১ তীমথিয় 2 - Chakma Bible

উবোসনা গরানা পৌইদ্যেনে শিক্ষ্যে

¹ পত্তমে মুই কঙর্, বেক্কুনোত্যে গোজেন ইধু যেন মিনতি, তবনা, কোজোলী আর ভালেদি জানা অয়।

² এবাবোত্যেগুরি রাজাগুনোত্যে আর যিগুনো আঢত্ খেমতা আঘে তারার্ বেক্কুনোত্যে তবনা গরা পড়িবো, যেনে গোজেন উগুরে ভোক্তি দেগেইনে আর গমেডালে চলিনে আমি থির্ আর সুগে-শান্দিয়্যে জিংকানি কাদে পারিই।

³ আমার উদ্ধোর গুরিয়্যে গোজেনর চোগেদি সিয়েন গম্ আর ইয়েন্দোই তে হুজী অয়।

⁴ তে চায় যেন বেক্কুনে পাপত্তুন্ উদ্ধোর্ পান আর খ্রীষ্ট পৌইদ্যেনে সত্যগানরে মূড়োত্ পুরিনে বুঝি পারন্।

⁵ গোজেন বানা একজন আঘে আর গোজেন আহ্ মান্‌জ্যরে মিলেমিলি গুরি দিবাত্যেয়ো বানা একজন আঘে। সেই মিলেমিলি গুরি দিয়্যেবো অলঅ মানুচ্‌ খ্রীষ্ট যীশু।

⁶ তে বেক্‌ মানুচ্চুনোর উদ্ধোরর্ দাম ইজেবে নিজোর জিংকানিগান দিয়্যে। গোজেনর্ ঠিগ গোজ্জ্যে সময়োত্ সে পৌইদ্যেনে সাক্ষ্য দিয়্যে ওইয়্যে,

⁷ আর এ সাক্ষ্যগান দিবাত্যে গোজেনে মরে প্রচারক, দূত আর অযিহূদীগুনো ইধু বিশ্বেজ্ আর সত্যর্ মাষ্টর ইজেবে বেঈ লোইয়্যে। মুই সত্য কধাগান্ কঙর্, মিজে ন-কঙর্।

⁸ মুই চাং যেন বেক্‌ জাগানিত্ মরদ্‌তুনে রাগ বা কোজ্জ্যের্ মনভাব ন-রাগেইনে সাব্ মনে দ্বিয়েন আঢ্ তুলিনে তবনা গরন্।

⁹ মুই ইয়েন্অ চাং যেন মিলেগুনে ভদ্র গুরিনে আর গম্ বিচেরবুদ্ধি বেবহার গুরিনে যগাজ্জ্যে কাবড়-চুগোর্ পিনোন্। তারা যেন নানান্ বাবোত্যে চুলোর্ ঝুদো বানন্, সোনা আর মুক্তোর গয়না পিনোন্ আর মংগা মংগা কাবড়-চুগোড়্‌লোই নিজোরে ন-সাজান্।

¹⁰ সিয়েনর্ বদলে যেন তারা গম গম কাম্বোই নিজোরে সাজান্। যে মিলেগুনে নিজোরে গোজেন-ভক্ত কোই থান্ সেই মিলেগুনোত্যে সিয়েনই অবঅ যগাজ্জ্যে কাম্।

¹¹ কধা ন-কোইনে আর পুরোপুরি বাধ্য থেইনে মিলেগুনে শিক্ষ্যে লাভ গোত্তোক্।

¹² শিক্ষ্যে দিবার আর মরদ উগুরে কার্‌বারি গিরি গুরিবার উগুম মুই কনঅ মিলেরে ন-দুয়োং।

¹³ কিয়া পত্তমে আদমরে আর যেরেদি হবারে সৃট্টি গরা ওইয়্যে।

¹⁴ সিয়েন বাদে আদমে ছলনাত্ ন-ভুলে, মাত্তর্ মিলেবো পুরোপুরি গুরিনে ভুল্ল্যে আর গোজেনর্ উগুম অমান্য গোজ্জ্যে।

¹⁵ মাত্তর্ তে পুয়ো-ছা জর্ম দেনার্ মাধ্যমে পাপত্তুন্ উদ্ধোর পেবঅ; খালিক্ মিলেগুনোর্ গম বিচের বুদ্ধি বেবহার গুরিনে বিশ্বেজ্, কোচ্‌পানা আর পবিত্রতালোই চলা পড়িবো।