২ বংশধর 2 - Chakma Bibleতবনা-ঘর বানেবার যুক্কোল্ 1 শলোমনে লগেপ্রভুর নাঙে এক্কান্ তবনা-ঘর আর নিজোত্তে এক্কান্ রাজঘর্ বানেবার্ উগুম্ দিলো। 2 তে সত্তুর্ আজার মান্জ্যরে বুদি বোবাত্তে, আশি আজার মান্জ্যরে মুড়োমুড়িত্ পাত্তর্ কাবিবাত্তে আর তিন আজার ছয়শ মান্জ্যরে তারার্ উদো লবাত্তে কামত্ লাগেল। 3 শলোমনে সোরর রাজা হীরমরে এ হবরান্ পাদেল, মঅ বাপ্পো দায়ূদে থেবাত্তে এক্কান্ রাজঘর বানেবাত্তে তুই যেধোক্ক্যেন্ তারে এরস গাজ্সোই পাদেয়োচ্ সেধোক্ক্যেন্ মত্তেয়ো এরস গাজ্ পাধেই দে। 4 ইক্কিনে মুই মর্ গোজেন লগেপ্রভুত্তে এক্কান্ ঘর্ বানেবাত্তে আর তার্ নাঙে সিয়েন্ উৎসর্ব গুরিবাত্তে যুক্কোল্ ওইয়োং, যেনে তা মুজুঙোত্ তুম্বাজ্-আগর্বাট্টি জ্বালা যায়, সুদোম মজিম্ মুজুঙো-রুটি সাজেইনে রাগা যায় আর পত্তিদিন বেন্যে আর সাজোন্যে, জিরেবার্ দিনোত্, আঙোস্যেত্ আর আমা গোজেন লগেপ্রভু ঠিগ্-গোজ্যে নানান্ পরবর্ অক্তত্ পূজ্যে-উৎসর্বর অনুষ্ঠানুন্ গরা যায়। ইগুন্ বেক্কুন্ পালানা ইস্রায়েলীয়গুনোত্তে এক্কান্ উমরর্ সুদোম। 5 যে ঘরান্ মুই বানেবাত্তে যাঙর্ সিয়েন্ অবদে মহৎ, কিত্যে আমা গোজেনে বেক্ দেবেদাগুনোত্তুন্ দাঙর্। 6 মাত্তর্ তাত্তেই ঘর্ বানেবাত্তে কন্না পারে? কিত্যে আগাজত্, এমন্ কি স্বর্গত্ তার্ জাগায়ান্ নকুলেয়্যে অয়। বানা তা মুজুঙোত্ নানান্ উৎসর্বর পযাপিরানি পড়িবার জাগায়ান্ বাদে মুই আর কেধোক্ক্যেন গুরি তাত্তেই এক্কান্ ঘর্ বানেই পারং? 7 “মঅ বাপ্পো দায়ূদে কাবিল্ কালিগরুনোরে ঠিগ্ গুরি রাগেয়্যে যিগুনে ইক্কিনে যিহূদা আর যিরূশালেমত্ মইদু আগন্। তারার্ লগে কাম্ গুরিবাত্তে তুই মরে এন্ এক্কো কাবিল্ কালিগর পাধেই দে যে সোনা-রূবো, পিদোল আর লুয়োর্ কামানি, বিগুনো রঙর্, রাঙা আর য়েল্ রঙর্ সুদোর্ কামানি আর কাবিনে লেগেদে কামানি গুরি জানে। 8-9 ইয়েনিবাদে তুই এরস, বেরস, আল্গুম নাঙে লেবাননর এ তুম্বাজ্ তক্তানি পাধেই দিবে, কিত্যে মুই হবর্ পাঙ্ তঅ মানুচ্চুনে সিদুগো গাজ্ছুন্ কাবিবার কামত্ কাবিল্। মঅ মানুচ্চুনে তঅ মানুচ্চুনো লগে কাম্ গুরিবাক্ যেনে তারা মরে ভালোক্কুন্ গাজ যুগেই দি পারন্, কিত্তে যে ঘরান মুই বানেবাত্তে যাঙর্ সিয়েন্ অবদে জদবদে দাঙর্ আর ভারী দোল্। 10 মুই তঅ মানুচ্চুনোরে, অত্তাৎ যে গাজ্ কাবিয়্যেগুনে গাজ্ কাবিবাক্ তারার্ তিন আজার ছয়শ টন মাজ্যে গম, তিন আজার ছয়শ টন মোক্ক্যে, চের্ লাখ্ চেরশ লিটার আংগুর-রস আর চের্ লাখ্ চেরশঅ লিটার জলপাইয়র তেল দিম।” 11 সোরর রাজা হীরমে জোবত্ শলোমনরে এ চিদিগান লিগিনে পাদেল, “লগেপ্রভু তা মানুচ্চুনোরে কোচ্পেদঅ বিলিনেই তরে তারার্ রাজা বানেয়্যে।” 12 হীরমে আরঅ লিগিলো, ইস্রায়েলর গোজেন লগেপ্রভু ধন্য, যিবে আগাজ্ আর পিত্থিমীগানরে বানেয়্যে। তে রাজা দায়ূদোরে এন্ এক্কো জ্ঞানী পুয়ো দিয়্যে যিবের্ বুদ্ধি আর বুঝিবার খেমতা আঘে আর যিবে লগেপ্রভুত্তে এক্কান্ ঘর্ আর নিজোত্তে এক্কান রাজঘর বানেব। 13 মুই তইদু হীরাম নাঙে এক্কো খুব্ কাবিল্ আর বুদ্ধিবলা কালিগররে পাদেলুঙ্। 14 তা মাবো দান-গুট্টির মিলে আর তা বাপ্পো সোরর মানুচ্। তে সোনা-রূবো, পিদোল্, লুয়ো, পাত্তর্, গাজ্ আর বিগুনি, য়েল্ আর রাঙা রঙর্ সুদো আর মসীনা সুদোর্ কামানি গুরিবাত্তে জানে। নানান্ বাবোত্তে কাবি কাবাই লেগেদে কামত্ তে কাবিল্ আর যে কনঅ আরুক্ দিলে তে সিয়েনি গুরি পারে। তে তমা কালিগরুনো লগে আর মঅ গিরোজ্, তঅ বাব দায়ূদো কালিগরুনো লগে কাম্ গুরিবো। 15 “সেনত্তে মর্ প্রভু তুই যেধোক্ক্যেন কোইয়োচ্ সেধোক্ক্যেন্ গুরিনে গম্, মোক্ক্যে, জলপাইয় তেল্ আর আংগুর-রস আমা ইদু পাধেই দিবে। 16 আমি লেবাননত্তুন্ তর্ দরকার মজিম্ বেক্ গাজ্ছুন কাবিনে একলগে বানিনে বড়্ সাগরত্ ভাজেইনে যাফো সং নেযেবং। সে পরেন্দি তুই সিগুন্ যিরূশালেমত্ তুলি নেযেবে।” 17 শলোমনে তা বাপ্পো দায়ূদো মানুচ্ গণেদে ধোক্ক্যেন্ ইস্রায়েলত্ বজত্তিগুরিয়্যে বেক্ বিদেশীগুনোরে গুণিলো। সেক্কে তারা অলাক্ বেক্কুনে এক লাখ্ তিপ্পান্ন আজার ছয়শঅ জন। 18 তারা ভিদিরেত্তুন্ তে সত্তুর্ আজার মান্জ্যরে পযাপিরা বুয়োবাত্তে আর সে মানুচ্চুনোর কামানি চেইচিদিবাত্তে তিন আজার ছয়শ মান্জ্যরে নেযেলাক্। |
Copyright © 2021 Bangladesh Bible Society
Bangladesh Bible Society