১ তীমথিয় 1 - Chakma Bible

তীমথিয় ইধু পৌলর পত্তম চিধি

¹ আমার উদ্ধোর্ গুরিয়্যে গোজেন আর খ্রীষ্ট যীশুর উগুমে মুই পৌল যীশু খ্রীষ্টর এক্কো দূত ওইয়োং। খ্রীষ্ট যীশু উগুরে আমার বেক্‌ আজাগান।

² বিশ্বেজি ইজেবে মর্ আজল্ পুয়ো তীমথিয় ইধু মুই এ চিধিগান লেগঙর্। আমা বাবা গোজেন আর আমা প্রভু খ্রীষ্ট যীশু তরে দোয়্যে, মেয়্যে আর শান্তি-দান গোরোক্।

ভন্ড মাষ্টরুনো পৌইদ্যেনে উজিয়ার্ গরানা

³ মুই ম্যাসিডোনিয়াত্ যেবার সময়োত্ তরে যিয়েনি কোইয়োং ইক্কিনিয়ো সিয়েনি কঙর্-তুই ইফিষ শঅরত্ থাগ্, যেনে কয়েক্কো মান্‌জ্যরে নিদ্দেচ্‌ দি পারচ যেন তারা আর ভুল্ শিক্ষ্যে ন-দুয়োন।

⁴ তারারে এ উগুমান্অ দিচ যেন তারা হিত্যে-কধালোই আর দাঙর্ দাঙর্ গুট্টির্-নাঙানি ইন্দি মনযোগ ন-দুয়োন। ইয়েনিয়ে গোজেনর্ কাম বাদ দিইনে নানান্ তর্কাতর্কির সৃট্টি গরে মাত্তর্ গোজেনে কেধোক্ক্যেন গুরি তার্ কামানি পরিচালনা গরে সিয়েনি বিশ্বেজর্ মাধ্যমে জানা যায়।

⁵ এ উগুমানর্ উদ্দেচ্য অলঅ কোচ্‌পানা জাগেই তুলোনা। এ কোচ্‌পানাগান খাটি মন, সাব্ বিবেক আর আজল্ বিশ্বেজত্তুন্ এজে।

⁶ কিজু মান্‌জ্যে ইয়েনিত্তুন্ সুরি যেইনে বাজে কধাবাত্তা ইন্দি বেশ্ মনান্ দুয়োন।

⁷ তারা যুনিয়ো নিজোর্ কধা নিজেই ন-বুঝোন্ আর যে পৌইদ্যেনে জোর্ দিইনে কদন্ সেই পৌইদ্যেনেয়ো ন-জানন্ তো তারা মোশির রীদি-সুদোমর্ মাষ্টর্ অবাত্যে চান।

⁸ আমি কোই পারিই রীতি-সুদোম গম, খালিক্ সিয়েনি যুনি গমেডালে কামত্ লাগানা অয়।

⁹ আমি ইয়েন্অ কোই পারিই, কনঅ সৎ মান্‌জ্যত্যে এ আইন-কানুনানি দিয়্যে ন-অয়; সিয়েনি দিয়্যে ওইয়্যেদে তারাত্যে যিগুনে আইন অমান্য গরন্ আর অবাধ্য অন্, যিগুনে ভক্তিনেইয়্যে আর পাপী, যিগুনে অপবিত্র আর অধার্মিক, যিগুনে বাপ্-মারে মারে ফেলান, যিগুনে খুন্ গরন,

¹⁰ যিগুনে সিনেলী গরন, যিগুনে সমকামী, যিগুনে চাগর বেবসা গরন্, যিগুনে মিজে কধা কন্ আর মিজে সাক্ষি দুয়োন, আর যিগুনে সত্য শিক্ষ্যের বিরুদ্ধে অন্য কনঅ কাম্ গরন।

¹¹ বাঈনী গরেদে গোজেনর্ দাঙর্ গম্ হবর্ মজিম যে শিক্ষ্যে, সেই শিক্ষ্যেগানই অলঅ সত্য শিক্ষ্যে। এ গম্ হবর্ প্রচারর্ ভারান্ তে মঅ উগুরে দিয়্যে।

¹² আমার প্রভু যীশু খ্রীষ্ট, যিবে মরে খেমতা দান গোজ্জ্যে, তারে মুই ভালেদি জানাং, কিয়া তে মরে বিশ্বেজি মনে গুরিনে তার্ সেবা কামত্ বেঈ লোইয়্যে।

¹³ যুনিয়ো মুই আগে খ্রীষ্টরে বদ্‌নাঙ গত্তুং আর অত্যেচারী আহ্ ভান্ন্যেইরাগী এলুং তো মরে তে এ কামত্ বেঈ লোইয়্যে। মরে তে দোয়্যে গোজ্জ্যে, কিয়া মর্ অবিশ্বেজত্যে মুই হবর্ ন-পেইনে সিয়েনি বেক্কানি গত্তুং।

¹⁴ আমা প্রভু মরে জদবদে দোয়্যে গোজ্জ্যে আর খ্রীষ্ট যীশু সমারে এগত্তর্ ওইনে যে বিশ্বেজ্ আর কোচ্‌পানাগান এজে সিয়েন দান গোজ্জ্যে।

¹⁵ এ কধাগান বিশ্বেজ্‌বলা আর পুরোপুরি গুরিনে মানি লবার্‌অ যগাজ্জ্যে যে, পাপত্তুন্ পাপীগুনোরে উদ্ধোর্ গুরিবাত্যে খ্রীষ্ট যীশু জগদত্ এচ্চ্যে।

¹⁶ আর সেনত্যে গোজেনে মরে দোয়্যে গোজ্জ্যে, যেন আজল্ পাপী যে মুই, মর্ মাধ্যমে খ্রীষ্ট যীশু তার্ ধৈজ্জ্যগান্ দেগেই পারে। তা উগুরে বিশ্বেজর্ কারনে যিগুনে উমর্‌অ জিংকানি পেবাক্ তারা যেন মরে দেগিনে শিগিই পারন্ সেনত্যে তে মঅ উগুরে এবাবোত্যে গোজ্জ্যে।

¹⁷ যিবে উমরর্ রাজা, যার কনঅ ক্ষয় নেই আর যিবেরে দেগা ন-যায়, উমরত্যে তেয়ই বানা গোজেনর্ সর্মান আর বাঈনী পোক্‌। আমেন।

¹⁸ কোচ্‌পেইয়্যে পুয়ো তীমথিয়, তঅ পৌইদ্যেনে অন্যগুনে ভাববাদী ইজেবে যে কধানি কোইয়োন সেই কধা মজিম মুই তরে এ উগুমান দুয়োঙর্। সেই কধানি ইদোত্ রাগেইনে তুই খ্রীষ্টর পক্ষে মনেপরাণে যুদ্ধো গুরি যাহ্,

¹⁹ আর সে লগে বিশ্বেজ্ আর সাব্ বিবেক রোক্ষ্যে গর্। কুদুক্কুন মান্‌জ্যে বিবেগর্ কধানি ন-শুনিনে তারার্ বিশ্বেজত্ যাগুলুগ্ গুরি দুয়োন।

²⁰ সেই মানুচ্চুনো ভিদিরে আঘন্ হুমিনায় আর আলেক্‌সান্দর। সেনত্যে মুই শদানর্ আঢত্ তারারে ইরি দুয়োং, যেন তারা এ শিক্ষ্যেগান পান, গোজেনরে অগমান্ গুরিবাত্যে নেই।