১ শমূয়েল 28 - Chakma Bibleশৌলে নিরাশা অলঅ 1 দায়ূদে সিক্লগত্ থেবার্ অক্তত্ পলেষ্টীয়গুনে ইস্রায়েলীয়গুনোর বিরুদ্ধে যুদ্ধো গুরিবাত্তে সৈন্য থুবেলাক্। সেক্কে আখীশ দায়ূদোরে কলঅ, “তুই হামাক্কায় বুঝি পারর্, তরে আর তঅ মানুচ্চুনোরে সৈন্যদলত্ মিজেইনে মঅ লগে যাহ্ পুরিবো।” 2 দায়ূদে কলঅ, “গম্, তুই নিজেই দেগিবে তর্ চাগর্বো কি গুরি পারে।” আখীশে কলঅ, “বেশ্ গম্। মুই তরে গোদা জিংকানিবর্ মর্ কিয়্যেগান্ রোক্ষ্যে গুরিয়্যে ইজেবে নেযেম্।” 3 ইয়েনর্ আগেন্দি শমূয়েলে মুরি যেইয়্যে, আর ইস্রায়েলীয়গুনে বেক্কুনে তাত্তে আবিলেচ্ গুরিনে তারে তার নিজোর্ শঅর্ রামাত্ গোর্ দুয়োন। যিগুনে মরা মানজ্যর্ আত্মা সমারে কধাবাত্তা কন্ আর যিগুনে ভান্ন্যেই আত্মা সমারে মিজেন্ শৌল দেজত্তুন্ এধোক্ক্যেন বেক্ মানুচ্চুনোরে নিগিলেই দিয়্যে। 4 পলেষ্টীয়গুনে এক সমারে এগত্তর্ ওইনে শূনেমত্ যেইনে তাম্বুল ফেলেলাক্। ইন্দি শৌলেয়ো বেক্ ইস্রায়েলীয় সৈন্যগুনোরে এগত্তর্ গুরি নেযেইনে গিল্বোয় মুড়োবোত্ যেইনে তাম্বুল ফেলেলাক্। 5 পলেষ্টীয়গুনোর সৈন্যগুন্ দেগিনে শৌল দোরেল আর তা বুক্কো অমকদগুরিনে গির্গিরে উদিলো। 6 তে কি গুরিবো সিয়েন লগেপ্রভুর ইত্তুন্ জানিবাত্তে চেলঅ, মাত্তর্ লগেপ্রভু তারে কনমতেই জোব্ ন-দিলো-স্ববনেয়ো ন-দিলো, ঊরীম দিইনেয়ো নয় বা ভাববাদী দিইনেয়ো নয়। 7 শৌল সেক্কে তার কামগুরিয়্যেগুনোরে কলঅ, “তুমি এনজান্ এক্কো মিলেমান্জ্যরে থগঅ, যে মরা মানজ্যর্ আত্মা সমারে কধা কোই পারে, যেনে তাইদু যেইনে মুই পুযোর্ গুরি পারং মুই কি গুরিম্।” তারা কলাক্, “ঐন্দোরোত্ সেধোক্ক্যেন এক্কো মিলেমানুচ্ আঘে।” 8 এ কধাগান শুনিনে শৌল অন্যবাবোত্যে কাবড়-চুগোড়্ উরিনে নিজোর্ পরিচয়ান্ গুমুরোত্ রাগেইনে রোদোত্ দ্বিজন মান্জ্যরে লগে নেযেইনে সে মিলেবো ইদু গেলঅ। তে সেই মিলেবোরে কলঅ, “তুই মন্ত্র পুরিনে মরা মানজ্যর্ আত্মা সমারে উদোলোলি গুরিনে মুই যিবের্ নাঙান্ কোম্ তারে ইদু তুলি আন্।” 9 সেক্কে মিলেবো তারে কলঅ, “শৌল ইয়েনি পৌইদ্যেনে যিয়েনি গোজ্যে সিয়েনি তত্তুন্ কামাক্কায় অজানা নয়। যিগুনে মরা মানজ্যর্ আত্মা সমারে কধা কন্ বা ভান্ন্যেই আত্মা সমারে মিজেন্ এধোক্ক্যেন বেক্ মানুচ্চুনোরে তে দেজত্তুন্ ধাবেই দিয়্যে। সালে কিত্তে তুই মত্তে এধোক্ক্যেন এক্কো ফাল্ পাস্তোস্ যিবে মর্ মরণ ঘোদেব?” 10 শৌল সেক্কে লগেপ্রভুর নাঙে শমক্ খেইনে কলদে, “জেদা লগেপ্রভুর নাঙে কঙত্তে, ইয়েনত্যে তঅ উগুরে কনঅ সাজা ন-এবঅ।” 11 সেক্কে মিলেবো তারে পুযোর্ গুরিলো, “মুই সালে তত্তে কারে তুলি আনিম?” শৌল কলঅ, “শমূয়েলরে আন।” 12 পরেন্দি শমূয়েলরে দেগিনে মিলেবো কিজেক্ ছাড়িনে শৌলরে কলঅ, “তুই মরে কিত্তে ঠোগেলে? তুয়ই দঅ শৌল।” 13 রাজা তারে কলঅ, “তর্ কনঅ দোরেবার্ নেই; তুই কি দেগর্?” মিলেমানুচ্চো কলঅ, “মুই দেগঙর্, এক্কো দেবেদা মাদি তলেত্তুন্ উদি এজের্।” 14 শৌল পুযোর্ গুরিলো, “তে চাদে কেন্জান্?” তে কলঅ, “এক্কো বুড়ো মানুচ্ উদি এজের্; তা কিয়্যেত্ লাম্বা পোজাক্ আঘে।” সেক্কে শৌল বুঝি পারিলো, তে শমূয়েল। তে মাদিত্ মাদা নিগিরি পড়িনে সালাম গুরিলো। 15 শমূয়েল শৌলরে কলঅ, “কিত্তে তুই মরে তুলি আনিনে কাঙেলেত্যে গুরিলে?” শৌল কলঅ, “মুই অমকদ দজাত্ পোজ্যং। ইন্দি পলেষ্টীয়গুনে মঅ বিরুদ্ধে যুদ্ধো গত্তন্ আর উন্দি গোজেনে মরে ছাড়িনে যেয়্যেগোই। তে আর মর্ ডাগানালোই ন-শুনিলো-ভাববাদীগুনোর মাধ্যমেও ন-দিলো, স্ববনর্ মাধ্যমেও ন-দিলো। সেনত্যে ইক্কিনে মত্তুন্ কি গরানা উজিত্ সিয়েন জানিবাত্তে তরে ডাগি আন্যং।” 16 শমূয়েলে কলঅ, লগেপ্রভু যেক্কে তরে ছাড়িনে তর্ বিপক্ষেন্দি যেইয়্যে সেক্কে মরে আর পুযোর্ গরর্ কিত্তে? 17 তে মর্ মাধ্যমে যিয়েনি কোইয়্যে সিয়েনিই গোজ্যে। তর্ রেজ্যগান্ তে তঅ আঢত্তুন্ কারি নেযেইনে তর্ জাদর্- ভেই দায়ূদোরে দিয়্যে। 18 তুই লগেপ্রভুর কধা ন-শুনোচ্ আর অমালেকীয়গুনোর বিরুদ্ধে তার যে অমকদ রাগ সিয়েনি তর্ কামর্ ভিদিরেন্দি ফগদাং ন-গরচ্, সেনত্যে তে এচ্চ্যে তঅ উগুরে এধোক্ক্যেন গোজ্যে। 19 লগেপ্রভু পলেষ্টীয়গুনোর আঢত্ তরে আর তর্ লগে ইস্রায়েলীয়গুনোরে তুলি দিবো। কেল্যে তুই আর তর্ পূঅগুনে মঅ লগে থেবাক্। তে ইস্রায়েলর সৈন্যদলুনোরেয়ো পলেষ্টীয়গুনোর আঢত্ তুলি দিবো। 20 শমূয়েলর কধানি শুনিনে শৌল অমকদ দোরেইনে সেক্কে মাদিত্ লাম্বা ওইনে পড়িলো। সারা দিন আর সারা রেত্ কিচ্ছু ন-খানার কারণে তার কিয়্যেত্ কনঅ বল্ ন-রলঅ। 21 সে মিলেবো শৌলর ইদু যেইনে দেগিলোদে, তে অমকদ দোয়েইয়্যে। সেনত্যেই তে কলঅ, “চঅ, তর্ চাগরানীবো তর্ উগুম পালন গোজ্যে। তুই মরে যিয়েনি গুরিবাত্যে কোইয়োচ্ পরাণান আদত্ গুরিনে মুই সিয়েনি গোজ্যং। 22 ইক্কিনে তুইয়ো দোয়্যে গুরিনে তর্ চাগরানীবোর্ এক্কান কধা শুন্। মুই তঅ মুজুঙোত্ কিজু হানা রাগেম্। তুই সিয়েনি হানার পরেন্দি পধেন্দি আদিবার্ বল্ পেবে।” 23 মাত্তর্ শৌল রাজী ন-ওইনে কলদে, “না, মুই ন-হেম্।” মাত্তর্ তা মানুচ্চুনে সে মিলেমানুচ্চো সমারে অমকদ কোজোলী গরা ধুরিলাক্। যেরেন্দি তে তারার কধানি শুনিলো আর মাদিত্তুন্ উদিনে খাদত্ বঝিলো। 24 সে মিলেবোর্ ঘরত্ পোক্তা-মোক্তা এক্কো গোরু ছঅ এলঅ। তে যাদিমাদি গুরিনে সিবে কাবিলো আর কিজু ময়দেলোই সিবে মিজেইনে সদাছাড়া পিদে বানেল। 25 সে পরেন্দি শৌল আর তা মানুচ্চুনোর মুজুঙোত্ তে সিয়েনি আনিলো আর তারা সিয়েনি হেলাক্। পরেন্দি রেদোত্ তারা উদিনে সিয়োত্তুন্ গেলাক্। |
Copyright © 2021 Bangladesh Bible Society
Bangladesh Bible Society