১ তীমথিয় 3 - Chakma Bibleমন্ডলীর নেতাগুন 1 এ কধাগান বিশ্বেজ্ গুরিবার যে, যুনি কেঅ মন্ডলীর পরিচালক অবাত্যে চায় সালে তে এক্কান গম্ কাম গুরিবার আওজ্ গরে। 2 পরিচালক্কো সেনত্যে এমন উয়ো পড়িবো যেন কেঅ তারে দুষ্ দি ন-পারন। তাত্তুন্ বানা এক্কো মোক্ থেবঅ। তে নিজোরে দোঙেই রাগেব আর তার্ গম বিচেরবুদ্ধি থেবঅ। তে ভদ্র অবঅ আর গর্বা লবিয়োত্ গত্তে কোচ্পেবঅ। অন্যগুনোরে শিক্ষ্যে দান গুরিবার খেমতা তাত্তুন্ থেবঅ। 3 তে যেন মাত্তল্ আর রগ্চদা ন-অয়, বরং তা খাচ্চ্যদ্তান যেন চিদে অয় আর তে যেন কোজ্জ্যে গুরিয়্যে বা টেঙার্ লুভি ন-অয়। 4 তে যেন যগাজ্জ্যে গুরিনে তার্ নিজো ঘরর্ বেক্কানি পরিচালনা গরে আর তার্ পুয়ো-ছাগুনে যেন বাধ্য আর ভদ্র অন্। 5 যিবে তার্ নিজো ঘর পৌইদ্যেনে পরিচালনা গুরি ন-জানে তে কেধোক্ক্যেন গুরিনে গোজেন মন্ডলীর দেগাশুনো গুরিবো? 6 মন্ডলীর পরিচালক্কো যেন নুয়ো বিশ্বেজি ন-অয়, কিয়া নুয়ো বিশ্বেজি অলে তে অয়ত দেমাগে ফুলি উদিবো আর শদানরে দিয়্যে সাজার যগাজ্জ্যে অবঅ। 7 বারেদি মানুচ্চুনো ইধু তার সুনাঙ্ থানা দরকার, যেন তে বদ্নাঙর্ ভাগী ন-অয় আর শদানর্ ফালত্ ন-পড়ে। 8 সেধোক্ক্যেন গুরি পরিচালক্কুনেয়ো যেন সর্মান পেবার্ যগাজ্জ্যে আর এক কধার্ মানুচ্ অন্। তারা যেন মাত্তল্ ন-অন্, আর অন্যায় লাভ ইন্দি যেন তারার্ মনান্ ন-থায়। 9 তারা যেন সাব্ বিবেগে খ্রীষ্টীয় ধর্ম-বিশ্বেজর্ গুমুরো সত্যগান ধুরি রাগান্। 10 তারারে আগে তোলেই চাহ্ পরিবো; সে পরেদি যুনি তারা নিদ্দুজি বিলিনে প্রমাণিত অন্ সালে পরিচারক ওই পারিবাক্। 11 ঠিগ্ সেবাবোত্যেগুরি তারার্ মোগ্কুনেয়ো যেন সর্মানর্ যগাজ্জ্যে অন্। তারা যেন অন্যরে বদ্নাঙ্ গুরিনে ন-বেড়ান্ আর নিজোরে দোঙেই রাগান্। বেক্কানি পৌইদ্যেনে যেন তারারে বিশ্বেজ্ গরা যায়। 12 পরিচারকর্অ বানা এক্কো মোক্ থেবঅ। তে যেন গমেডালে তার্ পুয়ো-ঝিগুনোরে আর গিরিত্তি পরিচালনা গরে। 13 যে পরিচারগে গমেডালে কাম্ গরে তে সর্মান লাভ গরে আর খ্রীষ্ট যীশু উগুরে বিশ্বেজর্ কারনে তা মনানত্ সাহজ্ অয়। 14-15 মুই আজা গরং যাদিমাদি তমা ইধু যেই পারিম। মাত্তর্ যুনি কনঅ কারনে মর্ যাদে দেরী অয় সেনত্যে মুই তইধু ইয়েনি লেগঙর্, যেন তুই কোই পারচ্ গোজেন পরিবার মানুচ্চুনোর চালচলন্ কেধোক্ক্যেন অনা উচিত। এই পরিবার্বো অলঅ জেদা গোজেনর্ মন্ডলী, যিবে ভিত্তি আর থুনি ধোক্ক্যেন গোজেনর্ সত্যগানরে ধুরি রাগায়। 16 খ্রীষ্টীয় ধর্ম-বিশ্বেজর্ গুমুরো সত্যগান যে দাঙর্ সিয়েন অস্বিগের্ গরা ন-যায়। সেই সত্যগান ইয়েন- তে মানুচ্ ইজেবে ফগদাং পেলঅ; তে যে নিদ্দুজি পবিত্র আত্মাগানে সিয়েন প্রমাণ গুরিলো; স্বর্গদূত্তুনে তারে দেক্ক্যন; বেক্ জাদ্তুনো ইধু তা পৌইদ্যেনে প্রচার গরা ওইয়্যে; জগদত্ তা উগুরে মান্জ্যে বিশ্বেজ্ গোজ্জ্যন; স্বর্গত্ তারে মহিমার্ সমারে তুলি নেযা ওইয়্যে। |
Copyright © 2021 Bangladesh Bible Society
Bangladesh Bible Society