২ বংশধর 16 - Chakma Bibleআসার শেজর্ জীংকানিগান্ 1 আসার রাজাগিরির ছত্রিশ বজরত্ ইস্রায়েলর রাজা বাশা যিহূদার মানুচ্চুনোর বিরুদ্ধে যেইনে রামা শঅরান্ তাম্বুলো ধোক্ক্যেন তুলো ধুরিলো যেনে কনজনে যিহূদার রাজা আসার ইদু এঈ-যেই ন-পারন্। 2 সেক্কে আসা লগেপ্রভুর ঘর আর তার্ নিজোর্ রাজঘরর্ ভান্ডালত্তুন্ সোনা আর রূবো নিগিলেনে অরাম দেজর রাজা বিন্হদদ ইদু পাধেই দিলো। বিন্হদদ দামেস্ক শঅরত্ বজত্তি গুরিদো। আসা তারে কোই পাদেল, 3 “মঅ বাপ্পো আর তঅ বাপ্পো ধোক্ক্যেন আয়, আমিয়ো আমা ভিদিরে এক্কো চুক্তি গুরিই। মুই তরে বেক্ সোনা আর রূবোনি বক্শিজ্ পাদেলুং। তুই ইস্রায়েলর রাজা বাশার লগে ইক্কিনে চুক্তি ভাঙি ফেলা, সেক্কে তে মত্তুন্ যেবগোই।” 4 রাজা আসার কধালোই রাজী ওইনে বিন্হদদে ইস্রায়েলর আদাম আর শঅরানি বিরুদ্ধে তার্ সেনাপতিগুনোরে পাধেই দিলো। তারা ইয়োন, দান, আবেল-ময়িম আর নপ্তালির বেক্ ভান্ডাল-শঅরানি গজক্ গুরি নেযেলাক্। 5 বাশা এ কধাগান শুনিনে রামা শঅরান্ দরমর গুরিনে তুলিবাত্তে কাম্ বন্ধ গুরি দিলো। 6 সেক্কে রাজা আসা যিহূদার বেক্ মানুচ্চুনোরে আনিনে বাশা যিদুক্কুন্ পাত্তর্ আর গাজ্ বেবহার গোজ্যে সিগুন্ রামাত্তুন্ নেযেল। সিগুন্দোই তে গেবা আর মিস্পা আদামান্ তাম্বুলো ধোক্ক্যেন বানেল। 7 সে সময়োত্ দর্শক হনানি এইনে যিহূদার রাজা আসারে কলঅ, “তঅ গোজেন লগেপ্রভু উগুরে বিশ্বেজ্ ন-গুরিনে তুই অরামর রাজা উগুরে বিশ্বেজ্ গোজ্যজ্ বিলিনে অরামর রাজার সৈন্যদলুন্ তর্ আঢ্ছাড়া ওই গেলাক্। 8 কূশীয় আর লূবীয়গুনোর কি ভালোক্কানি রথ আর ঘোড়াবাহিনী সুদ্ধো এক্কো দাঙর্ সৈন্যদল ন-এলঅ? মাত্তর্ তুই লগেপ্রভুর উগুরে বিশ্বেজ্ গোজ্যজ্ বিলিনে তে তঅ আঢত্ তারারে তুলি দিয়্যে। 9 যিগুনোর্ মনান্ লগেপ্রভু উগুরে ভোক্তিলোই পরিপূরোণ্ থায় তারারে রোক্ষ্যে গুরিবাত্তে তা চোগ্কুন্ পিত্থিমীর বেক্ জাগাইদু থায়। তুই ভুল্মান্জ্যর কাম্ গোজ্যজ্। ইক্কিনেত্তুন্ ধুরি তুই বারবার যুদ্ধোত্ থাহ্ পুরিবো।” 10 এ কধাগান শুনিনে আসা সে দর্শক উগুরে অমকদ রাগ্ গুরিনে তারে জেল্খানাত্ পাধেই দিলো। একই সময়োত্ আসা কয়েক্কো মান্জ্য উগুরে অত্যেচার্ গুরিলো। 11 আসার অন্য কামর্ কধানি পৌইল্যাত্তুন্ ধুরিনে থুম্ সং “যিহূদা আর ইস্রায়েলর রাজাগুনোর বিজগ” নাঙে বোইবোত্ লেগা আঘে। 12 আসার রাজাগিরির্ ঊনচোল্লিশ বজরত্ তা টেঙত্ এক্কান্ পিড়ে অলঅ। তার্ এ পিড়েগান্ অমকদ বেশ্ অলেয়ো তে লগেপ্রভুর বল্ ন-চেইনে বানা ডাক্তর সাহায্য নেযেল। 13 পরেন্দি তার্ রাজাগিরির একচোল্লিশ বজরত্ তে তার্ পূরোণি মানুচ্চুনো ইদু গেলগোই। 14 নানান বাবোত্যে মজলা আর মিজেয়্যে তুম্বাজ্ জিনিজ্সোই ভোজ্যে খাট্তানত্ মানুচ্চুনে তারে পোড়েলাক্ আর দায়ূদ-শঅরত্ তে নিজোত্তে যে গোরান্ ঠিগ্ গুরি রাগেয়্যে তারা সিয়েনত্ তারে গোর্ দিলাক্। মানুচ্চুনে তার্ সর্মানত্তে বড়্ এক্কান্ আগুন জ্বালেলাক্। |
Copyright © 2021 Bangladesh Bible Society
Bangladesh Bible Society