১ শমূয়েল 24 - Chakma Bibleশৌল উগুরে দায়ূদোর দোয়্যে 1 শৌল পলেষ্টীয়গুনোরে লড়ানা শেজ্ গুরিনে ফিরি এজানার পরেন্দি মানুচ্চুনে তারে হবর্ দিলাক্, দায়ূদে ঐন-গদীর ধূল্যেচর-চাগালাত্ আঘে। 2 শৌল সেক্কে ইস্রায়েলীয়গুনো ভিদিরেত্তুন তিন আজার মানুচ্ বেঈ নেযেল আর দায়ূদ আর তা মানুচ্চুনোরে তোগেবাত্তে ঝার্বো ছাগলর মুড়ো নাঙে জাগায়ান ইদু গেলাক্। 3 পধেন্দি যাদে যাদে তে এন্ এক্কান্ জাগাত্ এলঅ যিয়েনত্ ভেড়া রাগেবার কয়েক্কান খুয়োর্ এলঅ। সে জাগায়ানর ইদু এক্কো গাট্ এলঅ। শৌল আগিবাত্তে সে গাট্টোত্ সোমেল। সে গাট্টোর এক্কুবারে ভিদিরেন্দি এলদে দায়ূদ আর তা মানুচ্চুনে। 4 দায়ূদোর মানুচ্চুনে কলাক্, “লগেপ্রভু যে দিন্নোর কধা তরে কোইয়্যে এচ্চ্যে সেদিন্নো এই যেইয়্যে। তে কলদে, ‘মুই তর্ শত্রুবোরে তর্ আঢত্ তুলি দিম্ আর তা উগুরে তর্ যিয়েন্ গম বিলিনে মনে গরচ্ তুই সিয়েনই গুরিবে।’ ” সেক্কে দায়ূদে জুরো গুরি উদিনে শৌলর পোজাক্কানত্তুন্ এক কট্টা কাবি নেযেল। 5 শৌলর পোজাক্কানত্তুন্ এক কট্টা কাবি নেযানার কারণে দায়ূদোর চিত্তোবো তারে দুষী বিলি মনে গরের্। 6 তে তার মানুচ্চুনোরে কলঅ, “মর্ গিরোচ্ছো বিরুদ্ধে, লগেপ্রভুর অভিষেগ্ গোজ্যে মানুচ্চুনোর বিরুদ্ধে আঢ্ তুলোদে লগেপ্রভু কনদিন্অ মরে অনুমতি ন-দিবো, কিত্যে তে দঅ লগেপ্রভুর অভিষেগ্ গোজ্যে মানুচ্।” 7 এ কধাগান কোইনে দায়ূদে তা মানুচ্চুনোরে থামেই দিলো আর শৌলরে আক্রমণ গুরিবাত্তে ন-দিলো। পরেন্দি শৌল গাদত্তুন্ নিগিলিনে আঢা মারিলো। 8 সে পরেন্দি দায়ূদেয়ো গাদত্তুন্ নিগিলিলো আর দাঙর্ গুরি শৌলরে ডাগিনে কলঅ, “প্রভু, মহারাজ!” শৌলে যেক্কে পিজেন্দি ফিরি চেলঅ সেক্কে দায়ূদে মাদিত্ মাদা নিগিরি পড়িনে তার সালাম গুরিলো। 9 এচ্চ্যে দঅ তুই নিজোর চোগেই দেগিলে, যিদুক্কুন মান্জ্যে তরে কোইয়োন দায়ূদে তরে ক্ষতি গুরিবার চেট্ট্যা গোজ্যে, তুই কিত্তে তারার কধানি শুন্যচ্? 10 এচ্চ্যে দঅ তুই নিজোর চোগেন্দি দেগিলে, লগেপ্রভু কেধোক্ক্যেনগুরি এ গাট্টো ভিদিরে তরে মর্ আঢত্ তুলি দিলো। মরে কয়েকজনে কোইয়োন তরে মারে ফেলেবাত্তে, মাত্তর্ তর্ উগুরে মর্ মেয়্যে অলঅ। মুই কোইয়োং, মর্ গিরোজ উগুরে মুই আঢ্ ন-তুলিম, কিত্যে তে লগেপ্রভুর অভিষেগ্ গোজ্যে মানুচ্। 11 ও মর্ বাবা, এই চাহ্, মঅ আঢত্ তর্ পোজাগর্ এক্কান কট্টা। মুয়ই তর্ পোজাগত্তুন্ এ কট্টাগান কাবি নেযেয়োং মাত্তর্ তরে মারেই ন-ফেলাং। সালে তুই এবেরা বুঝি পারিলে আর হবর্ পেলে, তর্ উগুরে কনঅ অন্যেয় বা উল্লোমীর্ মনভাব মর্ মনত্ নেই। মুই তর্ বিরুদ্ধে কনঅ পাপ ন-গরং, মাত্তর্ তুই মরে মারে ফেলেবাত্তে উৎ পাদিনে আগচ্। 12 লগেপ্রভুই যেনে মর্ আর তর্ বিচের্ গরে আর মঅ উগুরে তুই যে অন্যেয় গোজ্যচ্ সিয়েনর ফল দে; তো মুই তঅ বিরুদ্ধে আঢ্ ন-তুলিম। 13 পুরোণি মানুচ্চুনোর্ ঢাগঅ কধাত্ আগেদে, পাজির্ ভিদিরেত্তুন এজেদে পাজি কামানি, সেনত্যেই মুই তর্ বিরুদ্ধে আঢ্ তুলিবাত্তে ন-যেম্। 14 “ইস্রায়েলর রাজাবো কার পিজেন্দি নিগিলি এচ্চ্যে? কার পিজেন্দি তুই লোড়েনেই ফিরোর্? কিত্তে তুই এক্কো মরা কুগুরোর্ পিজেন্দি, এক্কো পুগোর্ পিজেন্দি লড়র্? 15 লগেপ্রভুই যেনে বিচের্ গুরিনে মর্ আহ্ তর্ পৌইদ্যেনে রায় দে। তেয়ই যেনে মর্ কামানি দেগিনে মর্ পক্ষেন্দি থিয়্যেই আর তর্ আঢত্তুন্ মরে রোক্ষ্যে গরে।” 16 দায়ূদোর কধানি থুম্ অনার্ পরেন্দি শৌল কলদে, “বাবা দায়ূদ, ইয়েনি কি তুয়ই কধা কর্?” ইয়েনি কোইনে তে দাঙর্ দাঙর্ গুরি কানা ধুরিলো। 17 তে দায়ূদোরে কলঅ, “তুই মত্তুন্ বেশ্ ন্যায়বলা, কিত্যে মুই তর্ লগে ভান্ন্যেই বেবহার গুরিলেয়ো তুই মর্ লগে দোল্ বেবহার্ গোজ্যচ্। 18 তুই যে মঅ উগুরে দোল্ বেবহার গুরি এজর্ সিয়েনি এচ্চ্যে তুই মরে জানেলে। লগেপ্রভু তঅ আঢত্ মরে তুলি দিয়্যে মাত্তর্ তুই মরে মারে ন-ফেলাস্। 19 কনজনে যুনি শত্রুরে আঢত্ পায় সালে তে কি তার কনঅ ক্ষতি ন-গুরিনে তারে ইরি দে? এচ্চ্যে তুই মঅ উগুরে যে বেবহারান্ গুরিলে তাত্যেই লগেপ্রভু যেনে তরে ভালেদি গরে। 20 মুই ইক্কিনে হবর্ পাং, তুই হামাক্কায় রাজা অবে আর তর্ মাধ্যমে ইস্রায়েল রেজ্যগান থিদেবর্ অবঅ। 21 সেনত্যেই ইক্কিনে তুই লগেপ্রভুর নাঙে মইদু এ শমক্তান্ গর্, তুই মর্ পরেন্দি মর্ বংশধরুনোরে ভস্ত ন-গুরিবে আর মঅ বাবর্ বংশত্তুন্ মর্ নাঙানঅ ফুযি ন-ফেলেবে।” 22 দায়ূদে শৌলর ইদু সেই শমক্তান্ গুরিলো। ইয়েনর পরেন্দি শৌল ঘরত্ ফিরি গেলঅ, আর দায়ূদে তার মানুচ্জন নেযেইনে তার সেই লুগি থেই পারেদে জাগানত্ উদি গেলগোই। |
Copyright © 2021 Bangladesh Bible Society
Bangladesh Bible Society