১ তীমথিয় 4 - Chakma Bible

তীমথিয়রে উপদেচ্‌

¹ পবিত্র আত্মাগানে গমেডালে কোইয়্যেদে, ভবিচ্চ্যদে কুদুক্কুন মানুচ্‌ খ্রীষ্টীয় ধর্ম-বিশ্বেজত্তুন্ সুরি যেবাক্ আর ছলনাগুরিয়্যে আত্মা আর ভান্ন্যেই আত্মাগুনোর্ শিক্ষ্যে ইন্দি মনানি দিবাক্।

² বিবেক বাজে ওই যেয়্যে এমন বেক্ মিজে মাদিয়্যে মানুচ্চুনোর ভন্ডামিত্যে এবাবোত্যে অবঅ।

³ ইগুনে মান্‌জ্যরে মোক্ ন-লবার উগুম দুুয়োন আর কনঅ কনঅ হানা খাদে মানা গরন্। মাত্তর্ বিশ্বেজিগুনে, যিগুনে গোজেনর্ সত্যগানরে জান্ন্যন্, তারা যেন ভালেদি জানেইনে খান সেনত্যে দঅ গোজেনে এই বেক্ হানাগানি সৃট্টি গোজ্যে।

⁴ গোজেনর্ বানেয়্যে পত্তি জিনিচ্‌ গম, সেনত্যে কনঅ জিনিচ্ ভান্ন্যেই মনে গুরিনে বাদ দেনা উচিত নয়; মাত্তর্ সিয়েন যেন ভালেদি জানেইনে মানি লুয়ো অয়,

⁵ কিয়া গোজেনর্ কধালোই আর তবনালোই সিয়েনি সিজি অয়।

⁶ যুনি তুই এ বেপারানি ভেইয়ুনোরে বুঝেই দুয়োচ্ সালে খ্রীষ্টীয় ধর্ম-বিশ্বেজর্ যে সত্যগান আর ভুল-নেইয়্যে শিক্ষ্যেগান তুই মানি চলর্, সিয়েন্দোই কাবিল্ ওইনে খ্রীষ্ট যীশুর এক্কো যগাজ্জ্যে সেবাগুরিয়্যে অবে।

⁷ গোজেন উগুরে ভোক্তি-নেইয়্যে হিত্যে-কধাত্তুন্ দূরোত্ থাগঅ; ইয়েনি দঅ বুড়ীগুনোর্ বানেয়্যে হিত্যে ধোক্ক্যেন। সিয়েনিত্তুন্ বরং গোজেন ভক্তির অভ্যেস্ গরঅ।

⁸ কিয়্যেগানদি ব্যায়ামত্ কিজু লাভ অয় সত্য, মাত্তর্ গোজেন-ভোক্তিলোই বেক্কানিন্দি লাভ্ অয়; সিয়েনত্যে এ জিংকানিত্ আর পর জিংকানিত্যে আজা আঘে।

⁹ এ কধাগান বিশ্বেজ্ গুরিবার আর পুরোপুরি গুরিনে মানি লবার্‌অ যগাজ্জ্যে।

¹⁰ ইয়েনত্যে আমি মনে পরাণে কাম্ গুরির্ আর আওজ্ গুরিনে কাম্ গুরির্, কিয়া জেদা গোজেন উগুরে আমি আজা রাগেয়্যেই। তেয়ই বেক্‌ মানুচ্চুনোর্ উদ্ধোর্ গুরিয়্যে, বিশেষ গুরিনে তারারে যিগুনে তারে বিশ্বেজ্ গরন্।

¹¹ তুই এ পৌইদ্যেনে উগুম আর শিক্ষ্যে দে।

¹² তুই গাবুজ্যে বিলিনে কেঅ যেন তরে ঈচ্ ন-গরন্। কধালোই, চাল্‌চলনত্, কোচ্‌পানাত্, বিশ্বেজত্ আর পবিত্রতালোই তুই বিশ্বেজিগুনো ইধু আদর্শ অ।

¹³ মুই ন-এজানা সং তুই বিশ্বেজিগুনোরে পবিত্র বোইবো পড়ি শুনোনা, প্রচার গরানা আর শিক্ষ্যে দেনার্ কামত্ লাগি থাগ্।

¹⁴ মন্ডলী নেতাগুনে যেক্কে তঅ উগুরে তারার্ আঢ্‌তানি রাগেয়োন সেক্কে ভাববাদী ইজেবে কধা কনার্ মাধ্যমে যে বিশেষ্ দান তরে দিয়্যে ওইয়্যে সেই দানান্ তুই অবহেলা ন-গুরিচ্।

¹⁵ এ বেপারানিলোই মনযোগি অ; নিজোরে পুরোপুরি গুরিনে সিয়েন ভিদিরে ডুবেই রাগা, যেন বেক্কুনে দেগন্ যে, তুই উজেই যর্।

¹⁶ তর্ নিজো পৌইদ্যেনে আর তর্ শিক্ষ্যে পৌইদ্যেনে উজিয়ার্ থাক্। ইয়েনি গরানাত্ থাক্, কিয়া সেক্কে তুই নিজোরে রোক্ষ্যে গুরি পারিবে আর যিগুনে তঅ কধা শুনিবাক্ তারারেয়ো রোক্ষ্যে গুরি পারিবে।