২ বংশধর 15 - Chakma Bibleআসার নানান্ বাবোত্যে কাম্ 1 গোজেন আত্মাগান ওদেদর পুয়ো অসরিয় উগুরে এলঅ। 2 সেক্কে অসরিয় আসার লগে দেগা গুরিবাত্তে যেইনে কলঅ, “ও আসা, ও যিহূদা আর বিন্যামীনর বেক্ মানুচ্চুন্, মঅ কধাগান শুনো। তুমি যেদকদিন লগেপ্রভুর লগে থেবা সেদকদিন তেয়ো তমা লগে থেবঅ। তা আওজ্চান্ জানিবাত্তে চেলে তুমি সিয়েন্ জানি পারিবা, মাত্তর্ তারে যুনি ছাড়ি যঅ সালে তেয়ো তমারে ছাড়ি যেবঅ। 3 ইস্রায়েলীয়গুনে ভালোক্ দিন ধুরিনে সত্য গোজেন বাদে, শিক্ষ্যে দিবাত্তে ধর্মগুরু বাদে আর রীদি-সুদোম বাদে চলদন্। 4 মাত্তর্ তারার্ দুঘোর্ দিনোত্ তারা ইস্রায়েলর গোজেন লগেপ্রভুর ইন্দি ফিরিনে তা আওজ্চান্ জানিবাত্তে চেইয়োন্ আর সিয়েন্ জানিয়ো পাজ্যন্। 5 সে দিনুনোত্ কনঅ জাগাত্ যানা-এযানা গরানা নিরাপদ ন-এলঅ, কিত্তে পুরো চাগালার্ মানুচ্চুনে সেক্কে খুব্ অশান্ত অবস্থায় এলাক্। 6 এক্কো জাদে আর এক্কো জাদরে, এক্কান্ শঅরর্ মান্জ্যে অন্য শঅরর্ মান্জ্যরে নাশ গুরিবার চেট্ট্যা গুরিদাক্, কিত্তে নানা বাবোত্যে কুমংগল দিইনে গোজেনে তারারে দুঘ্ দিয়্যে। 7 মাত্তর্ তুমি দরমর অ, নিরাজ্ ন-অবা, কিত্তে তমা কামর্ বক্শিজ্ তুমি পেবা।” 8 আসা বেক্ কধানি শুনিনে, অত্তাৎ ওদেদর পুয়ো ভাববাদী অসরিয়য় ভবিচ্চদর্ কধানি শুনিনে সাহস পেলঅ। তে যিহূদা আর বিন্যামীনর পুরো চাগালাত্তুন্ আর তার্ গজক্ গোজ্যে ইফ্রয়িমর মুড়োমুড়ি চাগালার আদাম আর শঅরানিত্তুন্ জঘন্য বানেয়্যে মূত্তিগুন্ ভস্ত গুরি দিলো। তে লগেপ্রভুর ঘরর্ আস্ছালা মুজুঙোত্ রাগেয়্যে লগেপ্রভুর ঢালিঘরান্ ঠিগ্ গুরিলো। 9 সে পরেন্দি তে যিহূদা আর বিন্যামীনর বেক্ মানুচ্চুনোরে আর ইফ্রয়িম, মনঃশি আর শিমিয়োন চাগালার যিদুক্কুন্ মান্জ্যে তারা ভিদিরে বজত্তি গত্তন্ তারারে এক লগে এগত্তর্ গুরিলো। আসার গোজেন লগেপ্রভু তা লগে আগে দেগিনে ইস্রায়েলর বোউত্ মান্জ্যে তা পক্ষ নিইনে তাইদু এলাক্। 10 আসার রাজাগিরির পনর বজরর্ তিন মাজত্ এ মানুচ্চুনে যিরূশালেমত্ এইনে এগত্তর্ ওইয়োন। 11 তারা যিয়েনি লুদেইনে আন্যন্ সিয়েনি ভিদিরেত্তুন্ সে অক্তত্ তারা সাতশঅ গোরু আর সাত আজার ভেড়া লগেপ্রভুর নাঙে উৎসর্ব গুরিলাক্। 12 তারা এ এগেমান্ গুরিলাক্, তারা পুরো মন্-পরাণ দিইনে তারার্ পূরোণি মানুচ্চুনোর গোজেন লগেপ্রভুর আওজ্ মজিম্ চলিবাক্; 13 চিগোন্-দাঙর্, মিলে-মরদ যে অদঅ সাৎ যিগুনে ইস্রায়েলর গোজেন লগেপ্রভুর আওজ্ মজিম্ ন-চলিবাক্ তারারে মারে ফেলা অবঅ। 14 তারা হুজিয়ে রঅ ছাড়িনে আর তূরী আর শিংগা বাজেইনে লগেপ্রভু ইদু দাঙর্ দাঙর্ রঅ গুরিনে শমক্ খেলাক্। 15 এ শমক্কান্দোই যিহূদা দেজর বেক্ মানুচ্চুনে ফুত্তি গুরিলাক্, কিয়া পুরো মনান্ দিইনে তারা সে শমক্কান্ গুরিলাক্। তারা গোজেনর আওজ্চান্ জানিবাত্তে চেইয়োন বিলিনে সিয়েন্ বুঝি পাজ্যন্। সেনত্তে লগেপ্রভু চেরোকিত্তেত্তুন্ তারারে সুগ-শান্তি দিয়্যে। 16 রাজা আসা তার্ বরঙা মাখারে রাজমাতার পদ্থানত্তুন্ সোরেই দিলো, কিত্তে তে এক্কো জঘন্য আশেরা-মূত্তি বানেয়্যে। আসা সিবে কাবি ফেলেইনে, ভাঙিনে কিদ্রোণ কিজিঙোত্ নেযেইনে পুড়ি দিলো। 17 যুনিয়ো পূজোর্ অজল্ জাগায়ানি তে ইস্রায়েলত্তুন্ ভস্ত ন-গরে তো জিংকানিবর্ তা মনান্ লগেপ্রভু উগুরে ভোক্তিলোই পরিপূরোণ এলঅ। 18 তে আর তা বাবে যেদক্কানি সোনা-রূবো আর অন্য জিনিস গোজেন নাঙে যুদো গুরি রাগেয়োন্ সিয়েনি তে গোজেন ঘরত্ নেযেল। 19 আসার রাজাগিরির্ পাত্রিশ বজর সং আর কনঅ যুদ্ধো ন-অয়। |
Copyright © 2021 Bangladesh Bible Society
Bangladesh Bible Society