২ বংশধর 14 - Chakma Bibleযিহূদার রাজা আসা 1 পরেন্দি অবিয় তার্ পূরোণি মানুচ্চুনো ইদু গেলগোই আর তারে দায়ূদ-শঅরত্ গোর্ দিয়্যে অলঅ। তা জাগানত্ তার্ পুয়ো আসা রাজা অলঅ। আসার সময়োত্ দশ বজর সং দেজত্ সুঘ্-শান্দি এলঅ। 2 আসা তার্ গোজেন লগেপ্রভুর চোগোত্ যিয়েনি গম্ আর ঠিগ্ সিয়েনিই গুরিদো। 3 তে দেব-দেবেদার ঢালিঘরানি আর পূজোর অজল্ জাগায়ানি ভস্ত গুরিলো আর পূজো পাত্তরুন্ কট্টা কট্টা গুরিলো আর আশেরা-খুদোগুন্ কাবি ফেলেল। 4 তে যিহূদার মানুচ্চুনোরে তারার্ পূরোণি মানুচ্চুনোর গোজেন লগেপ্রভুর আওজ্ মজিম্ চলিবাত্তে আর তার্ রীদি-সুদোমানি আহ্ উগুমানি পালেবাত্তে কলঅ। 5 তে যিহূদা দেজর্ পত্তি আদাম আর শঅরর্ পূজোর্ অজল্ জাগায়ানি আর আগর্বাট্টি-ঢালিঘরানি ভস্ত গুরিলো। তা অধীনোত্ রেজ্যত্ সুগ-শান্দি এলঅ। 6 দেজত্ সুগ্-শান্দি এলঅ বিলিনে তে কয়েক্কান্ আদাম দেবাল্লোই ঘিরিনে দরমর গুরিলো। সে বজরুনোত্ কনজনে আসার লগে যুদ্ধো ন-গরে, কিত্তে গোজেনে তারে সুগে-শান্দিয়্যে থেবাত্তে দিয়্যে। 7 তে যিহূদার মানুচ্চুনোরে কোইয়্যেদে, “এজঅ, আমি এ আদামানির চেরোকিত্তে দেবাল্ বানেইনে সিয়েন্দোই অজল্-ঘর, গেট্ আর খিল্লোই সিয়েনি দরমর গুরিই। দেজ্ছান্ এজঅ আমা আঢত্ আঘে, কিত্তে আমি আমার্ গোজেন লগেপ্রভুর আওজ্ মজিম্ চলির্; সেনত্তে তে বেক্কানিন্দি আমারে সুগ্-শান্দি দিয়্যে।” এধোক্ক্যেন গুরিনে তারা বেক্ কামানি গমেডালে থুম্ গুরিলাক্। 8 যিহূদা-গুট্টির চাগালাত্ রাজা আসার দাঙর্ ঢাল আর সেল্বলা তিন লাখ্ সৈন্য এলাক্, আর বিন্যামীন-গুট্টির চাগালাত্ এলাক্ ঢাল আর ধনুবলা দ্বিলাখ্ আশি আজার সৈন্য। ইগুনে বেক্কুনে এলাক্ বোলী যোদ্ধা। 9 পরেন্দি কূশ দেজর্ সেরহ দশ লাখ্ সৈন্য আর তিনশ রথ লোইনে যিহূদার মানুচ্চুনো বিরুদ্ধে নিগিলিনে মারেশা সং উজেই গেলঅ। 10 সেক্কে আসা তা বিরুদ্ধে নিগিলিলো আর দ্বিবে দলে মারেশার ইদু সফাথা কিজিঙোত্ যুদ্ধোত্তে যুক্কোল্ অলাক্। 11 সেক্কে আসা তার্ গোজেন লগেপ্রভুরে ডাগিনে কলঅ, “ও লগেপ্রভু, তুই যেধোক্ক্যেন বোলী মানুচ্চুনোরে বল্ দি থাচ্ সেধোক্ক্যেন দঅ বল্নেইয়্যে মানুচ্চুনোরেয়ো বল্ দি পারচ্। সেনত্তেই ও আমা গোজেন্ লগেপ্রভু, আমারে বল্ দে, কিত্তে আমি তঅ উগুরে বিশ্বেজ্ গুরিই আর তর্ নাঙে আমি এ দাঙর্ সৈন্যদল বিরুদ্ধে এচ্ছ্যেই। ও লগেপ্রভু, তুয়ই আমার্ গোজেন, মানুচ্চুনোরে তর্ বিরুদ্ধে জিদিবাত্তে ন-দিস্।” 12 সেক্কে আসা আর যিহূদার মানুচ্চুনো মুজুঙেত্তুন্ লগেপ্রভু কূশীয়গুনোরে ওদেই দিলো। সেক্কে কূশীয়গুনে ধেই গেলাক্। 13 আসা আর তার্ সৈন্যদলুনে গরার সং তারারে লোড়েইনে নেযেলাক্। এদক্ বেশ্ কূশীয় মারা পড়িলাক্, তারা আর দরমর ওইনে উদি ন-পারিলাক্। তারা লগেপ্রভু আর তার্ সৈন্যদলর মুজুঙোত্ শেজ্ ওই গেলাক্। যিহূদার মানুচ্চুনে ভালোক্কানি লুদেয়্যে পযাপিরা আনিলাক্। 14 তারা গরারর চেরোকিত্তে বেক্ আদামানি ভস্ত গুরি দি পাজ্যন্, কিত্তে সিদুগোর মানুচ্চুনে লগেপ্রভুরে অমকদ দোরেয়োন্। সিদু লুট গরেদে ধোক্ক্যেন বোউত্ পযাপিরা এলঅ বিলিনে তারা বেক্ আদামানি লুদেয়োন্। 15 তারা য়েমান চোরেইয়্যেগুনোর্ তাম্বুলানিয়ো আক্রমণ গুরিনে পাল্ পাল্ ভেড়া ছাগল, ছাগল আর উট লোই এচ্ছোন্। সে পরেন্দি তারা যিরূশালেমত্ ফিরি গেলাক্। |
Copyright © 2021 Bangladesh Bible Society
Bangladesh Bible Society