১ শমূয়েল 29 - Chakma Bibleআখীশ দায়ূদরে ফেরৎ পাদেল 1 পলেষ্টীয়গুনে অফেকত্ তারার বেক্ সৈন্যগুন এগত্তর্ গুরিলাক্। ইন্দি ইস্রায়েলীয়গুনে যিষ্রিয়েলর উইফুদোর্ ইদু তারার্ তাম্বুলান ফেলেলাক্। 2 পলেষ্টীয় শাজন্গুরিয়্যেগুনে শত শত-সৈন্য আর আজার আজার-সৈন্যর দলুন্ নেযেইনে উজেই গেলাক্, আর তারার পিজেন্দি আখীশোর লগে দায়ূদে তা মানুচ্চুন্ লোইনে আদিলো। 3 সিয়েন দেগিনে পলেষ্টীয় সেনাপতিগুনে পুযোর্ গুরিলাক্, “এ বেক্ ইব্রীয়গুনে ইয়েনত্ কিত্তে?” আখীশে কলঅ, “ইবে দঅ ইস্রায়েলীয়গুনোর রাজা শৌলর চাগর্ দায়ূদ। তে দ্বিএক বজর্ ধুরিনে মইদু আঘে। শৌলরে ফেলেই এজানার দিন্নোত্তুন্ ধুরিনে এচ্চ্যে সং মুই তাইদু কনঅ দুষ ন-পাং।” 4 এ কধাগান শুনিনে পলেষ্টীয় সেনাপতিগুনে আখীশো উগুরে রাগ গুরিনে কলাক্, “মানুচ্চোরে তুই ফেরৎ পাধেই দে। তুই তারে যে জাগায়ান দুয়োচ্ তে সিয়োদোই ফিরি যোক্। তে আমা লগে যুদ্ধোত্ যেই ন-পারিবো। সালে যুদ্ধোত্ যেইনে তে আমা বিপক্ষে যেবঅ। তার্ গিরোজ্সোরে হুজি গুরিবাত্তে অলে তারে দঅ আমা মানুচ্চুনোর মাঢাবোলোই সিয়েন গরা পুরিবো। 5 ইবে কি সেই দায়ূদে নয়, যিবের্ বিষয়ে তারা নাজি নাজি গেইয়োন, ‘শৌলে আজার আজার মারিলো আর দায়ূদে মারিলো অযুত অযুত’?” 6 আখীশে সেক্কে দায়ূদোরে ডাগিনে কলঅ, “জেদা লগেপ্রভুর নাঙে কঙর্, মুই হবর্ পাং তুই গম্ মানুচ্। এ সৈন্যগুনো ভিদিরে তুই যিয়েনি গোজ্যস্ সিয়েনি মরে হুজি গোজ্যস্। তর্ এবার দিন্নোত্তুন্ ধুরি এচ্চ্যে সং মুই তঅ ভিদিরে অন্যেয় কিচ্ছু ন-দেগং, মাত্তর্ অন্য শাজন্গুরিয়্যেগুনে তর্ উগুরে হুজি নয়। 7 সেনত্যেই তুই সুগে-শান্তিয়ে ফিরি যাহ্; তুই এমন্ কিজু ন-গুরিচ্ যেনে পলেষ্টীয় শাজন্গুরিয়্যেগুনে বেজার্ অন্।” 8 সেক্কে দায়ূদে পুযোর্ গুরিলোদে, “মাত্তর্ মুই কি গোজ্যং? মর্ এবার্ দিন্নোত্তুন্ ধুরিনে এচ্চ্যে সং তর্ এই চাগর্বো ভিদিরে তুই কি দুষ পেইয়োচ্ যিয়েনত্তে মুই মর্ প্রভু মহারাজর শত্রুগুনোর বিরুদ্ধে যুদ্ধো গুরিবাত্তে যেই ন-পারিবে?” 9 জোবত্ আখীশে কলঅ, “মুই হবর্ পাং মইদু গোজেনর এক্কো দূতোর্ ধোক্ক্যেন্ গম্; তো পলেষ্টীয় সেনাপতিগুনে কদন্ তুই যেনে মঅ লগে যুদ্ধোত্ ন-যাচ্। 10 সেনত্যেই তুই আর তর্ গিরোজর্ যিদুক্কুন্ মানুচ্ তর্ লগে এচ্চ্যন্ তুমি কেল্যে বেন্যে উদো আর পহর্ অনার লগে লগে যেয়োগোই।” 11 সেনত্যেই দায়ূদ আর তার মানুচ্চুনে পলেষ্টীয়গুনোর দেজত্ ফিরি যেবাত্তে বেন্যেপোত্যে উদিলাক্, আর পলেষ্টীয়গুনে যিষ্রিয়েলত্ গেলাক্। |
Copyright © 2021 Bangladesh Bible Society
Bangladesh Bible Society