২ বংশধর 13 - Chakma Bibleযিহূদার রাজা অবিয় (অবিয়াম) 1 যারবিয়ামর রাজাগিরির আদার বজরত্ অবিয় যিহূদার রাজা অলঅ। 2 তে যিরূশালেমত্ তিন বজর সং রাজাগিরি গোজ্যে। তা মাবো নাঙান্ এলদে মাখা; তে অলদে গিবিয়ার ঊরীয়েল ঝি। অবিয় আর যারবিয়াম লগে যুদ্ধো ওইয়্যে। 3 অবিয় চের্ লাখ্ বেঈ-লোইয়্যে বীর যোদ্ধার্ এক্কো দল্লোই যুদ্ধো গুরিবাত্তে গেলঅ আর যারবিয়ামে আস্তো লাখ্ বেঈ-লোইয়্যে বীর যোদ্ধালোই তা বিরুদ্ধে যুদ্বোত্তে সুর্ বানিলাক্। 4 অবিয় ইফ্রয়িম মুড়ো-মুড়ি চাগালা ভিদিরে সমারয়িম মুড়োবো উগুরে থিয়্যেইনে কলঅ, যারবিয়াম আর ইস্রায়েলর বেক্ মানুচ্চুনে, মঅ কধাগান শুনো। 5 তুমি কি হবর্ পঅ, ইস্রায়েলর গোজেন লগেপ্রভু উমরত্তে ন-বোদোল্যে সুদোমর্ মাধ্যমে দায়ূদ আর তার্ বংশর মানুচ্চুনো ইদু উমরত্তেই ইস্রায়েলর রাজপদ্তানি দিয়্যে? 6 তো দায়ূদোর পুয়ো শলোমনর্ কামগুরিয়্যে নবাটর পুয়ো যারবিয়ামে তা গিরোজ্সো বিরুদ্ধে উল্লোমি গুরিলো। 7 কয়েক্কো অপদাত্ত আর পাজি মানুচ্ যারবিয়ামর চেরোকিত্তে এগত্তর্ ওইনে শলোমন পুয়ো রহবিয়াম বিরুদ্ধে থিয়্যেলাক্। সে অক্তত্ রহবিয়ামে এলদে গাবুজ্যে আর তার্ অভিজ্ঞতা এলদে কম; তারারে মানা গরেদে ধোক্ক্যেন যোগাজ্যে বল্ তার্ ন-এলঅ। 8 ইক্কিনে দায়ূদো বংশধরুনো আঢত্ লগেপ্রভুর যে রেজ্যগান্ রোইয়্যে তুমি তা বিরুদ্ধে থিয়্যেবাত্তে চর্। ঘেচ্ছ্যেক্গুরি তুমি দাঙর্ একদল সৈন্যলোই আর তমা ভিদিরে রোইয়্যেদে সে সোনার গোরুছগুনোর্ মূত্তিগুন্ যিগুনে তমার্ দেবেদা অবাত্তে যারবিয়ামে বানেয়্যে। 9 তুমি দঅ লগেপ্রভুর ধর্মগুরুগুনোর্, অত্তাৎ হারোণ পুয়োগুনোর্ আর লেবীয়গুনোরে ধাবেই দুয়ো আর অন্য দেজর্ জাদ্তুনো ধোক্ক্যেন নিজোত্তে ধর্মগুরুগুনোরে নেযেয়ো। ধর্মগুরু ইজেবে নিজোরে যুদো গুরিবাত্তে যে কনজনে এক্কো বলদ গোরু আর সাত্তো ভেড়া ছাগল আনে তেয়ই সে বেক্ দেবেদাগুনোর্ ধর্মগুরু ওই পারে যিগুনে গোজেন নয়। 10 “মাত্তর্ আমি সেধোক্ক্যেন নয়, লগেপ্রভু আমার গোজেন। আমি তারে ছাড়ি ন-যেই। যে ধর্মগুরুগুনে লগেপ্রভুরে সেবা গরন্ তারা হারোণ বংশর মানুচ্, আর লেবীয়গুনেয়ো তারার্ ঠিগ্ কামানি গরন। 11 পত্তিদিন বেন্যে আর সাজোন্যে ধর্মগুরুগুনে লগেপ্রভুর নাঙে পুজ্যে-উৎসর্বর অনুষ্ঠান গরন্ আর তুম্বাজ্ আগর্বাট্টি জ্বালান। তারা সিজি গোজ্যে টেবিলো উগুরে মুজুঙো-রুটি সাজেইনে রাগান্ আর পত্তিদিন সাজোন্যে অক্তত্ সোনার চেরাগটগ উগুরে চেরাক্কুন্ জ্বালেই দুয়োন্। আমি আমা গোজেন লগেপ্রভুর উগুম মজিম কাম্ গুরিই, মাত্তর্ তুমি তারে ছাড়ি যেইয়ো। 12 গোজেনে আমা লগে আঘে; তেয়ই আমার্ নেতা। তা ধর্মগুরুগুনে তারার্ তূরীগুন্ বাজেইনে তমা বিরুদ্ধে যুদ্ধোর্ ডাক্ দিবাত্তে আমা লগে আগন। ও ইস্রায়েলর মানুচ্চুন্, তমা পূরোণি মানুচ্চুনোর্ গোজেন লগেপ্রভুর বিরুদ্ধে তুমি যুদ্ধো ন-গোজ্য, কিত্তে সিয়েনত্ তুমি ফোলেই ন-পারিবা।” 13 যারবিয়ামে ভিদিরে ভিদিরে যিহূদার সৈন্যগুনো পিজেদি একদল সৈন্য পাধেই দিলো; সেক্কে তার্ একদল সৈন্য যিহূদার মুজুঙেন্দি আর একদল সৈন্য যিহূদার পিজেদি রলাক্। 14-15 যিহূদার মানুচ্চুনে ফিরিনে দেগিলাক্কে, তারা মুজুঙোত্ আর পিজে দ্বিকিত্তেন্দি সৈন্য। সেক্কে তারা লগেপ্রভু ইদু কানাকুদি গুরিলাক্। ধর্মগুরুগুনে তারার্ তূরীগুন্ বাজেলাক্ আর যিহূদার মানুচ্চুনে যুদ্ধোত্তে রঅ ছাড়িনে ডাগিলাক্। তারা যেক্কে যুদ্ধোত্তে রঅ ছাড়িনে ডাগিলাক্ সেক্কে অবিয় আর যিহূদার মানুচ্চুনো মুজুঙোত্তুন্ গোজেনে যারবিয়াম আর ইস্রায়েলরে পুরোপুরিভাবে ওদেই দিলাক্। 16 যিহূদার মুজুঙোত্তুন্ ইস্রায়েলীয়গুনে ধেই যাহ্ ধুরিলাক্ আর গোজেনে তারারে যিহূদার মানুচ্চুনো আঢত্ তুলি দিলাক্। 17 অবিয় আর তা মানুচ্চুনে বোউত্ মান্জ্যরে মারে ফেলেলাক্। সেক্কে ইস্রায়েলীয়গুনোর বেঈ-লোইয়্যে মানুচ্চুনো ভিদিরেত্তুন্ পাচ্ লাখ্ মানুচ্ মারা পড়িলাক্। 18 এধোক্ক্যেন গুরিনে ইস্রায়েলর্ মানুচ্চুনে উদিই গেলাক্, আর যিহূদার মানুচ্চুনে জিদিলাক্, কিয়া তারা তারার্ পূরোণি মানুচ্চুনোর্ গোজেন লগেপ্রভুর উগুরে বিশ্বেজ্ গোজ্যন্। 19 অবিয় যারবিয়াম পিজেন্দি লোড়েইনে তা আঢত্তুন্ বৈথেল, যিশানা আর ইফ্রোণান আর সিয়েনির কায়-কুরে জাগায়ানি গজক্ গুরি নেযেল। 20 অবিয়র সময়োত্ যারবিয়ামে আর দরমর ওইনে উদি ন-পারিলো। পরেন্দি লগেপ্রভু তারে আঘাত্ গুরিলে তে মুরি গেলঅ। 21 ইন্দি অবিয় দরমর ওইনে উদো ধুরিলো। তার্ চৌদ্দোবো মোগ্ আর বেইশ্সো পুয়ো আর ষুলোবো ঝি এলাক্। 22 অবিয়র অন্য বেক্ কামর কধানি আর তে যিয়েনি কোইয়্যে সিয়েনি ভাববাদী ইদ্দোর বিজগ বোইবোত্ লেগা আঘে। |
Copyright © 2021 Bangladesh Bible Society
Bangladesh Bible Society