২ বংশধর 10 - Chakma Bibleরহবিয়াম বিরুদ্ধে ইস্রায়েলর উল্লোমী 1 রহবিয়ামে শিখিমোত্ গেলঅ, কিত্তে ইস্রায়েলীয়গুনে বেক্কুনে তারে রাজা বানেবাত্তে সিদু গেলাক্। 2 সেক্কে নবাট পুয়ো যারবিয়ামে মিসরত্তুন্ ফিরি এলঅ। তে রাজা শলোমন ইত্তুন্ ধেই যেইনে সিদু গেলঅ। সিদু থেবার্ সময়ানত্ তে রহবিয়ামর রাজা অবার্ হবরান্ শুনিলো। 3 মানুচ্চুনে যারবিয়ামরে ডাগিনে পাধেই দেনার্ পরেন্দি তে আর ইস্রায়েলীয়গুনে বেক্কুনে রহবিয়াম ইদু যেইনে কলাক্, 4 “তঅ বাবে আমা উগুরে এক্কান্ গুয়োর্ জুঙোল্ চাবি দিয়্যে, মাত্তর্ ইক্কিনে তুই আমা উগুরে চাপি দিয়্যে সে আগাত্যে কামানি কোমেইনে গুয়োর্ জুঙোলান্ পাদল্ গুরি দে; সালে আমি তরে সেবা গুরিবোং।” 5 জোবত্ রহবিয়ামে কলঅ, “তুমি তিন দিনোর্ দিন্নোত্ আরঅ এজঅ।” সেক্কে মানুচ্চুনে গেলাক্কোই। 6 যিদুক্কুন্ বুড়ো নেতায় তা বাপ্পো শলোমনর্ জীংকানিত্ তারে সেবা গুরিদাক্ রহবিয়ামে তারা লগে শল্লা গুরিবাত্তে কলঅ, “এ মানুচ্চুনোরে জোব্ দিবাত্তে তুমি মরে কি শল্লা দি পারঅ?” 7 জোবত্ তারা কলাক্কে, “এচ্চ্যে যুনি তুই এ বেক্ মানুচ্চুনোর লগে গম্ বেবহার গুরিনে তারারে হুজি গরচ্ আর তারার্ কোজোলিগান্ রোক্ষ্যে গরচ্ সালে তারা নিত্য তর্ চাগর্ ওইনে থেবাক্।” 8 মাত্তর্ রহবিয়ামে বুড়ো নেতাগুনোর শল্লানি ন-শুনিনে সে বেক্ গাবুজ্যেগুনোর্ লগে শল্লা গুরিলো যিগুনে তা লগে দাঙর্ ওইয়োন্ আর তারে সেবা গুরিদাক্। 9 তে তারারে কলঅ, “মানুচ্চুনে কদন্, ‘তঅ বাপ্পো যে গুয়োর্ জুঙোলান্ আমা উগুরে চাপি দিয়্যে সিয়েন্ পাদল্ গর্।’ ইয়েন পৌইদ্যেনে তমা সল্লাগান্ কি? আমি তারারে কি জোব্ দিবোং?” 10 জোবত্ সে গাবুজ্যেগুনে কলাক্, “যে মানুচ্চুনে তঅ বাবর্ চাপি দিয়্যে গুয়োর্ জুঙোলান্ পাদল্ গুরি দিবার্ কধাগান্ কোইয়োন তারারে তুই কোইদ্যে, তঅ বাবর্ কমর্বোত্তুন্ তঅ কাল্যে আঙুল্লো দাঙর্। 11 তঅ বাবে তারা উগুরে যে গুয়োর্ জুঙোলান্ চাপি দিয়্যে সিয়েন্ তুই আরঅ গুয়োর্ গুরিবে। তঅ বাবে তারারে মাজ্যেদে চাবুক্কোই তুই তারারে মারিবেদে কাঙারা-বিজেলোই।” 12 রাজার্ কধামজিম্ তিন দিনোর্ দিন্নোত্ যারবিয়ামে আর বেক্ মানুচ্চুনে রহবিয়াম ইদু ফিরি এলাক্। 13 রাজা বুড়ো নেতাগুনোর্ সল্লানি ন-শুনিনে তারারে অমকদ কড়া গুরি জোব্ দিলো। 14 তে সে গাবুজ্যেগুনোর্ সল্লা মজিম্ কোই দিলো, “মঅ বাপ্পো তমা জুঙোলানি গুয়োর্ গোজ্যে, মুই সিয়েন্ আরঅ গুয়োর্ গুরিম্। মঅ বাপ্পো চাবুক্কোই তমারে মাজ্যে, মুই তমারে মারিম্বে কাঙারা-বিজেলোই।” 15 এধোক্ক্যেন গুরি রাজা মানুচ্চুনোর্ কধালোই কান্ ন-পাদিলো। শীলোনীয় অহিয়র মাধ্যমে লগেপ্রভু নবাটর পুয়ো যারবিয়ামরে যে কধাগান কোইয়্যে সিয়েন্ পূরোণ গুরিবাত্তে গোজেনত্তুন্ ঘটনাগান্ এধোক্ক্যেন গুরিনে ঘুদিলো। 16 ইস্রায়েলীয়গুনে যেক্কে বুঝিলাক্, রাজা তারা কধানি ন-শুনিবো সেক্কে তারা রাজারে কলাক্, “দায়ূদো উগুরে আমার কনঅ দাবি নেই। যিশয়র পুয়োবো উগুরে আমার কনঅ অধিকার নেই। ও ইস্রায়েল, তুমি যে যার্ ঘরত্ ফিরি যঅ। ও দায়ূদ, ইক্কিনে তর্ নিজোর্ গুট্টি তুই নিজে চাহ্।” সেনত্তে ইস্রায়েলীয়গুনে যে যার্ ঘরত্ ফিরি গেলাক্। 17 মাত্তর্ যিহূদা-গুট্টির আদামানিত্ আর শঅরানিত্ যিদুক্কুন্ ইস্রায়েলীয় বজত্তি গুরিদাক্ রহবিয়ামে তারা উগুরে রাজাগিরি গরা ধুরিলো। 18 যিগুনোরে কাম্ গুরিবাত্তে বাধ্য গরা অদঅ তারার্ ভারান্ যিগুনো উগুরে এলঅ সে অদোরামরে রাজা রহবিয়ামে ইস্রায়েলীয়গুনো ইদু পাধেই দিলো, মাত্তর্ তারা তারে ইদে মেলা দিইনে মারে ফেলেলাক্। সেক্কে রাজা রহবিয়ামে যাদিমাদি তা রথ্তানত্ উদিনে যিরূশালেমত্ ধেই গেলঅ। 19 এধোক্ক্যেন গুরিনে ইস্রায়েলীয়গুনে দায়ুদোর বংশর বিরুদ্ধে উল্লোমী গুরিলাক্; অবস্থাগান্ এজঅ সং সেধোক্ক্যেন আঘে। |
Copyright © 2021 Bangladesh Bible Society
Bangladesh Bible Society