১ শমূয়েল 30 - Chakma Bibleদায়ূদে অমালেকীয়গুনোরে ভস্ত গুরিলো 1-2 দায়ূদে তা মানুচ্চুনোরে নেযেইনে তিন দিনোত্ সিক্লগত্ যেইনে লুমিলো। মাত্তর্ এ ভিদিরে অমালেকীয়গুনে নেগেভত্ পলেষ্টীয়গুনোর চাগালাত্ আর সিক্লগত্ লুদেয়োন্। তারা সিক্লগ্কান্ আক্রমণ গুরিনে পুড়ি ফেলেই দিইনে সিদুুগোর্ বেক্ মিলেগুনোরে আর চিগোন-দাঙর্ বেক্কুনোরে বন্দী গুরি নেযেয়োন। মাত্তর্ কনজনরে তারা মারেই ন-ফেলান, বানা ফিরি যেবার্ অক্তত্ তারা সমারে নেযেলাক্। 3 দায়ূদে তার মানুচ্চুনোরে লোইনে সিক্লগত্ ফিরি এইনে দেগিলোদে শঅরান্ আগুন্দোই পুড়ি দিয়্যে ওইয়্যে আর তারার্ মোক্ আর ঝি-পূঅগুনোরে বন্দী গুরিনে নেযা ওইয়্যে। 4 এ অবস্থা দেগিনে দায়ূদে আর তার মানুচ্চুনে দাঙর্ দাঙর্ গুরি কানা ধুরিলাক্। যেরেন্দি এন্ অবস্থা অলঅ, তারার্ কানিবার্ বলঅ আর ন-রলঅ। 5 দায়ূদোর দ্বিবে মোক্, যিষ্রীয়েলর অহিনোয়মে আর কর্মিলোর আদাম্মে নাবলর্ নেক্ মোজ্যে অবীগলে বন্দী ওইয়োন। 6 সেক্কে দায়ূদে দাঙর্ দজাত্ পোজ্যে, কিত্যে ঝি-পূঅগুনোত্তে তার মানুচ্চুনোর্ মনান্ দায়ূদো উগুরে এন্ তিদে ওই উঠ্যে, তারা দায়ূদোরে পাত্তর্ মারিবার্ কধানি কুয়োকি গত্তন্। মাত্তর্ দায়ূদে তার্ গোজেন লগেপ্রভুর উগুরে নির্ভর গুরিনে মনত্ বল্ পেলঅ। 7-8 দায়ূদে সেক্কে অহীমেলকর পূঅ দাঙর্ ধর্মগুরু অবিয়াতররে কলঅ, “এফোদ্তো মইদু আন।” সিবে আনানার্ পরেন্দি দায়ূদে লগেপ্রভুরে পুযোর্ গুরিলো, “মুই সেই আক্রমণগুরিয়্যে দলর্ পিজেন্দি লোড়েম্? গুরিলে কি তারারে ধুরি পারিবে?” জোবত্ লগেপ্রভু কলদে, “অয়, লড়া। তুই হামাক্কায় তারারে ধুরি পারিবে আর বেক্কুনোরে উদ্ধোর্ গুরি পারিবে।” 9 সেক্কে দায়ূদে তার ছয়শ মানুচ্ সমারে নেযেল। তারা বিষোর নাঙে এক্কো মুড়োর্ খাত্তোঙত্ যেইনে আঝিল্ অলাক্। সিয়েনত্ কিজু মান্জ্যরে থোই যাহ্ অলঅ। 10 প্রায় দ্বিশত মানুচ্ বল্পোজ্যে ওইনে সেই খাত্তোঙান্ পার্ ওই ন-পারিলাক্। দায়ূদে চেরশত্ মানুচ্ নেযেইনে শত্রুগুনোর পিজেন্দি লোড়েইনে গেলাক্। 11 পরেন্দি এক্কো মাদ ভিদিরে তা মানুচ্চুনে এক্কো মীসরীয় মান্জ্যরে দেগিলাক্। তারা তারে দায়ূদো ইদু নেযেলাক্ আর হানা আর পানি হেবাত্তে দিলে তে সিয়েনি হেলঅ। 12 সে পরেন্দি তারা তারে ডুমুরোর্ তালর এক কট্টা আর দ্বিতাল কিশমিশ হেবাত্তে দিলাক্। তিনদিন তিনরেত্ তে হানা বা পানি কিচ্ছু ন-খায়, সেনত্যেই এদক্কানি হেইনে তে যেনে পরাণান্ ফিরি পেলঅ। 13 দায়ূদে মানুচ্চোরে পুযোর্ গুরিলো, “তুই কার্ মানুচ্? কুত্তুন্ এচ্ছোস্?” মানুচ্চো কলঅ, “মুই এক্কো মিসরীয় গাবুজ্যে, এক্কো অমালেকীয়গুনোর চাগর্। এচ্চ্যে তিন দিন অলঅ মর্ অসুখ ওইয়্যে, সেনত্যেই মর্ গিরোজ্সো মরে ফেলেই যেয়েগোই। 14 আমি নেগেভত্ করেথীয়গুনোর চাগালাত্, যিহূদা চাগালাত আর কালেব চাগালাত্ লুদেবাত্তে যেইয়্যেই আর সিক্লগ আগুন্দোই পুড়ি ফেলেই দিয়্যে।” 15 দায়ূদে কলঅ, “সেই লুদেয়্যেগুনো ইদু কি তুই মরে নেযেই পারিবে?” জোবত্ তে কলঅ, “তুই গোজেনর্ নাঙে শমক্ খেইনে কঅ, তুই মরে মারেয়ো ন-ফেলেবে বা মঅ গিরোজ্সোর্ আঢত্ তুলিয়ো ন-দিবে। সালে মুই তরে তারার্ ইদু নেযেম্।” 16 পরেন্দি তে দায়ূদোরে সে দল ইদু নেযেল। তারা সেক্কে এক্কো মাদ ভিদিরে ছিদি পোজ্যন্ আর হানা-দানা গোজ্যন্ আর মদ খেইনে ফুত্তি গোজ্যন্, কিত্যে পলেষ্টীয়গুনোর দেজ্চান আর যিহূদা চাগালাত্তুন্ তারা বোউত্ পযাপিরা লুদেইনে আন্যন্। 17 দায়ূদে সেদিন্যে বেল্যেত্তুন্ ধুরি আরাম্ভ গুরিনে তারকেল্যে সাজোন্যে সং তারার্ লগে যুদ্ধো গুরিলো। তারা ভিদিরেত্তুন্ কনজনে রোক্ষ্যে ন-পেলাক্, বানা চেরশত্ গাবুজ্যে উদোর্ পিদিত্ গুরিনে ধেই গেলাক্। 18 অমালেকীয়গুনে যিয়েনি লুদেইনে আন্ন্যন্ সিয়েনি বেক্কানি তে উদ্ধোর্ গুরিলো। তার্ দ্বিবে মোগোরেয়ো তে উদ্ধোর্ গুরিলো। 19 তারার্ কম্ বা বেশ্ বয়জর্ মানুচ্, তারার্ পূঅ বা ঝি আর যেদক্কানি জিনিস অমালেকীয়গুনে লুদেয়োন্ বা লোই আন্যন্ সিয়েনির্ কিচ্ছু বাদ ন-পড়িলো; দায়ূদে বেক্কানি ফিরেই আনিলো। 20 তে অমালেকীয়গুনোর বেক্ গোরু-ভেড়াগুনো নেযেল। তার্ মানুচ্চুনে সিগুনোরে অন্য য়েমানপালুনোর্ আগে আগে লোড়েইনে যাহ্ ধুরিলাক্। তারা কলাক্, “ইগুন দায়ূদোর্ লুদেয়্যে জিনিস।” 21 যে দ্বিশত মানুচ্ বল্পোজ্যে ওইনে দায়ূদোর্ লগে যেই ন-পারন, যিগুনোরে বিষোর খাট্টোঙান ইদু ফেলেই যাহ্ ওইয়্যে, দায়ূদে তারা ইদু ফিরি এলঅ। সে মানুচ্চুনে দায়ূদ আর তা সমারে মানুচ্চুনোরে উজেই নিবাত্তে এচ্চ্যে। দায়ূদ আর তার মানুচ্চুনে তারার্ ইদু যানার্ পরেন্দি দায়ূদে তারারে উদো ললঅ। 22 মাত্তর্ দায়ূদোর লগে যিগুনে যেইয়োন তারা ভিদিরে যিগুনে পাজি আর বেজাল্যে মানুচ্ এলাক তারা কলাক্, “ইগুনে আমার লগে ন-যান বিলিনে আমি যিয়েনি উদ্ধোর গুরিনে ফিরেই আন্যেই সিয়েনি তারারে ন-দিবোং। ইগুনে বানা যে যার্ বৌগুনোরে আর ঝি-পূঅগুনোরে নেযাদোক্।” 23 জোবত্ দায়ূদে কলঅ, না, না, মর্ ভেইয়ুন, লগেপ্রভু মরে যিয়েনি দিয়্যে সিয়েনি লোইনে তুমি এধোক্ক্যেন ন-গোজ্য। তে আামরে রোক্ষ্যে গোজ্যে আর আমার লুদেয়্যেগুনোরে আমা আঢত্ তুলি দিয়্যে। 24 তমার এদক্কানির কধালোই কনজনে রাজী ন-অবাক্। যিগুনে যুদ্ধোত্ যেইয়োন্ আর যিগুনে পযাপিরানি চুগি দুয়োন্ তারা বেক্কুনে এধোক্ক্যেন্ ভাগ পেবাক্। 25 সেদিন্যেত্তুন্ ধুরি দায়ূদে ইস্রায়েলীয়গুনোত্তে সেই মজিম্ সুদোমানি ঠিগ্ গুরি দিলো আর সিয়েনি এজঅ চালু আঘে। 26 সিক্লগত্ ফিরি এইনে দায়ূদে যিহূদা-গুট্টির বুড়ো নেতাগুনো ইদু লুদেয়্যে মালর কিজু ভাগ পাধেই দিলো। তারা অলাক্কে তার দাংগু। তে তারা ইদু এ কধানি কোই পাদেল, “লগেপ্রভুর শত্রুগুনোত্তুন্ লুদেই আন্যে পযাপিরানিত্তুন্ মুই তমার ইদু কিজু বক্শিজ্ পাদেলুং।” 27 যিদুক্কুন বুড়ো নেতা ইদু সিয়েনি পাধেই দিয়্যে অলঅ তারা অলাক্কে বৈথেলর, রামোৎ-নেগেভর, যত্তীরোর, 28-31 অরোয়েরের, শিফমোতর, ইষ্টিমোয়র আর য়েমানচোড়েইয়্যে মানুচ্ সিগুন বাদেয়ো যিরহমেলীয় আর কেনীয়গুনো শঅরর্ বুড়ো নেতাগুনোর আর হর্মার, কোর-আশনের, অথাকর আর হিব্রোণর বুড়ো নেতাগুনোরে আর যেদক্কানি জাগাত্ দায়ূদ আর তার মানুচ্চুনে হানা-দানা গুরিদাক্ সেই বেক্ জাগার্ বুড়ো নেতাগুনো ইদুয়ো তে সিয়েনি পাধেই দিলো। |
Copyright © 2021 Bangladesh Bible Society
Bangladesh Bible Society