১ থিষলনীকীয় 1 - Chakma Bible

থিষলনীকীয়গুনো ইধু পৌলর্ পত্তম চিধি

¹ বাবা গোজেন আর প্রভু যীশু খ্রীষ্ট লগে এগত্তর্ থিষলনীকীয় মন্ডলী ইধু সীল, তীমথিয় আর মুই পৌলে এ চিধিয়ান লিগির্। আমার বাবা গোজেন আর প্রভু যীশু খ্রীষ্ট তমারে দোয়্যে গোরোক্ আর শান্তি দান গোরোক্।

গোজেনরে ভালেদি জানানা

² আমি নিত্য তবনা গুরিনে তমা বেক্কুনো কধা ইদোত্ তুলিনে গোজেনরে ভালেদি জানেই থেই।

³ বিশ্বেজর্ কারনে তুমি যে কামানি গরর্, কোচ্‌পানার কারনে যে কামানি গরর্ আর আমার প্রভু যীশু খ্রীষ্ট উগুরে আজা রাগানার্ কারনে যে ধৈয্য ধরর্, সেই কধানি আমি নিত্য আমার বাবা আর গোজেন মুজুঙোত্ তবনা গুরিনে ইদোত্ তুলিই।

⁴ গোজেনর্ কোচ্‌পেইয়্যে মর্ ভেইয়ুন, আমি কোই পারিই তেয়ই তমারে বেঈ লোইয়্যে,

⁵ কিয়া আমার ফগদাং গোজ্জ্যে গম্ হবরান বানা কধালোই তমা ইধু ন-এজে, মাত্তর্ সিয়েন খেমতা, পবিত্র আত্মা আর পুরোপুরি নিচ্চিত্ গুরি এচ্চ্যে। তমা সমারে থেবার অক্তত্ তমার ভালেদিত্যে আমি কেধোক্ক্যেন গুরিনে আঢাউদো গোজ্জ্যেই সিয়েন তুমি কোই পারঅ।

⁶ বোউত্ অত্যেচারর্ ভিদিরেয়ো পবিত্র আত্মার দিয়্যে হুজিলোই সেই গম হবরান মানি লোইনে তুমি আমার আর প্রভু ধোক্ক্যেন গুরি চলর্।

⁷ ইয়েনত্ ম্যাসিডোনিয়া আর আখায়া রেজ্যর বেক্‌ বিশ্বেজিগুনো ইধু তুমি এক্কান আদর্শ ওইয়ো।

⁸ বানা ম্যাসিডোনিয়া আর আখায়া রেজ্যত্ যে তমাত্তুন্ প্রভুর কধানি ছিদি পোজ্জ্যে এমন নয়, মাত্তর্ গোজেন উগুরে তমার বিশ্বেজর্ কধায়ো বেক্‌ জাগানিত্ যেইনে লুম্মেগোই। এ পৌইদ্যেনে আমার্ কিচ্চু কনা দরকার নেই,

⁹ কিয়া তুমি কেধোক্ক্যেন গুরিনে আমারে মানি লোইয়ো মানুচ্চুনে সিয়েন আমারে জানাদন্। তারা আরঅ জানাদন্, তুমি কেধোক্ক্যেন গুরি দেবদেবীগুনোত্তুন্ ফিরিনে জেদা আর সত্য গোজেন ইধু এচ্চ্য যেন তার্ সেবা গুরি পারঅ,

¹⁰ আর স্বর্গত্তুন তা পুয়োবো এযানা পৌইদ্যেনে বাজ্জেই থেই পারঅ। সেই পুয়োবো অলঅ যীশু, যিবেরে তে মরণত্তুন্ জেদা গুরি তুল্ল্যে। গোজেনর্ যে সাজাগান লামি এজের্ সেই সাজাত্তুন্ এই যীশু আমারে রোক্ষ্যে গুরিবো।