১ থিষলনীকীয় 3 - Chakma Bible

^1-2 যেক্কে আমি আর সোজ্জ্য গুরি ন-পারিলোং সেক্কে এথেন্স শঅরত্ গায় গায় থানাগান ঠিগ্ গুরিনে আমা ভেই তীমথিয়রে পাধেলুং। তে খ্রীষ্ট পৌইদ্যেনে গম হবরান্ জানেবার কামত্ গোজেনর্ কাম গুরিয়্যে। আমি তারে পাধেয়্যেই যেন তে তমারে বিশ্বেজত্ থির্ থোই পারে আর উচ্চোমি দি পারে,

³ যেনে এ বেক্‌ দুগ্‌খানির্ মাধ্যমে তুমি কেঅ পিজেদি ন-যঅ। তুমি নিজেই কোই পারঅ যে, দুগ্-কষ্ট আমাত্যে ঠিগ্ গরা আঘে।

⁴ দুঘ্-কষ্ট যে আমা উগুরে এবঅ সেই কধাগান তমা লগে থেবার্ অক্তত্ আমি বার্‌বার্ কোইয়্যেই, আর তুমি কোই পারঅ যে, ঠিগ্ সিয়েনই ঘোট্যে।

⁵ সেনত্যে মুই যেক্কে আর সোজ্জ্য গুরি ন-পারিলুং সেক্কে বিশ্বেজ্ ইন্দিত্তুন্ তুমি কি অবস্থায় আঘঅ সিয়েন জানেবাত্যে তীমথিয়রে পাধেয়োং। মত্তুন্ দর্ গরেত্তে, অয়ত শদানে তমারে লুভ্ দেগেয়্যে আর আমার কামানি বেক্কানি ব্যত্ত ওই যেইয়্যে।

⁶ ইক্কিনে তীমথিয় তমাত্তুন্ আমা ইধু ফিরি এইনে তমার কোচ্‌পানা আর বিশ্বেজ্ পৌইদ্যেনে গম হবরান্ দিয়্যে। তে কোইয়্যেদে, কোচ্‌পানার মনভাব্‌পোই তুমি নিত্য আমারে ইদোত্ তুলি থাগঅ, আর আমি যেধোক্ক্যেন তমারে চেবাত্যে চের্ সেধোক্ক্যেন তুমিয়ো আমারে চেবাত্যে চর্।

⁷ ইয়েনত্যে ভেইলগ্, তীমথিয়র মুয়োদি তমার্ বিশ্বেজর্ কধানি শুনিনে আমার বেক্‌ যন্ত্রণাগানি আর দুঘোত্অ আমি সান্তনা পেইয়্যেই।

⁸ প্রভু উগুরে তমার্ বিশ্বেজ্ থির্ থেলে আমার জিংকানিগান বর্‌পেইয়্যে।

⁹ তমাত্যে গোজেন মুজুঙোত্ আমার যে হুজী, সিয়েনর্ বদলে কেধোক্ক্যেন গুরিনে যে তারে তমাত্যে ভালেদি জানেম সিয়েন আমি কোই ন-পারিই।

¹⁰ আমি দিন-রেত্ গোজেন ইধু রিবেঙত্তুন্ কোজোলি গুরির্ যেন আমি তমারে চেই পারিই আর তমার বিশ্বেজ্ ভিদিরে যে অভাব আঘে সিয়েন পুরেই দি পারিই।

¹¹ আমা বাব্‌পো আর গোজেনে নিজে আহ্ আমা প্রভু যীশু যেন তমা ইধু যেবার পথ্‌তান ঠিগ্ গুরি দে।‌

¹² প্রভু গোরোক্, আমি যেধোক্ক্যেন তমারে কোচ্‌পেই ঠিগ্ সেধোক্ক্যেন গুরিনে তমার্‌অ একজন আরেকজনরে, এমন কি, বেক্কুনো উগুরে কোচ্‌পানা যেন থায়।

¹³ সালে তে তমার মনানি থির্ গুরিবো, যাতে আমার প্রভু যীশু যেক্কে তার্ নিজোর বেক্‌ মানুচ্চুনোরে সমারে লোইনে এবঅ সেক্কে আমা বাব্‌পো আর গোজেন মুজুঙোত্ তুমি থুদো নেইয়্যে আর পবিত্র অ।