১ শমূয়েল 6 - Chakma Bible

সাক্ষ্য-সুন্দুক্কো ফিরেই দেনা

¹ লগেপ্রভুর সুন্দুক্কো সাত মাস সং পলেষ্টীয়গুনোর দেজত্‌ রলঅ।

² পরেন্দি পলেষ্টীয় শাজন্‌গুরিয়্যেগুনে ধর্মগুরু আর গোণোক্কেগুনোরে ডাগিনে কলাক্, “আমি লগেপ্রভুর সুন্দুক্কো নেযেইনে কি গুরিবোং? আমারে কঅ, কেধোক্ক্যেনগুরি আমি ইবেরে তার নিজোর জাগানত্‌ পাধেই দিবোং?”

³ তারা কলাক্, “তুমি যুনি ইস্রায়েলীয়গুনোর গোজেনর সুন্দুক্কো পাধেই দুয়ো সালে সুদোগুরি পাধেই নদুয়ো। তুমি হামাক্কাই তাইদু এক্কান দুষ-স্বীগের্ গোজ্যে লেগা পাধেই দিবা। সালে তুমি গম্‌ অবা আর জানি পারিবাদে, কিত্তে তার দরঅ আত্তান্‌ তঅ উগুরেত্তুন সোরেই ন-যার্‌।”

⁴ সেক্কে শাজন্‌গুরিয়্যেগুনে পুযোর্ গুরিলাক, “দুষ-স্বীগের্‌ ইজেবে আমি তাইদু কি পাধেই দিবোং?” তারা কলাক্, পলেষ্টীয়গুনোর শাজেন্‌গুরিয়্যেগুনোর সোংখ্যে মজিম্ তুমি পাচছুয়ো সনার টিউমার আর পাচছুয়ো সনার উন্দুর পাধেই দো, কিত্যে মানুচ্চুনো উগুরে আর তারার শাজন্‌গুরিয়্যেগুনো উগুরে এক্কুই আঘাত এচ্চ্যে।

⁵ যে টিউমার পিড়েগান তমার কিয়্যেত্‌ দেগা দিয়্যে আর যে উন্দুরুনে তমার দেজচান্‌ ভস্ত গুরি দেদন্‌ তুমি সিগুনোর মূত্তিগুন বানঅ আর ইস্রায়েলীয়গুনোর গোজেনর বাঈনী গরঅ। সালে অয়ত তে তমা উগুরেত্তুন আর তমার দেবেদাগুনোত্তুন আর দেজর উগুরেত্তুন তার দরঅ আত্তান্‌ সোরেই নেযেব।

⁶ তুমি কিত্তে ফরৌণ আর মিসরীয়গুনো ধোক্ক্যেন গুরি নিজোর মনানিরে দরঅ গোজ্য? ইস্রায়েলীয়গুনোর গোজেনে যেক্কে মিসরীয়গুনোরে ভুল বানেয়্যে সেক্কে তারা ইস্রায়েলীয়গুনোরে যেবাত্তে দুয়োন, আর তারা আদি যেয়োন্দোই।

⁷ “ইক্কিনে তুমি এক্কান নূয়ো গাড়ী বানঅ আর দুধ দেদে এবাবোত্যে দ্বিবে পাড়ী গোরু নেযঅ যিগুনোরে উগুরে কনদিনঅ জুঙোল্‌ দিয়্যে ন অয়। সিগুনোরে তুমি সেই গাড়িগানত্‌ বানি দুয়ো, মাত্তর্‌ তারার বাছুরুন তারাত্তুন্ সোরেনেই ঘরত্‌ নেযেবা।

⁸ সে পরেন্দি লগেপ্রভুর সুন্দুক্কো তুমি সেই গাড়ীগান উগুরে বোজেবা আর দুষ-স্বীগের্ গুরিবাত্যে যেদক্কানি সনার জিনিস তুমি লগেপ্রভুরে পাদেবা সিয়েনি এক্কো বাক্‌সু ভিদিরে গুরিনে সুন্দুক্কো ইদু রাগেবা। এধোক্ক্যেনগুরি সুন্দুক্কো পাধেই দিবা যেনে সিবে যায়ই।

⁹ মাত্তর্‌ খিয়েল্‌ রাগেবা, সুন্দুক্কো যুনি নিজোর দেজছানর পথ্‌তান্‌ ধুরিনে বৈৎ-শেমশত্‌ যায় সালে বুঝিবাদে, আমা উগুরে এই জদবদে অমংলান লগেপ্রভুই আন্যে। মাত্তর্‌ যুনি সেই পদেন্দি ন-যায় সালে আমি বুঝি পারিবোঙে, আমা উগুরে এই আঘাত্তান্‌ তা আঢত্তুন ন-এজে, এম্‌নেই সিয়েন আমা উগুরে এচ্চ্যে।”

¹⁰ তারা সেক্কে সিয়েনই গুরিলাক্। মানুচ্চুনে দুধ দেদে দ্বিবে গোরু চর্‌মা নেযেইনে গাড়ীত্‌ বানি দিলাক্ আর তারার ছঅগুনোরে ঘরত্‌ আক্‌সোই রাগেলাক্।

¹¹ সে পরেন্দি তারা সেই গাড়ীগান উগুরে লগেপ্রভুর সুন্দুক্কো রাগেলাক্ আর তার কায়-কুরে রাগেলাক সেই বাক্‌সুবো যিবে ভিদিরে এলঅ সনার উন্দুর আর সনার টিউমারুন।

¹² সেক্কে ছর্‌মা গোরু দ্বিবে ডেনে-বাঙে ন-ঘুরিনে অম্ব অম্ব গুরি রাজপদ মোক্কে সোজা বৈৎ-শেমশর ইন্দি গেলাক্। পলেষ্টীয়গুনোর শাজন্‌গুরিয়্যেগুনে গাড়ীগানর পিজে পিজে বৈৎ-শেমরর দুঝি সং গেলাক্।

¹³ বৈৎ-শেমশর মানুচ্চুনে সেক্কে কিঝিঙো ভিদিরে গম্‌ কাবদন্‌। তারা রিনি চেইনেই সুন্দুক্কো তারার চোগোত্‌ পুরিলো আর তারা হুজি অলাক্।

¹⁴ বৈৎ-শেমশত্‌ এইনে গাড়ীগান যিহোশূয়র ক্ষেদ ইদু এক্কো দাঙর্‌ পাত্তরর্‌ ইদু যেইনে থামেল। ইস্রায়েলীয়গুনে সেই গাড়ীগানর তক্তানি কাবি নেযেইনে সেই দ্বিবে ছর্‌মা গোরুলোই লগেপ্রভুর নাঙে এক্কো পুজ্যে-উৎসর্বর অনুষ্ঠান গুরিলাক্।

¹⁵ ইয়েনর্ আগেন্দি লেবীয়গুনে লগেপ্রভুর সুন্দুক্কো আর সনার জিনিস সহ বাক্‌সুবো লামেনে সেই দাঙর্‌ পাত্তর্‌বো উগুরে রাগেলাক্। সেদিন্যে বৈৎ-শেমশর মানুচ্চুনে লগেপ্রভুর নাঙে পুজ্যে আর অন্য উৎসর্বর অনুষ্ঠান গুরিলাক্।

¹⁶ পলেষ্টীয়গুনোর সেই পাচজন শাজন্‌গুরিয়্যে বেক্কানি দেগিনেই সেদিন্যেই আরঅ ইক্রোণত্‌ ফিরি গেলাক্।

¹⁷ লগেপ্রভুর নাঙে দুষ-স্বীগের্ ইজেবে পলেষ্টীয়গুনোর যেদক্কানি শঅরর্‌ পক্ষত্তুন এক্কো গুরি সনার টিউমার পাদেয়োন সিয়েনি অলঅ অস্‌দোদ, গাজা, অস্কিলোন, গাত আর ইক্রোণ।

¹⁸ সেই পাচজন শাজন্‌গুরিয়্যেগুনোর অধীনোত্‌ পলেষ্টীয়গুনোর পাচ্ছান দেবাল্লোই-ঘিজ্যে শঅর্‌ আর সিয়েনির লগে দেবাল-নেইয়্যে আদামানির পক্ষত্তুন পলেষ্টীয়গুনে সনার উন্দুর পাদেয়োন। পলেষ্টীয়গুনোর চাগালাগান্‌ এলঅ বৈৎ-শেমশত্‌ যিহোশূয়র ক্ষেদ ভিদিরে দাঙর্‌ পাত্তর্‌বো সং, যিবে উগুরে তারা লগেপ্রভুর সুন্দুক্কো লামেই রাগেয়োন। সিবে এজঅ সিদু আঘে।

¹⁹ বৈৎ-শেমশর কিজু মানুচ্ লগেপ্রভুর সুন্দুক্কো ভিদিরে খুলিনে চেইয়োন বিলি লগেপ্রভু তারারে মারে ফেলেল। তে সেক্কে সে জাগানর্‌ পঞ্চাশ আজার সত্তুর জন মান্‌জ্যরে মারে ফেলেল। তে এই জদবদে আঘাত্তান্‌ গোজ্যে বিলি মানুচ্চুনে আবিলেচ্‌ খা ধুরিলাক্।

²⁰ তারা কলাক্, “এই পবিত্র গোজেন লগেপ্রভুর মুজুঙোত্‌ কন্না টিগিই থেই পারিবো? ইয়োত্তুন ইক্কিনে তারে কাইদু পাদা যায়?”

²¹ সে পরেন্দি তারা কয়েকজন মান্‌জ্যর্ মাধ্যমে কিরিয়ৎ-যিয়ারীমর মানুচ্চুনো ইদু কোই পাদেলাক্, “পলেষ্টীয়গুনে লগেপ্রভুর সুন্দুক্কো ফিরেই দুয়োন। তুমি লামি এইনে সুন্দুক্কো তমা ইদু লোই যঅ।”