১ থিষলনীকীয় 4 - Chakma Bible

গোজেনরে হুজি গরানা

¹ আরঅ কং ভেইলগ্, গোজেনরে হুজি গুরিবাত্যে কেধোক্ক্যেন গুরি চলানা উচিত সেই শিক্ষ্যেগান্ দঅ তুমি আমাত্তুন্ পেইয়ো, আর ঘেচ্চ্যেকগুরি তুমি সেবাবোত্যে গুরি চলর্। তো প্রভু যীশুর্ ওইনে আমি তমারে কোজোলি গুরির্ আর উপদেচ্‌ দিত্তে যেন তুমি আরঅ বেশ্ গুরিনে সেবাবোত্যেগুরি চলঅ।

² প্রভু যীশুত্তুন্ অধিকার পেইনে আমি তমারে কি কি উগুম দিয়্যেই সিয়েনি তমাত্তুন্ জানা আঘে।

³ গোজেনর্ আওজ্‌চান ইয়েন-তুমি পবিত্র অ, অত্তাৎ নানান্ বাবোত্যে সিনেলীত্তুন্ দূরোত্ থাগঅ,

^4-5 আর যিগুনে গোজেনরে ন-জানন্ সেই অযিহূদীগুনো ধোক্ক্যেন কিয়্যের্ কামনার্ লগে ন-চলিনে তুমি পত্তিজনে নিজোর্ কিয়্যেগানরে পবিত্র গুরি সর্মানর সমারে দোঙেই রাগেবাত্যে শিগো।

⁶ এ পৌইদ্যেনে অন্যেয় গুরিনে কেঅ যেন কনঅ ভেইয়োরে ন-থগান্। আমি আগে তমারে কোইয়্যেই আর উজিয়ার্ গুরি দিয়্যেই, এ বেক্‌ অন্যেয়ানিত্যে প্রভুই সাজা দিবো,

⁷ কিয়া গোজেনে ফি-বলা ওইনে চলিবাত্যে আমারে ন-ডাগে, পবিত্র গুরি চলিবাত্যে ডাক্ক্যে।

⁸ সেনত্যে এ শিক্ষ্যেগান যে এলাফেলা গরে তে মান্‌জ্যরে এলাফেলা ন-গরে, মাত্তর্ যিবে তার্ পবিত্র আত্মাগানরে তমাত্যে দান গোজ্জ্যে তেয়ই গোজেনরে এলাফেলা গরে।

⁹ ভেইয়ো উগুরে ভেইয়োর্ কোচ্‌পানা পৌইদ্যেনে তমা ইধু কিজু লিগিবার দরকার নেই, কিয়া গোজেনে তমারে একজন আরেকজনরে কোচ্‌পেবাত্যে শিগেয়্যে।

¹⁰ আর ঘেচ্চ্যেকগুরি তুমি ম্যাসিডোনিয়া রেজ্যর বেক্‌ ভেইয়ুনোরে কোচ্‌পঅ। মাত্তর্ ভেইলগ্, তমা ইধু আমার বিশেজ্ কোজোলি অলঅ তমার এই কোচ্‌পানাগান যেন আরঅ বেশ্ অয়।

¹¹ আমি তমারে যে উগুম দিয়্যেই সেবাবোত্যেগুরি শান্ত জিংকানি কাঢাদে, নিজোর্ কামত থাগদে আর নিজো আঢে কাম গত্তে বিশেজ্ গুরিনে আয়োজি অ।

¹² যেন বারেদি মানুচ্চুনো চোগোত্ তমার আঢাউদো যগাজ্জ্যে অয় আর অন্য উগুরে নির্ভর গরা ন-পড়ে।

প্রভুর্ ফিরি এজানা

¹³ ভেইলগ্, আমি ন-চেই যিগুনে মুরি যেয়োন তারার্ কি অবঅ সে পৌইদ্যেনে তমার অজানা থায়, যেন যিগুনো মনত্ কনঅ আজা নেই তারা ধোক্ক্যেন গুরি তুমি দুঘে ভাঙি ন-পোজ্জ্য।

¹⁴ আমি যেক্কে বিশ্বেজ্ গুরিই যীশু মোজ্জ্যে আরঅ জেদা ওই উত্ত্যে সেক্কে আমি ইয়েন-অ বিশ্বেজ্ গুরিই, যিগুনে যীশু লগে এগত্তর্ ওইনে মুরি যেইয়োন গোজেনে তারারেয়ো যীশু লগে নেযেব।

¹⁵ প্রভুর্ শিক্ষ্যে মজিম আমি তমারে কোর্, আমি যিগুনে জেদা আঘিই আর প্রভুর্ ফিরি এজানা সং জেদা থেবং, আমি কনঅ বাবদে সেই মরাগুনোর্ আগে ন-যেবং।

¹⁶ দাঙর্ রঅ গুরিনে উগুমো সমারে আর বেগ দাঙর্ দূতোর্ ডাগনি আর গোজেনর্ তূরীর ডাগনির্ লগে লগে প্রভু নিজে স্বর্গত্তুন্ লামি এবঅ। খ্রীষ্ট লগে এগত্তর্ ওইনে যিগুনে মুরি যেয়োন সেক্কে সিগুনে পত্তমে জেদা ওই উদিবাক্।

¹⁷ সে পরেদি আমি যিগুনে জেদা আর বাগী থেবং, আমারেয়ো আগজত্ প্রভু লগে মিজেবাত্যে তারা সমারে মেঘ ভিদিরে তুলি নেযা অবঅ। আর এবাবোত্যেগুরি আমি উমরত্যে প্রভু সমারে থেবং।

¹⁸ সেনত্যে তুমি এ কধানি কোইনে একজন আরেকজনরে সান্তনা দুয়ো।