১ শমূয়েল 5 - Chakma Bible

পলেষ্টীয়গুনো ইদু লগেপ্রভুর সাক্ষ্য-সুন্দুক্কো

¹ পলেষ্টীয়গুনে গোজেনর সুন্দুক্কো এবন্-এষরত্তুন অস্‌দোদ শঅরত্‌ নেযেলাক্।

² গোজেনর সুন্দুক্কো তারা দাগোন দেবেদাবোর মন্দিরোত্‌ নেযেইনে দাগোনর মূত্তিবোর্ ইদু রাগেলাক্।

³ তারকেল্যে অস্‌দোদর মানুচ্চুনে বেন্যেপোত্যে উদিনে দেগিলাক্ দাগোনে লগেপ্রভুর সুন্দুক্কোর মুজুঙোত্‌ মাদিত্‌ মাদা নিগিরিনে পড়ি আঘে। তারা সেক্কে দাগোনর মূত্তিবো তুলি নেযেইনে তা জাগায়ানত্‌ রাগেলাক।

⁴ সে পরেন্দি দিন্নোত্‌অ তারা বেন্যেপোত্যে উদিনে দেগিলাক দাগোনে লগেপ্রভুর সুন্দুগোর মুজুঙোত্‌ মাদিত্‌ উবোত্‌ পুন্দুরী ওই পড়ি আঘে। তার্ মাদাবো আর আত্তানি ভাঙিনে দোরােন চৌকাত্তুনো উগুরে পড়ি আঘে, বানা কিয়্যেগানর বাগী কট্টাগান পড়ি আঘে।

⁵ ইয়েনত্যেই দাগোনর ধর্মগুরু আর অন্য যিদুক্কুন মানুচ্‌ অস্‌দোদর দাগোনর মন্দিরোত্‌ সুমিদাক্ তারা এজঅ সং কনজনে সেই মন্দিরোর দোরান চৌকাদ উগুরে টেং ন-দোন্।

⁶ লগেপ্রভু অস্‌দোদ আর তার কায়-কুরে জাগায়ানির মানুচ্চুনোরে আগন্দে কানাবোত্‌ টিউমার রুক্কোই জদবদে আঘাত গুরিনে তারারে মারে ফেলেল।

⁷ এই অবস্থা দেগিনে অস্‌দোদর মানুচ্চুনে কলাক্, “আমি ইস্রায়েলীয়গুনোর গোজেনর সুন্দুক্কো আমা ইদু আর ন-রাগেবং, কিত্যে তে আমারে আর আমা দেবেদা দাগোনরে অমহদ আঘাত গোজ্যে।”

⁸ সেনত্যেই তারা মানুচ্‌ পাদেইনে পলেষ্টীয়গুনোর বেক্‌ শাজন্‌গুরিয়েগুনোরে এক্কান জাগাত ডাগি আনিনে পুযোর্ গুরিলাক, “ইস্রায়েলীয়গুনোর গোজেনর সুন্দুক্কো নেযেইনে আমি কি গুরিবোং?” তারা কলাক্, “ইস্রায়েলীয়গুনোর গোজেনর সুন্দুক্কো গাত শঅরত্‌ নেযা ওক্।” সেক্কে অস্‌দোদর মানুচ্চুনে ইস্রায়েলীয়গুনোর গোজেনর সুন্দুক্কো গাদত্‌ নেযেলাক।

⁹ তারা সুন্দুক্কো সিদু নেযানার পরেন্দি লগেপ্রভু সেই শঅরানর্‌ বিরুদ্ধে আঢ্ তুলিলো। সেক্কে সে জাগার মানুচ্চুনে অমহদ দোরেলাক্। তে শঅরর্‌ চিগোন-দাঙর্‌ বেক্‌ মানুচ্চুনোরে আঘাত গুরিলো, আর সেক্কে বেক্কুনোর সেই টিউমার পিড়েগান্‌ অলঅ।

¹⁰ সেক্কে তারা গোজেনর সুন্দুক্কো ইক্রোণ শঅরত্‌ পাধেই দিলাক্। গোজেনর সুন্দুক্কো ইক্রোণত্‌ নেযানার পরেন্দি ইক্রোণর মানুচ্চুনে কিজেক্ ছাড়িনে কলাক্, “আমার আর আমা মানুচ্চুনোরে মারে ফেলেবাত্যেই ইগুনে ইস্রায়েলীয়গুনোর গোজেনর সুন্দুক্কো আমা ইদু আন্যন্।”

¹¹ তারা মানুচ্‌ পাধেইনে পলেষ্টীয়গুনোর বেক্‌ শাজন্‌গুরিয়েগুনোরে এক্কান জাগাত্‌ ডাগি আনিনে কলাক্, “ইস্রায়েলীয়গুনোর গোজেনর সুন্দুক্কো ইয়োত্তুন পাধেই দুয়ো। সিবে তার নিজোর জাগাদই ফিরি যোক্‌। সিয়েন ন-অলে সিবে আমার আর আমার মানুচ্চুনোরে মারে ফেলেব।” গোজেনে সেই শঅরানরে জদবদে গুরি আঘাত গরানায় মানুচ্চুনোর মনত্‌ মরণর অমহদ দর্‌বুক লাক্কে।

¹² যিদুক্কুন মানুচ্‌ মুরি ন-যান তারার্‌অ সেই টিউমার পিড়ে ওইয়্যে। সেক্কে শঅরর্‌ মানুচ্চুনোর কানাকুদির্ রঅবো যেন আগাজ সং লুমিলোগোই।