২ বংশধর 19 - Chakma Bible

¹ যিহূদার রাজা যিহোশাফটে যিরূশালেমত্‌ তার রাজঘরত্‌ গমেডালে ফিরি এলঅ।

² সেক্কে হনানির পুয়ো দর্শক যেহূ নিগিলিনে তাইদু যেইনে কলঅ, “পাজিগুনোরে বল্‌ দেনা আর যিগুনে লগেপ্রভুরে ঘিনান্‌ তারারে কোচ্‌পানা কি তর্‌ উজিত্‌ ওইয়্যে? ইয়েনত্তে লগেপ্রভুর রাগ্‌কান্‌ তঅ উগুরে লামি এচ্ছ্যে।

³ মাত্তর্‌ তঅ ভিদিরে কিজু গম্‌অ আঘে, কিত্তে তুই দেজর্‌ আশেরা-খুদোগুন্‌ ভস্ত গুরি দুয়োচ্ আর গোজেন আওজ্‌ মজিম্‌ চলিবাত্তে তঅ মনান্‌ ঠিগ্‌ গোজ্যস্‌।”

বিচেরগ্‌ নেযানা

⁴ যিহোশাফটে যিরূশালেমত্‌ বজত্তি গুরিদো। তে বের্‌-শেবাত্তুন্‌ আরাম্ভ গুরিনে ইফ্রয়িম মুড়োমুড়ি চাগালা সং মানুচ্চুনো ইদু যেইনে তারার্‌ পূরোণি মানুচ্চুনোর্‌ গোজেন লগেপ্রভু ইন্দি আরঅ তারার্‌ মনান্‌ ফিরেই আনিলো।

⁵ তে দেজ ভিদিরে, অত্তাৎ যিহূদার পত্তি দেবাল-ঘিজ্যে আদাম আর শঅরত্‌ বিচেরগ্‌কুনোরে নেযেল।

⁶ তে বিচেরগ্‌কুনোরে কলঅ, “তুমি উজিয়ার্‌ ওইনে বেক্‌ কামানি গুরিবা, কিত্তে তুমি কনঅ মান্‌জ্যত্তে নয় বরং লগেপ্রভুত্তে বিচের্‌ গুরিবা। বিচেরর্‌ রায় দিবার্‌ অক্তত্‌ তে তমা লগে থেবঅ।

⁷ লগেপ্রভু উগুরে দরর্‌ ভাব্‌ তমা ইদু থোক্‌। উজিয়ারে বিচের্‌ গুরিবা, কিয়া অবিচের্‌, একচোখ্যে বিচের্‌ বা ঘুষ হেইয়্যেগুনোর্‌ লগে আমা গোজেন্‌ লগেপ্রভুর কনঅ মিজেমিজি নেই।”

^8-9 যিহোশাফটে যিরূশালেমত্‌অ লগেপ্রভুর ওইনে বিচের রায় দিবাত্তে আর কোল্‌-কোজ্যে ভাঙি দিবাত্তে কয়েক্কো লেবীয়, ধর্মগুরু আর ইস্রায়েলীয় বংশর নেতারে নেযেল। রাজা আর তা মানুচ্চুনে যিরূশালেমত্‌ ফিরি এজানার পরেন্দি তার্‌ নেযেয়্যে বিচেরগ্‌কুনোরে তে এ উগুমান দিলো, তুমি লগেপ্রভুরে দোরেইনে বিশ্বেজর্‌ সহিত আর বেক্‌ মনান্দোই কাম্‌ গুরিবা।

¹⁰ নানান্‌ আদামত্‌ আর শঅরত্‌ বজত্তিগুরিয়্যে তমা মানুচ্চুনো ইত্তুন্‌ যে কনঅ মামলা এদঅ সাৎ-সিয়েন্‌ লো ঝড়েদে ধোক্ক্যেন ওক্‌ বা রীদি-সুদোম, উগুম, সুদোম বা হুকুমোর্‌ বেপার ওক্‌-তুমি তারারে উজিয়ার গুরি দিবা যেনে তারা লগেপ্রভুর চোগেন্দি দুষী ন-অন্‌। সিয়েন্‌ ন-অলে তমারে আর তমা মানুচ্চুনো উগুরে লগেপ্রভুর রাগ্‌কান লামি এবঅ। তুমি এধোক্ক্যেন গুরিনে কাম্‌ গরঅ, সালে তুমি দুষি ন-অবা।

¹¹ “লগেপ্রভুর বেক্কানি পৌইদ্যেনে আজল্‌ ধর্মগুরু অমরিয় আর রাজার বেক্কানি পৌইদ্যেনে যিহূদা-গুট্টির নেতা ইশ্মায়েলর পুয়ো সবদিয় তমা উগুরে নেযা অলঅ, আর লেবীয়গুনে তমারে বল্‌ দিবাক্‌। তুমি সাহস গুরিনে কাম্‌ গরঅ। যিগুনে গমেডালে কাম্‌ গুরিবা লগেপ্রভু তারারে লগে থেবঅ।”