১ শমূয়েল 31 - Chakma Bibleশৌল আর যোনাথনর মরাণা 1 এ ভিদিরে পলেষ্টীয়গুনে ইস্রায়েলীয়গুনোর বিরুদ্ধে যুদ্ধো গোজ্যন্ আর ইস্রায়েলীয়গুনে তারার্ মুজুঙোত্তুন্ ধেই যাদন্। তারা ভিদিরেত্তুন্ ভালোক্কুনে গিলবোয় মুড়োবোত্ পলেষ্টীয়গুনোর আঢত্ মারা পড়িলাক্। 2 পলেষ্টীয়গুনে শৌল আর তার পূঅগুনোর পিজেন্দি লোড়েইনে তার পূঅ যোনাথন, অবীনাদব আর মল্কীশূয়রে মারে ফেলেলাক্। 3 সে পরেন্দি শৌলর বিরুদ্ধে আরঅ অমকদ যুদ্ধো চলা ধুরিলো। ধনুবলা সৈন্যগুনে তারে দেগিনে আঘাত গুরিলাক্। 4 শৌল সেক্কে তার অাত্যের্ বুয়োইয়্যে মানুচ্চোরে কলঅ, “তর্ লাম্বা ছুড়িগান নিগিলেনে মর্ কিয়্যেগান এফুর্-উফুর্ গুরি দে। সিয়েন ন-গুরিলে সেই চুনুগুলোবোর্ মাঢাবোর চামান্ ন-কাপ্যে মানুচ্চুনে এইনে মর্ কিয়্যেগান এফুড়-উফুড় গুরিবাক্ আর মরে অগমান গুরিবাক্।” মাত্তর্ তার অাত্যের্ বোইয়্যেবো সিয়েন্ গুরিবাত্যে রাজী ন-অলঅ, কিত্যে তে অমকদ দোরেইয়্যে। সেক্কে শৌল তার লাম্বাছুড়িগান্ লোইনে নিজেই তা উগুরে পড়িলো। 5 শৌল মোজ্যে দেগিনে তার আত্যের্ বোইয়্যেবোয়ো নিজোর্ লাম্বাছুড়িগান উগুরে পড়িনে শৌল সমারে মুরি গেলঅ। 6 এবাবোত্যেগুরি সেদিন্যে শৌল, তার তিন্নো পূঅ, তার অাত্যের্ বোইয়্যেবো আর তা সমারে মানুচ্চুনে একলগে মুরি গেলাক্। 7 যিদুক্কুন্ ইস্রায়েলীয় কিঝিঙোর্ অন্য কিত্তেন্দি এলাক্ আর যিগুনে যর্দন গাঙর্ উইপারত্ এলাক্ তারা যেক্কে দেগিলাক্, ইস্রায়েলীয় সৈন্যগুনে ধেই যেইয়োন্ আর শৌল আহ্ তা পূঅগুনে মুরি যেইয়োন্ সেক্কে তারায়ো তারার্ শঅর্ আর আদামানি ফেলেইনে ধেই গেলাক্, আর পলেষ্টীয়গুনে এইনে সিয়েনি গজক্ গুরি নেযেলাক্। 8 তার্কেল্যে পলেষ্টীয়গুনে মরা মানুচ্চুনোর্ বেক্ পযাপিরানি লুদেবাত্যে এইনে দেগিলাক্ গিল্বোয় মুড়োবো উগুরে শৌল আর তার্ তিন্নো পূঅর্ মরা কিয়্যেগানি পোজ্যে আঘে। 9 তারা শৌলর মাঢাবো কাবি ফেলেলাক্ আর তার উজ্যে কাবড়-চুগোরানি আর অাত্যেরানি খুলি নেযেলাক্। এ হবরানি তারার্ বেক্ দেবেদা-মন্দিরোত্ আর মানুচ্চুনো ইদু ফগদাং গুরিবাত্তে তারা পলেষ্টীয়গুনোর দেজত্ বেক্ জাগায়ানিত্ সিয়েনি পাধেই দিলাক্। 10 সে পরেন্দি তারা শৌলর অাত্যেরানি নেযেইনে অষ্টারোৎ দেবীর মন্দিরোৎ রাগেলাক্ আর তার কিয়্যেগান বৈৎ-শান শঅরর্ দেবালত্ টাঙেই দিলাক্। 11 পলেষ্টীয়গুনে শৌল উগুরে যিয়েনি গোজ্যন্ যাবেশ-গিলিয়দর মানুচ্চুনে সিয়েনি শুনিলাক্। 12 সেক্কে সিদুগোর্ বীর সৈন্যগুনে গোদা রেত্তো আদিনে বৈৎ-শানত্ যেইনে শৌল আর তা পূঅগুনোর মরাকিয়্যেগানি দেবালত্তুন্ লামেলাক্ আর যাবেশত নেযেইনে সিয়েনি আগুনোত্ পুড়ি দিলাক্। 13 সে পরেন্দি তারা তারার আড়ুন নেযেইনে সিদুগোর্ এক্কো ঝাউ গাজর্ তলে গোর্ দিলাক্ আর সাত দিন সং উবোস থেইনে কাদেলাক্। |
Copyright © 2021 Bangladesh Bible Society
Bangladesh Bible Society