১ তীমথিয় 5 - Chakma Bibleবিশ্বেজিগুনোর্ কামানি 1 যিগুনে বুড়ো, তারারে দুষ্ দেগেবাত্যে গবাচবা ন-গোজ্য; বাব ধোক্ক্যেন মনে গুরিনে তারারে বুঝো। গাবুজ্জ্যেগুনোরে ভেইয়ো ধোক্ক্যেন মনে গুরিনে বুঝো। 2 বয়জে দাঙর্ মিলেগুনোরে মা ধোক্ক্যেন গুরি বুঝো আর গাবুজ্জ্যে মিলেগুনোরে বোনো ধোক্ক্যেন মনে গুরিনে গম্ মনভাব্পোই বুঝো। 3 যে রানী মিলেগুনোর্ কেঅ নেই তারারে যত্তন্ গুরিনে দেগাশুনো গরঅ। 4 মাত্তর্ কনঅ রানী মিলের্ যুনি পুয়ো-ছা বা নাঢিন্ থায় সালে সেই পুয়ো-ছাগুনে বা নাঢিনুনে যেন পত্তমে নিজো পরিবার উগুরে কাম্ গুরিনে গোজেন ভোক্তি দেগাদে শিগোন্। এবাবোত্যেগুরি তারা তারার্ বাপ-দাদাগুনোর্ কোচ্পেইয়্যের্ দোয়্যে-মেয়্যেনি সুজিই পারিবাক্, আর ইয়েনিলোই গোজেনে হুজি অয় । 5 যে রাণী মিলেবোর্ কেঅ নেই তে গোজেন উগুরে আজা রাগেইনে দিন-রেত্ গোজেন ইধু তবনা আর কোজোলি গরানাত্ থায়। 6 মাত্তর্ যে রানী মিলেবো যেবাবোত্যে গুরি হুজি জিংকানি কাদায় তে জেদা অবস্থায়য়ো মরা ধোক্ক্যেন। 7 ইয়েনি পৌইদ্যেনে উগুম দে যাতে কেঅ তারারে দুষ্ দি ন-পারন। 8 যে নিজো কুদুম্মোগুনোরে, বিশেষ গুরিনে নিজো পরিবারর্ দেগাশুনো ন-গরে, তে তারে দিইনে তা বিশ্বেজ্চানরে অস্বিগের্ গোজ্জ্যে; তে অবিশ্বেজিত্তুন্অ বেশ্ বজং। 9 রানি মিলেগুনোর্ নাঙর্ লিষ্টিত্ কনঅ রানি মিলের্ নাঙ্ লিগিবার আগেদি চাহ্ পরিবদে যে, তা বয়জ্চান ষায়েট বজরর্ কম নয় আর তে নেগ উগুরে বিশ্বেজি এলঅ। 10 ইয়েনিবাদে গম কামত্যে তার্ সুনাঙ্ থাহ্ পরিবো। এ গম কামানির্ ভিদিরে আঘেদে-পুয়ো-ছা মানুচ্ গরানা, গর্বা লবিয়োত্ গরানা, গোজেন মানুচ্চুনোরে টেং ধোই দেনা, যিগুনে দুঘোত্ পোজ্জ্যন তারারে এজাল্ দেনা, আর অন্য গম কামত্ মিজেনা। 11 গাবুজ্জ্যে রানি মিলেগুনোর্ নাঙানি রানিমিলে লিষ্টিত্ ন-লেখ্য, কিয়া যেক্কে তারার্ বো যেবার মন থেলে খ্রীষ্ট উগুরে তারার্ ভোক্তি কুমি এজে সেক্কে তারা নেগ্ লবাত্যে চান্। 12 ইয়েন্দোই তারা তারার্ আগ এগেমান্ ভাঙন্ বিলিনে নিজো উগুরে সাজা ডাগি আনন্। 13 ইয়েন বাদে তারা ঘরে ঘরে বেড়েইনে আল্সি অদে শিগোন্। তারা যে বানা আল্সি অন্ সিয়েন নয়, মাত্তর্ বাজে কধা কদে আর পর বেপার্লোই কধা কবাত্যে শিগোন্ আর যিয়েন তারাত্তুন্ কনা উচিত নয় সেই কধানি কন্। 14 সেনত্যে মুই এ উপদেজ্চান দুয়োঙর্, গাবুজ্জ্যে রানি মিলেগুনে নেগ্ লোদোক্, পুয়ো-ছাগুনোর্ মা ওদোক্, নিজোর্ নিজোর্ সংসারর্ দেগাশুনো গোত্তোক্ আর নিন্দে গুরিবাত্যে শত্রুগুনোরে কনঅ জু গুরি ন-দেদোক্। 15 এ ভিদিরে দঅ কয়েক্কো রানি মিলে ফিরি যেইনে শদানর্ পধেদি চলদন্। 16 খ্রীষ্ট বিশ্বেজি কনঅ মিলের্ ঘরত কয়েক্কো রানি মিলে থেলে সেই মিলেবো তারারে দেগাশুনো গোরোক্। এ রানি মিলেবোর্ ভারান্ মন্ডলী উগুরে চাপি দেনা উচিত নয়, যেনে যে রানিমিলেগুনোর কেঅ নেই মন্ডলী তারারে দেগাশুনো গুরি পারে। 17 মন্ডলীর যে আজল্ নেতাগুনে গমেডালে মন্ডলীর পরিচালনা গরন্, বিশেষ গুরি যিগুনে গোজেনর্ কধা প্রচার আর শিক্ষ্যে দান গুরিবাত্যে কাম গরন্, তারার্ পাওনা দ্বিগুন অনা উচিত। 18 পবিত্র বোইবোত্ আঘে, “শোজ্জ্য মাড়িবার সময়োত্ বলদ মুয়োত্ মোগোনি খাজা ন-বান্ন্য।” আরঅ লেগা আঘে, “যে কাম্ গরে তে বেতন পেবার্ যোগ্য।” 19 দুই বা তিনজন সাক্ষীর্ সাক্ষ্য বাদে মন্ডলীর কনঅ আজল্ নেতার বিরুদ্ধে কনঅ দুষোর্ কধালোই কান ন-দুয়ো। 20 যে আজল্ নেতাগুনে পাপ গরানাত্ থান্ মন্ডলীর বেক্ মানুচ্চুনো মুজুঙোত্ তারার্ দুষ্চান দেগেই দুয়ো যাতে অন্য নেতাগুনেয়ো দরান্। 21 গোজেন আর খ্রীষ্ট যীশু আর বেঈ লোইয়্যে স্বর্গদূত্তুনো মুজুঙোত্ মুই তরে এ উগুমান দুয়োঙর্-কারঅ পক্ষ ন-লোইনে ইয়েনি বেক্কানি গুরিবে আর একচোক্ক্যে ওইনে কনঅ কাম ন-গুরিচ্। 22 যাদিমাদি গুরিনে কারঅ উগুরে আঢ্ রাগেইনে কাররে কনঅ পদত্ ন-নেযেচ্। অন্যগুনে যেক্কে পাপ গরন্ সেক্কে তারা লগে ন-মিজেস্। নিজোরে খাটি রাগেচ্। 23 তর্ প্রায় অসুগ্ অয় বিলিনে অজম্ অবাত্যে এক্কেনা এক্কেনা গুরি আংগুর-রচ খেচ্; বানা পানি ন-খেচ্। 24 কনঅ কনঅ মান্জ্যর্ পাপ এদক্ গমেডালে দেগা যায় যে, তার বিচেরান আগে ওই যায়। আরঅ কনঅ কনঅ মান্জ্যর পাপ জেরেদি দেগা যায়। 25 সেবাবোত্যেগুরি গম কামানি সাব্ গুরিনে দেগা যায়, আর যিয়েনি সাব্ নয় সিয়েনিয়ো লুগেইয়্যে ন-থায়। |
Copyright © 2021 Bangladesh Bible Society
Bangladesh Bible Society