১ শমূয়েল 9 - Chakma Bibleশৌলর রাজপদথ্ বর্ পানা 1 কীশ নাঙে বিন্যামীন-গুট্টির এক্কো সর্মানী তাগোয়্যে মানুচ্ এলঅ। কীশ অবীয়েলর পূঅ, অবীয়েল সরোরর্ পূঅ, সরোর বখোরতর পূঅ বখোরতে অফীহের পূঅ। 2 শৌল নাঙে কীশর এক্কো পূঅ এলঅ। তে এলদে বয়জসান্দোই গাবুজ্যে আর চাদে দোল্। ইস্রায়েলীয়গুনো ভিদিরে তা ধোক্ক্যেন দোল্ কেঅ ন-এলাক্। তে অন্য বেক্কুনোত্তুন্ প্রায় এক ফুট লাম্বা এলঅ। 3 শৌলর বাপ্পো কীশর্ যিদুক্কুন গাধী এলাক্ সিগুন একদিন্যে আজি গেলাক্। সেক্কে কীশে তার পূঅ শৌলরে কলদে, “তুই এক্কো চাগররে লগে নেযেইনে গাধীগুনোরে তোগেবাত্তে যাহ্।” 4 শৌলে সেক্কে সিগুনোরে তোগাদে তোগাদে ইফ্রয়িমর মুড়ো-মুুড়ি বামত্ আর শালিশা বামর্ ভিদিরেন্দি গেলঅ, মাত্তর্ সিগুনোরে ন-পেলঅ। সে পরেন্দি তারা শালীম বামান ইন্দি গেলঅ, মাত্তর্ গাধীগুনোরে সিদুয়ো পাহ্ ন-গেলঅ। সে পরেন্দি তারা বিন্যামীনীয়গুনোর বামত্ গেলাক্, আর সিদুয়ো সিগুনোরে ন-পেলঅ। 5 তারা যেক্কে সূফ বামত্ গেলাক্ সেক্কে শৌল তা সমারে চাগরুনোরে কলঅ, “আদঅ, আমি ফিরি যেই। সিয়েন ন-গুরিলে বাবা অয়ত গাধীগুনোর চিদে ন-গুরিনে আমাত্তে চিদে গুরিবো।” 6 মাত্তর্ সেই চাগরবো তারে কলঅ, “চাহ্, এই শঅরত্ গোজেনর এক্কো মানুচ্ থায়। তারে বেক্কুনে সর্মান গরন্ আর তে যিয়েনি কয় সিয়েনি হামাক্কায় ঘদে। আদিচ্, আমি ইক্কিনে সিদু যেই। তে অয়ত কোই দি পারিবো কন্ পদেন্দি আমাত্তুন্ যাহ্ পুরিবো।” 7 শৌল তার চাগরবোরে কলঅ, “মাত্তর্ যুনি আমি সিদু যেই সালে মানুচ্চোত্তে কি লোই যেবং? আমার থৈল্যে ভিদিরে যে খানাগানি এলঅ সিয়েনি দঅ শেজ্ ওই যেইয়্যে। গোজেনর মানুচ্চোরে দিবাত্তে কনঅ বক্শিজ্অ আমাত্তুন্ নেই। কি আঘে আমার?” 8 জোবত্ সেই চাগর্বো তারে কলঅ, “চাহ্, মত্তুন্ তিন গ্রাম রূবো আঘে। গোজেনর মানুচ্চোরে মুই সিয়েনোই দিম, আর তে আমারে কোই দিবো কন্ পদেন্দি আমাত্তুন্ যাহ্ পুরিবো।” 9 পুরোণি দিনোত্ ইস্রায়েল দেজর্ কনঅ মানুচ্ যুনি গোজেন ইত্তুন্ কনঅ পৌইদ্যেনে জানিবাত্তে চেদঅ সালে তে যেবার আগেন্দি কদঅ, “আদঅ, আমি ভাববাদীবো ইদু যেই।” ইক্কিনে যিবেরে ভাববাদী কুয়ো অদঅ পুরোণি দিনোত্ তারে কুয়ো অদঅ দর্শক। 10 শৌল তার চাগরবোরে কলদে, “দোল্ কোইয়োচ্; আদিচ্, আমি যেই।” ইয়েন কোইনে তারা গোজেনর মানুচ্চো যে শঅরত্ এলঅ সিদু গেলাক্। 11 যে পথতান্ শঅরর্ ইন্দি উঠ্যেগোই তারা যেক্কে সেই পথ্তান্ ধুরিনে উঠ্থোন্দোই সেক্কে কয়েক্কো মিলে সমারে তারার দেগা অলঅ। সেই মিলেগুনে পানি নিবাত্তে নিগিলি এচ্চ্যন্। তারা সেই মিলেগুনোরে পুযোর্ গুরিলাক, “দর্শকে কি ইদু আঘে?” 12 জোবত্ তারা কলাক্, “অয়, আঘে; আর এক্কেনা মুজুঙেন্দি উজেই যঅ। তুমি যাদিমাদি যঅ। তে এচ্চ্যেই আমা শঅরত্ এচ্চ্যে, কিত্যে উবোসনার উজু জাগানত্ এচ্চ্যে মানুচ্চুনে য়েমান-উৎসর্বর অনুষ্ঠান গুরিবাক্। 13 তুমি শঅরত্ সোমেলে তা সমারে তমার দেগা অবঅ। তুমি দেগিবা তে মুড়োমুড়ি উগুরে হেবাত্তে যার্। তে ন-যানা সং মানুচ্চুনে হানা-দানা ন-গুরিবাক্, কিত্যে তারে তাত্তুন্ উৎসর্বর জিনিসছানি বর্ দিয়্যে পুরিবো; সে পরেন্দি যিগুনোরে ডাগা ওইয়্যে তারা হেবাক্। তুমি ইক্কিনেই উদি যঅ, ইক্কিনেই তার দেগা পেবা।” 14 এই কধাগান শুনিনে তারা শঅর ইন্দি উদি গেলাক্। তারা শঅর ভিদিরে যেইনে দেগিলাক্ শমূয়েলে উবোসনার উজু জাগাত্ যেবাত্তে তারার ইন্দি এজের্। পদথ্ শমূয়েল সমারে তারার দেগা অলঅ। 15 শৌল এবার্ আগেদি দিনোত্ লগেপ্রভু শমূয়েল ইদু এই কধাগান ফগদাং গুরিলো, 16 “এযেত্যেকেল্যে এই সময়োত্ মুই বিন্যামীন-গুট্টির বামত্ এক্কো মান্জ্যরে তইদু পাদেম্। মর্ মানুচ্চুনোর, অত্তাৎ ইস্রায়েলীয়গুনোর নেতা অবাত্তে তুই তারে অভিষেগ্ গুরিবে। পলেষ্টীয়গুনোর আঢত্তুন্ তেয়ই মর্ মানুচ্চুনোরে উদ্ধোর গুরিবো। মর্ মানুচ্চুনোর ইন্দি মুই মনযোগ দুয়োং, কিত্যে তারার কানানিগানি মর্ কানত্ এইনে লুম্মেগি।” 17 শৌলরে দেগেবার লগে লগেই লগেপ্রভু শমূয়েলরে কলঅ, “চাহ্, ইবেয়ই সেই মানুচ্, যিবের্ কধা মুই তরে কোইয়োং। ইবেয়ই মর্ মানুচ্চুনোরে শাজন্ গুরিবো।” 18 শৌল গেদো ভিদিরে শমূয়েল ইদু যেইনে পুযোর্ গুরিলো, “দর্শকর ঘরান্ কুদু দোয়্যে গুরি মরে কোই দে।” 19 জোবত্ শমূয়েল শৌলরে কলঅ, “মুয়ই দর্শক। তুই মর্ আগেদি উবোসনার উজু জাগানত্ যাহ্, কিত্যে এচ্চ্যে তুই মর্ লগে খেবে। কেল্যে বেন্যে মুই তরে বিদেয় দিম্ আর তর্ মনত্ যাহ্ আঘে সিয়েনি তরে কোম্। 20 তিনদিন আগে তর্ যে গাধীগুন আজি যেইয়োন সিগুন্দোই তুই আর চিদে ন-গুরিচ্; সিগুন্ পাহ্ যেইয়োন। ইস্রায়েল দেজ ভিদিরে বেক্ গম্ গম্ ঝিনিসছানি কাত্তেই? সিয়েনি কি তর্ আর তর্ বাবর্ বংশর্ মানুচ্চুনোত্তে নয়?” 21 জোবত্ শৌলে কলদে, “তুই কিত্তে মরে এই কধানি হর্? ইস্রায়েলীয়গুনোর বেক্ গুট্টিগুনো ভিদিরে বিন্যামীনেই অলদে বেগত্তুন্ চিগোন, আর আমি সেই গুট্টির মানুচ্। আরঅ বিন্যামীন-গুট্টিত্ যিদুক্কুন বংশ আগন্ তা ভিদিরে আমা বংশবো এক্কুবারে ধুরিবার বারেন্দি।” 22 শমূয়েলে সেক্কে শৌল আর তার চাগরবোরে নেযেইনে হেবার ঘরত্ গেলঅ আর বাত্যেয়্যেগুনো ভিদিরে বেগত্তুন্ সর্মানিত জাগানত্ তারারে বোজেলাক্। বাত্যেয়্যেগুন মান্জ্যন্দি প্রায় ত্রিশজন এলাক্। 23 যে মানুচ্চো রান্যে শমূয়েলে তারে কলঅ, “যে য়েরাগান যুদো গুরিনে রাগেবাত্তে তরে দুয়োং সিয়েনি লোই আন্।” 24 সেক্কে তে যেইনে দামানা আর তা সমারে থেইয়্যে য়েরানি আনিনে শৌলর মুজুঙোত্ রাগেল। শমূয়েল শৌলরে কলঅ, “ইয়েন তত্তেই থুয়ো ওইয়্যে; তুই খাহ্। এচ্চ্যে তুই ইদু হেবে বিলিনে মানুচ্চুনোরে বাত্যেবার্ সময়োত্ মুই ইয়েনি তত্তে যুদো গুরি রাগেবাত্তে কোইয়োং।” শৌল সেদিন্যে শমূয়েল সমারে হানা-দানা গুরিলো। 25 ইয়েনর্ পরেন্দি তারা সেই উজু জাগানত্তুন্ শঅরত্ ফিরি এলাক্। সে পরেন্দি শমূয়েলে তা ঘরর্ ছালত্ শৌল সমারে কধাবাত্তা কলঅ। 26 তার কেল্যে বেন্যেপোত্যে তারা বেক্কুনে ঘুমোত্তুন্ উদিলাক্। পহর্ অনার পরেন্দি শৌল ছালত্ থাগদেই শমূয়েলে তারে ডাগিনে কলঅ, “যুক্কোল অ, মুই তরে ইক্কিনে বিদেয় দিম।” শৌল আর শমূয়েলে যুক্কোল্ ওইনে দ্বিজনে নিগিলি এলাক্। 27 শঅরর্ দুঝির্ কোয়-কুরে এইনে শমূয়েল শৌলরে কলঅ, “তর্ চাগরবোরে উজেই যেবাত্তে কঅ, মাত্তর্ তুই কানক্কণত্তে ইয়েনত্ থিয়্যে। গোজেনে যিয়েন কোইয়্যে সিয়েন মুই তরে শুনেম।” সেক্কে তার চাগরুনে উজেই গেলাক্। |
Copyright © 2021 Bangladesh Bible Society
Bangladesh Bible Society