২ বংশধর 17 - Chakma Bibleযিহূদার রাজা যিহোশাফট 1 আসার জাগানত্ তার্ পুয়ো যিহোশাফটে রাজা অলঅ। তে ইস্রায়েল বিরুদ্ধে নিজোরে দরমর গুরিনে তুলিলো। 2 যিহূদার বেক্ দেবাল্-ঘিজ্যে শঅর্ আর আদামানিত্ তে সৈন্যদল রাগেল আর যিহূদা দেজত্ আর তা বাবর্ গজক্ গোজ্যে ইফ্রয়িম চাগালার আদাম আর্ শঅরানিত্অ সৈন্য রাগেল। 3-4 লগেপ্রভু যিহোশাফট লগে এলঅ, কিত্তে তার্ পূরোণিমানুচ্ দায়ূদে পত্তমে যেধোক্ক্যেন গুরি চলিদো তেয়ো সেধোক্ক্যেন গুরিনে চলিদো। তে বাল দেবেদাগুনোরে পূজো ন-গুরিনে বরং তার্ পূরোণি মানুচ্চুনোর্ গোজেনরে তবনা গুরিদো আর ইস্রায়েল ধোক্ক্যেন কাম্ ন-গুরিনে গোজেন উগুম মজিম্ চলিদো। 5 সেনত্তেই লগেপ্রভু তা অধীনোত্ রেজ্যগানি ঠিগ্ রাগেল। যিহূদার বেক্ মানুচ্চুন্ যিহোশাফটরে বক্শিজ্ দিলাক্; সেক্কে তার্ বোউত্ ধন-সম্পদ আর সর্মান বাড়িলো। 6 লগেপ্রভুর পধেন্দি চলিবাত্তে তার্ খুব্ আওজ্ এলঅ। সিয়েন্ বাদেয়ো তে যিহূদা দেজত্তুন্ পূজোর্ অজল্ জাগায়ানি আর আশেরা-খুদোগুন্ ভস্ত গুরি দিলো। 7 তার্ রাজাগিরির তিন বজরত্ তে যিহূদার বেক্ আদামানি আর শঅর মানুচ্চুনোরে শিক্ষ্যে দিবাত্তে তার্ কামগুরিয়্যে বিন্-হয়িল, ওবদিয়, সখরিয়, নথনেল আর মীখায়রে পাধেই দিলো। 8 তারার্ লগে এলদে শময়িয়, নথনিয়, সবদিয়, অসাহেল, শমীরামোৎ, যিহোনাথন, অদোনিয়, টোবিয় আর টোব্-অদোনীয় নাঙে কয়েক্কো লেবীয় আর ইলীশামা আর যিহোরাম নাঙে দ্বিবে ধর্মগুরু। 9 লগেপ্রভুর রীদি-সুদোমর্ বোইবো লগে নেযেইনে তারা যিহূদা দেজর বেক্ জাগানিত্ সিয়েনি শিক্ষ্যে দিলাক্। 10 যিহূদা দেজর্ কায়-কুরে বেক্ রেজ্যগানি উগুরে লগেপ্রভুর ইত্তুন্ এন্ দর্ গরেদে ধোক্ক্যেন লামি এলদে, তারা যিহোশাফট লগে যুদ্ধো ন-গুরিলাক্। 11 কয়েক্কো পলেষ্টীয় কর্ ইজেবে যিহোশাফট ইদু বক্শিজ্ আর রূবো লোই এলাক্ আর আরবীয়গুনে লোই এলাক্ সাত আজার সাতশঅ ভেড়া আর সাত আজার সাতশঅ ছাগল। 12 এধোক্ক্যেন গুরিনে যিহোশাফটে আরঅ খেমতাবলা ওইনে উদো ধুরিলো। তে যিহূদা দেজত্ কয়েক্কান্ তাম্বুল আর ভান্ডাল-শঅর্ বানেল। 13 তে যিহূদার শঅরানিত্ বোউত্ পযাপিরা থুবেল আর যিরূশালেমত্ কাবিল যুদ্ধোগুরিয়্যেগুনোরে রাগেল। 14 বংশ মজিম তারা আর সেনাপতিগুনোর নাঙানি ইয়েনি: যিহূদা-গুট্টিত্তুন্-আজল্ সেনাপতিবো অদ্ন আর তার্ তিন লাখ্ যুদ্ধোগুরিয়্যে; 15 দ্বিলম্বর সেনাপতি যিহোহানন আর তার্ দ্বিলাখ্ আশি আজার যুদ্ধোগুরিয়্যে; 16 তিন লম্বর সেনাপতি সিখ্রির পুয়ো অমসিয় আর তার্ দ্বিলাখ্ যুদ্ধোগুরিয়্যে। অমসিয় লগেপ্রভুর কামত্ নিজোরে উৎসর্ব গুরিলো। 17 বিন্যামীন-গুট্টিত্তুন্-নাঙ-গোজ্যে বীর আজল্ সেনাপতিবো ইলিয়াদা আর তার্ ধনুবলা আর ঢালবলা দ্বিলাখ্ যুদ্ধোগুরিয়্যে; 18 দ্বিলম্বর সেনাপতি যিহোষাবদ আর তার্ এক লাখ্ আশি আজার কাবিল যুদ্ধোগুরিয়্যে। 19 এ যুদ্ধোগুরিয়্যেগুনে রাজার কামত্ নিযুক্ত এলাক্। ইগুন বাদেয়ো যিহূদার দেবাল-ঘিজ্যে আদাম আর শঅরানিত্ আরঅ সৈন্য রাগা ওইয়্যে। |
Copyright © 2021 Bangladesh Bible Society
Bangladesh Bible Society