১ থিষলনীকীয় 2 - Chakma Bible

থিষলনীকীত্ পৌলর কাম

¹ ভেইলগ্, তুমি নিজেই কোই পারঅ, তমা ইধু আমার যানা ব্যত্ত ন-অয়।

² তুমি এ কধাগান্অ কোই পারঅ, ইয়েন্অ আগে ফিলিপী শঅরত্ আমি অত্যেচার ভুগ্ গোজ্জ্যেই আর অসর্মান্অ ওইয়্যেই। মাত্তর্ এ মানাগানি থেলেয়ো আমা গোজেনত্তুন্ সাহচ্‌ পেইনে তা গম হবরর্ কধানি আমি খুলোমেলা গুরি তমা ইধু কোইয়্যেই।

³ আমা উপদেচ্‌‌চানি ভুল শিক্ষ্যেত্তুন্ নয়, ভান্ন্যেই উদ্দেচ্চ্যত্তুন্অ নয়, বা আমি ছলনা গুরিনেয়ো কনঅ কধা ন-কোর্;

⁴ বরং যগাজ্জ্যে মনে গুরিনে গম হবর্ জানেবার ভারান্ গোজেনে আমা উগুরে দিয়্যে বিলিনে আমি সে ইজেবে কধা কোর্। মান্‌জ্যরে হুজী গুরিবাত্যে আমি এ কধানি ন-কোর্, মাত্তর্ যিবে আমার রিবেঙানি যাচাই গুরি চায় সেই গোজেনরে হুজি গুরিবাত্যে কোর্।

⁵ তুমি কোই পারঅ আমি কনদিন্অ বিগিদি গুরিনে কধা ন-কোই, আর লুভ্‌পানরে নাঢি থোইনেয়ো যে ছলনা গুরিনে কনঅ কধা আমি ন-কোই, গোজেনে তার্ সাক্ষী।

⁶ মান্‌জ্যত্তুন্, অত্তাৎ তমার বা অন্য কারত্তুন্ আমি সুনাঙ্ পেবার চেষ্টা ন-গুরিই। খ্রীষ্টর্ দূত ইজেবে আমা অধিকারান্ কামাক্কায় আমি তমা উগুরে খাদেই পারিদোং,

⁷ মাত্তর্ সিয়েনর্ বদলে মাবো যেধোক্ক্যেন তা নিজোর পুয়ো-ছাগুনোরে আদর-যত্তন্ গরে, তমা ইধু থেবার অক্তত্ আমিয়ো তমা লগে সেবাবোত্যে নরম বেবহার গোজ্জ্যেই।

⁸ তমা উগুরে গভীন মেয়্যে-মমতা থানায় তমারে বানা গোজেনর্ গম হবর্ দিবাত্যে নয়, তমাত্যে নিজো পরাণান্অ দিবাত্যে আমি রাজী এলং, কিয়া আমা ইধু তুমি ভারী পরাণর্।

⁹ ভেইলগ্, আমার কামানি আর দুঘোর্ কধানি খামাক্কায় তমার্ ইদোত আঘে। তমা ইধু গোজেনর্ গম হবরান্ ফগদাং গুরিবার সময় আমি দিন-রেত্ কাম গোজ্জ্যেই, যেনে আমি তমার কারঅ উগুরে কাঙেলেত্যে ন-ওই।

¹⁰ তুমি যিগুনে বিশ্বেজ্ গোজ্জ্য, তমা লগে আমার বেবহার যে পবিত্র, গম্ আর থুদো নেইয়্যে এলঅ, সিয়েনর সাক্ষী তুমিয়ো আঘঅ আর গোজেনেয়ো আঘে।

^11-12 তুমি কোই পারঅ, বাবে যেধোক্ক্যেন নিজো পুয়ো-ছাগুনোরে উচ্চোমি, সান্তনা আর কড়া গুরিনে উগুম দে, আমিয়ো তমারে পত্তিজনরে সিয়েনই দিদোং, যেন গোজেনর্ মানুচ্‌ ইজেবে তুমি গমেডালে চলঅ। গোজেনে তার্ নিজো রেজ্যগানর্ আর তার মহিমার ভাগী অবাত্যে তমারে ডাগের্।

¹³ আমি নিত্য গোজেনরে ভালেদি জানের্, কিয়া গোজেনর্ কধানি আমাত্তুন্ শুনিনে যেক্কে তুমি বিশ্বেজ্ গোজ্জ্য সেক্কে তুমি সিয়েন মান্‌জ্যর বিলিনে নয়, মাত্তর্ গোজেনর্ কধা বিলিনেই মানি লোইয়ো। আর ঘেচ্চ্যেকগুরি সিয়েন গোজেনর্ কধা। তুমি যিগুনে বিশ্বেজ্ গোজ্জ্য, তমা মনত্ সেই কধানিয়ে কাম গোজ্জ্যে।

¹⁴ ভেইলগ্, যিহূদিয়া রেজ্যত খ্রীষ্ট যীশু লগে গোজেনর্ যে মন্ডলীগুন্ আঘন, তমা অবস্থা তারা ধোক্ক্যেন। যিহূদীগুনো আঢত্ তারা যেত্তমান দুঘ্ পেইয়োন, তুমিয়ো নিজো দেজর্ মানুচ্চুনো আঢত্ সেই একই দুঘোত্ ভুগ্‌গো।

¹⁵ সেই যিহূদীগুনে প্রভু যীশুরে আর ভাববাদীগুনোরে মারে ফেল্ল্যন, আর আমা উগুরেয়ো তারা অত্যেচার্ গোজ্জ্যন্। তারা গোজেনরে বেজার্ গরন্, আর বেক্‌ মানুচ্চুনো উগুরে তারার্ শত্রু-ভাব আঘে।

¹⁶ তারা আমারে মানা গরন্ যেন অযিহূদীগুনোরে পাপত্তুন্ উদ্ধোরত্যে তারা ইধু আমি কনঅ কধা কোই ন-পারিই। এবাবোত্যেগুরি এই যিহূদীগুনে নিত্য পাপ উগুরে পাপ গোজ্জ্যন, আর গোজেনর্ রাগ্‌কান পুরোপুরি গুরিনে তারা উগুরে এইনে লুম্মেগি।

বিশ্বেজিগুনোরে চেবাত্যে পৌলর্ আওজ্

¹⁷ ভেইলগ্, মনত্তুন্ ন-অলেয়ো কিয়্যেন্দিত্তুন্ আমি খানক্‌কনত্যে তমাত্তুন্ দূরোত্ ওইয়্যেই। সেনত্যে আমি ভারী আওজ্ গুরিনে চেষ্টা গোজ্জ্যেদে যেনে আরঅ তমা লগে আমার্ দেগা অয়।

¹⁸ সেনত্যে আমি, বিশেষ গুরিনে মুই পৌল ভালোক্ বার্ তমা ইধু এবাত্যে চেইয়োং, মাত্তর্ শদানে আমারে মানা গোজ্জ্যে।

¹⁹ আমা প্রভু যীশু যেক্কে এবঅ সেক্কে তা মুজুঙোত্ তুমি কি আমার আজা, হুজী আর বাঈনী গুরিবার্ জিদেনার্ মালাছড়া ন-অবা?

²⁰ ঘেচ্চ্যেকগুরি, তুমি আমার বাঈনী গরেপারা , তুমি আমার্ হুজী।