅ আর তে অমকদ দুগ্ পেইনে মুরি গেলঅ। মানুচ্চুনে তার্ পূরোণি মানুচ্চুনোরে সর্মান দেগেবাত্তে যেধোক্ক্যেন আগুন্ জ্বালেদাক্ তা অক্তত্ সিয়েন্ ন-গুরিলাক্। 20 যিহোরামে বত্রিশ বজর্ বয়জত্ রাজা ওইয়্যে আর আস্তো বজর্ যিরূশালেমত্ রাজাগিরি গোজ্যে। তার্ মরাণার্ কারনে কনজনে আবিলেচ্ ন-খান্। দায়ূদ-শঅরত্ তারে গোর্ দিয়্যে ওইয়্যে মাত্তর্ রাজাগুনোর গোরানিত্ তারে গোর্ দিয়্যে ন-অয়। |
Copyright © 2021 Bangladesh Bible Society
Bangladesh Bible Society