১ তীমথিয় 6 - Chakma Bible1 যে চাগরুনোর্ জদবদে কাম্ গরা পড়ে তারা বেক্কুনে তারার্ গিরোজ্চুনোত্তুন্ সর্মান পেবার যগাজ্জ্যে বিলি মনে গোরোক্, যেন কেঅ গোজেন নাঙর্ আর আমা শিক্ষ্যেনির্ নিন্দে গুরি ন-পারন্। 2 যে চাগর্বো খ্রীষ্ট বিশ্বেজির্ গিরোজর্ অধীন তে যেন বিশ্বেজি ভেই বিলিনে সেই গিরোজ্সোরে ঈচ্ ন-গরে বরং আরঅ গমেডালে তার সেবা গরে, কিয়া তার্ সেবালোই যিবে উপকার পার্ তে দঅ বিশ্বেজি আর তার্ কোচ্পেইয়্যে। এ বেপারানি শিক্ষ্যে দে আর উপদেচ্ দে। ভুল শিক্ষ্যে আর ঘেচ্চ্যেকগুরি ধন 3 কেঅ যুনি অন্য বাবোত্যে শিক্ষ্যে দে আর সত্য উপদেচ্, অত্তাৎ আমা প্রভু যীশু খ্রীষ্টর্ শিক্ষ্যে আর গোজেন-ভোক্তির্ শিক্ষ্যে মানি ন-লয় সালে তে দেমাগী। 4 তে কিচ্চু ন-বুঝে; কোজ্জ্যে আর তর্কাতর্কি গরানা যেন তার্ এক্কান পিড়ে ওই যায়। 5 আর চিগোন মনা মানুচ্চুনো ভিদিরে নিত্য যাগুলুগ্। এ মানুচ্চুনো ভিদিরে গোজেনর্ সত্য নেই; তারা খ্রীষ্টীয় ধর্ম-বিশ্বেজ্চানরে এক্কান জগদর্ লাভর্ উপায় বিলিনে মনে গরন্। 6 মাত্তর্ আসলে হুজী মনে খ্রীষ্টীয় ধর্ম-বিশ্বেজ্ মজিম চলিলে বিরেট্ লাভ অয়। 7 জগদত্ আমি দঅ কিচ্চু লগে গুরি ন-আনিই আর জগদত্তুন্ কিচ্চু লগে গুরি নেযেই ন-পারিবোং। 8 মাত্তর্ হানা আর কাবড়্ থেলে আমি হুজী থেবং। 9 মাত্তর্ যিগুনে থাগোইয়্যে অবাত্যে চায় তারা নানান্ পোরোক্ষ্যেত্ আর ফালত্ পরন্, আর এমন্ বাজে আর ক্ষতি গুরিবার আওজ্ তারার্ মনত্ উদে যিয়েনি মান্জ্যরে ভস্ত আর সর্বনাজ্ গরে। 10 নানান্ বাবোত্যে ভান্ন্যেয়র্ গোড়াত্ রোইয়্যেদে টেঙা-পৌইজ্যে উগুরে কোচ্পানা। ভালোক্ জনে টেঙা-পৌইজ্যের্ লুভে খ্রীষ্টীয় ধর্ম-বিশ্বেজত্তুন্ সুরি যেইনে নিজো উগুরে বোউত্ দুঘ্ ডাগি আন্ন্যন্। শেজ্ উপদেচ্ 11 মাত্তর্ তুই দঅ গোজেনর্ মানুচ্; ইয়েনিত্তুন্ তুই ধেই যা। সৎ জিংকানি, ভোক্তি, বিশ্বেজ্, কোচ্পানা, ধৈজ্জ্য আর নরম খাচ্চ্যদত্যে আয়োজি অ। 12 খ্রীষ্ট উগুরে বিশ্বেজত্যে তার্ পক্ষে মনে-পরাণে যুদ্ধো চালেই যাহ্। যে উমর্অ জিংকানিত্যে গোজেনে তরে ডাক্ক্যে সেই উমর্অ জিংকানিগান ধুরি রাগা। তুই বোউত্ মান্জ্য মুজুঙোত্ তর বিশ্বেজর্ সাক্ষ্য দুয়োচ্। 13 গোজেন, যিবে বেক্কুনোরে জিংকানি দান গরে আর খ্রীষ্ট যীশু, যিবে পন্তীয় পীলাত মুজুঙোত্ সত্যর্ পৌইদ্যেনে সাক্ষ্য দিয়্যে, সেই গোজেন আর খ্রীষ্ট যীশুর্ মুজুঙোত্ মুই তরে এ উগুমান দুয়োঙর্- 14 আমা প্রভু যীশু খ্রীষ্ট ফগদাং ন-অনা সং সাব্ গুরিনে মর্ উগুমানি পালেই যাহ্, যেন কেঅ তরে বদ্নাং গুরি ন-পারন। 15 সেই ভালেদির্ গোজেন, যিবে বানা এক্কো শাসনগুরিয়্যে, যিবে রাজাগুনোর রাজা আর প্রভুগুনোর প্রভু, তেয়ই তার্ যগাজ্জ্যে সময়োত্ খ্রীষ্টরে ফগদাং গুরিবো। 16 বানা গোজেনে মরণর্ অধীন নয়। তে এমন্ পহ্রত বজত্তি গরে যিয়েনত্ কনঅ মানুচ্ যেই ন-পারে। কনঅ মানুচ্ কনদিন্অ তারে নয়ো দেগন, নয়ো দেগিবাক্। সর্মান আর খেমতা উমরত্যে তার্। আমেন। 17 যিগুনে এ জগদত্ থাগোইয়্যে তারারে এ উগুমান দে যেন তারা দেমাগ্ ন-গরন আর কানগ্কন্ন্যে ধন উগুরে নির্ভর ন-গুরিনে গোজেন উগুরে নির্ভর গরন। তেয়ই ভোগ্ গুরিবাত্যে বেক্ জিনিস্চানি খুলো আঢে আমারে দান গরে। 18 থাগোইয়্যেগুনোরে উগুম দে যেন তারা অন্যগুনোরে উপকার্ গরন, সৎ কামত থান্, খুলো আঢে দান গরন্ আর তারার্ ধন-সোম্বোত্তির্ ভাগ অন্যগুনোরেয়ো দুয়োন। 19 ইয়েনিলোই তারা নিজোত্যে এমন্ ধন থুবেবাক্ যিয়েনি ভবিচ্চদে তারার পক্ষে এক্কান দরমর শিঙোর ধোক্ক্যেন অবঅ, যেন সত্যিকারর্ যে জিংকানি সিয়েন তারা দরমর গুরিনে ধুরি রাগেই পারন। 20 ও তীমথিয়, যিয়েন রোক্ষ্যে গুরিবাত্যে তরে দিয়্যে ওইয়্যে সিয়েন গমেডালে রোক্ষ্যে গর্। মিজে জ্ঞানর্ ভোক্তি-নেইয়্যে বাজে কধা আর ভুল্ শিক্ষ্যেত্তুন্ দূরোত্ থাগ্। 21 কনঅ কনঅ মানুচ্ এবাবোত্যে জ্ঞানর্ দাবি গুরিনে খ্রীষ্টীয় ধর্ম-বিশ্বেজত্তুন্ দূরোত্ সুরি যেইয়োন। গোজেনে তমারে দোয়্যে গোরোক্। |
Copyright © 2021 Bangladesh Bible Society
Bangladesh Bible Society