১ শমূয়েল 8 - Chakma Bibleইস্রায়েলীয়গুনে রাজা চেলাক্ 1 শমূয়েলে বুড়ো বয়জত্ ইস্রায়েলীয়গুনোর শাজন্গুরিয়্যে ইজেবে তার পূঅগুনোরে কামর্ ভারান দিলো। 2 তার দাঙর্ পূঅবোর নাঙান্ এলঅ যোয়েল আর দ্বিলম্বর পূঅবোর নাঙান্ এলঅ অবিয়। তারা বের্-শেবাত শাজন্গুরিয়্যেগুনোর্ কামানি গুরিদাক্, 3 মাত্তর্ তারা তারার বাপ্পো ধোক্ক্যেন ন-চলিদাক্। তারা অন্যেয়গুরিনে ধন সোম্বোত্তি পেবার্ আজায়্ গম্ পথ্তান্ ছাড়ি দিলাক্। তারা ঘুষ নেযেইনে গমানরে ভান্ন্যেই আর ভান্ন্যেইয়ানরে গম্ বিলিনে রায় দিদাক্। 4-5 সেনত্তেই ইস্রায়েলীয় বুড়ো নেতাগুনে এগত্তর্ অলাক্ আর রামাত যেইনে শমূয়েলরে কলাক্, “চাহ্, তুই বুড়ো ওই যেইয়োচ্ আর তর্ পূঅগুনেয়ো তর্ পদেন্দি ন-আত্তন্, সেনত্তেই তুই অন্য জাদ্তুনো ধোক্ক্যেন আমারে শাজন্ গুরিবাত্তে এক্কো রাজা নেযা।” 6 “আমারে শাজন্ গুরিবাত্তে এক্কো রাজা নেযা,” মানুচ্চুনোর এই কধাগান শমূয়েল ইদু গম্ বিলিনে মনে ন-গুরিলো। সেনত্তেই তে লগেপ্রভুর্ ইদু তবনা গরা ধুরিলো। 7 সেক্কে লগেপ্রভু তারে কলঅ, “মানুচ্চুনে তরে যিয়েনি কদন্ তুই সিয়েনই গর্। তারা তরে এলাফেলা ন-গরন্, আজলে মরেই এলাফেলা গোজ্যন্ যেনে মুই তারা উগুরে রাজাগিরি ন-গরং। 8 মিসর দেজত্তুন্ তারারে নিগিলেই আনানার পরেন্দিত্তুন্ ধুরি এচ্চ্যে সং তারা মঅ উগুরে যিয়েনি গোজ্যন্ তর্ উগুরেয়ো সিয়েনিই গোজ্যন; মরে বাদ দিইনে তারা দেব-দেবেদার পূজো গোজ্যন্। 9 ইক্কিনে তুই তারার কধানি মানি নেযা; মাত্তর্ তুই তারারে উঝিয়ার্ গুরিনে কোই দে, তারা উগুরে যে রাজাবো রাজাগিরি গুরিবো তে তারার উগুরে কেধোক্ক্যেন্ বেবহার গুরিবো।” 10 যিগুনে শমূয়েল ইদু এক্কো রাজা চেইয়োন তারা ইদু শমূয়েলে লগেপ্রভুর বেক্ কধানি জানেল। 11 তে কলঅ, “যিবে রাজা ওইনে তঅ উগুরে রাজাগিরি গুরিবো তার বেবহারান্ এধোক্ক্যেন অবঅ: তে তমার ঝি-পূঅগুনোরে নেযেইনে সৈন্য ইজেবে কামত্ লাগেব; তারাত্তুন্ কেউ কেউ রথ-চালেয়্যে অবাক্, কেউ কেউ ঘোড়াচালেয়্যে অবাক্ আর কেউ কেউ তার বেক্ রথ্তানির আগে আগে দাবা দিবাক্। 12 তে নিজোত্তে কেওরে আজার সৈন্য উগুরে, কেওরে পঞ্চাশজন সৈন্য উগুরে সেনাপতি ইজেবে নেযেল। অন্যগুনোরে তে তার ভূইয়ো চাজঅ কামত্ আর ক্ষেত্-ক্ষেত্তি কাবিবার কামত্ আর যুদ্ধোর অাত্যেরানি আর রথর্ জিনস্চানি বানেবার কামত্ লাগেব। 13 তমা মিলেগুন্দোই তে তুম্বাজ্ জিনিস বানানা, রানানা আর পিদে সিগিবার কামত্ লাগেব। 14 তে তমারে বেগত্তুন্ গম্ ভূই, আংগুর ক্ষেত আর জলপাই বাগানত্ নেযেইনে তার কামগুরিয়্যেগুনোরে দিবো। 15 তমার শোজ্য আর আংগুরোর দশ ভাগর এক ভাগ নেযেইনে তে তার রাজঘরত্ কামগুরিয়্যে আর অন্য কামগুরিয়্যেগুনোরে দিবো। 16 তে তমার চাগর-চাগরানি আর তমার কাবিল্ গাবুজ্যেগুনোরে আর গাধাগুনোরে নেযেইনে নিজোর কামত্ লাগেব। 17 তমার ভেড়াছাগল পালর দশ ভাগর এক ভাগ তে নেযেব আর তুমি তার চাগর্ অবা। 18 সেদিন্যে তুমি তমার চেই নেযেয়্যে রাজাবোত্তে কাঁনিবে, মাত্তর্ সেক্কে লগেপ্রভু তমার ডাগানালোই শমত্ ন-দিবো।” 19 মাত্তর্ মানুচ্চুনে শমূয়েলর এই বেক্ কধানি শুনিবাত্তে রাজী ন-অলাক্। তারা কলাক্কে, “না, আমি এক্কো রাজা চেই। 20 সালে আমি অন্য বেক্ জাদ্তুনো ধোক্ক্যেন ওই পারিবোং। আমার রাজাবো আমারে শাজন্ গুরিবো আর আমা আগে আগে থেইনে যুদ্ধো গুরিবো।” 21 শমূয়েলে মানুচ্চুনোর বেক্ কধানি শুনিলো আর লগেপ্রভু ইদু সিয়েনি কলঅ। 22 সেক্কে লগেপ্রভু শমূয়েলরে কলদে, “তুই তারা কধানি শুন্ আর তারাত্তেই তুই এক্কো রাজা নেযা।” সেক্কে শমূয়েলে ইস্রায়েলীয়গুনোরে কলদে, “তুমি নিজোর নিজোর ঘরত্ ফিরি যঅ।” |
Copyright © 2021 Bangladesh Bible Society
Bangladesh Bible Society