১ শমূয়েল 23 - Chakma Bibleকিয়ীলা শঅরর্ উদ্ধোর্ 1 মানুচ্চুনে দায়ূদোরে যেইনে কলাক্, “চঅ, পলেষ্টীয়গুনে কিয়ীলা শঅরান আক্রমণ গোজ্যন্ আর সে জাগার খামারুনোর শোজ্যগুন লুদেয়োন্।” 2 দায়ূদে যেক্কে লগেপ্রভুরে পুযোর্ গুরিলো, “মুই কি যেইনে সেই পলেষ্টীয়গুনোরে আক্রমণ গুরিম?” জোবত্ লগেপ্রভু তারে কলঅ, অয়, যাহ্। পলেষ্টীয়গুনোরে আক্রমণ গুরিণে কিয়ীলাগান্ রোক্ষ্যে গর্। 3 মাত্তর্ দায়ূদোর মানুচ্চুনে কলাক্, “এ যিহূদা চাগালাত্ আমি দরে দরে আগিই; তা উগুরে কিয়ীলাদত্ পলেষ্টীয় সৈন্যগুনোরে আক্রমণ গুরিবাত্তে যানা কি আরঅ দর্গরেপাড়া বেপার নয়?” 4 সেক্কে দায়ূদে আরঅ লগেপ্রভুররে পুযোর্ গুরিলো আহ্ লগেপ্রভু জোবত্ তারে কলঅ, “তুই কিয়ীলাদত্ যাহ্, মুই তর্ আঢত্ পলেষ্টীয়গুনোরে তুলি দিম।” 5 দায়ূদে সেক্কে তা মানুচ্চুনোরে নেযেইনে কিয়ীলাদত্ গেলাক্ আর পলেষ্টীয়গুনোর লগে যুদ্ধো গুরিনে তারার গোরু -ভেড়া বেক্কুন আনিলাক্। তে পলেষ্টীয়গুনোর বোউত্ মান্জ্যরে মারে ফেলেইনে কিয়ীলার মানুচ্চুনোরে রোক্ষ্যে গুরিলো। 6 অহীমেলকর পূঅ অবিয়াথর কিয়ীলাদত্ দায়ূদোর ইদু ধেই এবার অক্তত্ লগে গুরিনে দাঙর্ ধর্মগুরুগুনোর এফোদতুয়ো আন্যে। শৌল দায়ূদোরে লোড়েল 7 দায়ূদ কিয়ীলাদত্ আঘে শুনিনে শৌল কলঅ, “গোজেন দায়ূদোরে এবেরা মর্ আঢত্ তুলি দিয়্যে, কিত্যে শঅরর্ গেট্টুন্ লাগাড়ালোই বন্ধ গরা যায় এন্ জাগাত্ চোমেইনে তে নিজেই নিজোরে আক্সোই ফেলেয়্যে।” 8 কিয়ীলাদত্ যেইনে দায়ূদে আর তার মানুচ্চুনোরে ঘিরিবাত্তে শৌল তার বেক্ সৈন্যগুনোরে যুদ্ধো গুরিবাত্তে ডাগিলো। 9 দায়ূদে যেক্কে হবর্ পেলঅ, শৌল তার বিরুদ্ধে কুজুুরোমি গরের্ সেক্কে তে ধর্মগুরু অবিয়াতররে কলঅ, “তর্ এফোদতো ইদু আন্।” 10 পরেন্দি তে কলঅ, “ও ইস্রায়েলীয়গুনোর গোজেন লগেপ্রভু, তর্ চাগর্ মুই হামাক্কায় হবর্ পাংগে, শৌল মত্তেই কিয়ীলা ভস্ত গুরিবাত্তে ইদু এবার সল্লা গোজ্যে। 11 কিয়ীলার মানুচ্চুনে কি মরে তা আঢত্ তুলি দিবাক্? মুই যেধোক্ক্যেন শুন্যং সেধোক্ক্যেনগুরিনে শৌল কি হামাক্কায় ইদু এবঅ? ও ইস্রায়েলীয়গুনোর গোজেন লগেপ্রভু, তর্ এ চাগর্বোরে তুই সিয়েনি কোই দে।” লগেপ্রভু কলঅ, “অয়, তে এবঅ।” 12 সেক্কে দায়ূদে আরঅ পুযোর্ গুরিলো, কিয়ীলার মানুচ্চুনে কি মরে আর মর্ মানুচ্চুনোরে শৌলর আঢত্ তুলি দিবাক্? লগেপ্রভু কলঅ, “অয়, দিবাক্।” 13 এ কধাগান শুনিনে দায়ূদে তা লগে প্রায় ছয়শত্ মানুচ্ নেযেইনে কিয়ীলা ছাড়িনে গেলগোই আর এক জাগাত্তুন আরেকজাগাত্ ধেইনে বেড়া ধুরিলো। দায়ূদে কিয়ীলাদত্তুন্ ধেই যেইয়্যে শুনিনে শৌল আর সিদু ন-গেলঅ। 14 দায়ূদে ধূল্যে-চড় চাগালাত্ তাম্বুলো ধোক্ক্যেন জাগায়ানিত্ আর সীফ ধূল্যে-চড় চাগালাত্ মুড়োমুড়ি জাগাত্ থাহ্ ধুরিলো। দিন্কে দিন শৌল তারে থগা ধুরিলো মাত্তর্ গোজেনে তা আঢত্ দায়ূদোরে পরিবাত্তে ন-দিলো। 15 সীফ ধূল্যে-চড় চাগালাত্ হরেশত্ থেবার অক্তত্ দায়ূদে শুনিলোদে, শৌল তারে মারে ফেলেবাত্তে নিগিল্যে। 16 ইন্দি শৌলর পূঅ যোনাথনে হরেশত্ দায়ূদো ইদু যেইনে তারে গোজেন উগুরে নির্ভর গুরিবাত্তে উচ্চোমি দিলো। 17 যোনাথনে কলঅ, “তুই ন-দোরেচ্; মঅ বাপ্পো শৌলর আঢত্ তুই ধরা ন-পরিবে। তুয়ই ইস্রায়েল দেজ উগুরে রাজগিরি গুরিবে, আর মর্ জাগায়ান্ অবঅ তর্ পরেন্দি। মর্ বাবায়ো সেই কধাগান হবর্ পাই।” 18 তারা দ্বিজনে লগেপ্রভুরে সাক্ষী রাগেইনে এক্কো চুক্তি গুরিলাক্। পরেন্দি যোনাথনে ঘরত্ গেলগোই মাত্তর্ দায়ূদে হরেশত্ থেই গেলঅ। 19 ইন্দি সীফ আদামর্ মানুচ্চুনোরে গিবিয়াতত্ শৌল ইদু যেইনে কলঅ, “দায়ূদে আমা ভিদিরে লুগি আঘে। তে হরেশ ইদু যিশীমোনর দোগিণেন্দি হখীলা মুড়োবোর তাম্বুলো ধোক্ক্যেন জাগায়ানিত্ থায়। 20 মহারাজ, তর্ আওজ্মজিম তুই আয়। তারে রাজার আঢত্ তুলি দেনাগান আমার কাম্।” 21 জোবত্ শৌলে কলঅ, “লগেপ্রভু তমারে আশিদ্বাদ গোরোক্, কিত্যে মত্যে তমার মেয়্যে আঘে। 22 তুমি যেইনে আরঅ গমেডালে তার হবর্ লঅ; তে কুদু থায় আর কুদু যায় আর সিয়েনত্ কন্না তারে দেখ্যে সিয়েনি হবর্ লঅ। 23 তার পৌল্যেই থেবার বেক্ জাগায়ানি নিগিলেবে। সে পরেন্দি দোল্ হবর্ লোইনে ফিরি এজানার পরেন্দি মুই তমা লগে যেম্। তে যুনি দেজর্ ভিদিরে থায় সালে মুই যিহূদার বেক্ বংশগুনো ভিদিরেত্তুন তারে তোগেইনে নিগিলেম্।” 24 সে মানুচ্চুনে সেক্কে শৌলর আগে আগে যাহ্ ধুরিনে সীফোত্ ফিরি গেলাক্। দায়ূদে তার মানুচ্চুনোরে নেযেইনে সেক্কে যিশীমোনর দোগিণেন্দি অরাবায় মায়োন ধূল্যেচর-চাগালাত্ এলঅ। 25 শৌল আর তার মানুচ্চুনে দায়ূদোরে তোগেবাত্তে গেলাক্। দায়ূদে সে হবরান্ পেইনে সিয়োত্তুন্ মায়োন ধূল্যেচর-চাগালাত্ সিল্ পাত্তরর্-মুড়োবোত্ যেইনে রলঅ। শৌল সে হবরান পেইনে সিয়েনত্ যেইনে দায়ূদোর পিজে পিজে লোড়েল। 26 শৌল গেলেন মুড়োবোর এক কিত্তেন্দি আর দায়ূদে তা মানুচ্চুন লোইনে গেলেন মুড়োবোর আরঅ এক কিত্তেন্দি। তারা শৌল কায়-কুরেত্তুন ধেই যেবাত্তে যাদিমাদি গত্তন্। ইন্দি শৌল আর তার সৈন্যগুনে দায়ূদ আর তার মানুচ্চুনোরে ধুরিবাত্তে তারারে ঘিজ্যন্। 27 এন্ সময়োত্ এক্কো মানুচ্ এইনে শৌলরে হবর্ দিলো, “পলেষ্টীয়গুনে দেজ্চান্ আক্রমণ গোজ্যন্, তুই যাদিমাদি আয়।” 28 এ কধাগান শুনিনে শৌল দায়ূদোর পিজেন্দি লড়ানা থামেইনে পলেষ্টীয়গুনোর্ বিরুদ্ধে উজেই গেলঅ। ইয়েনত্যে মানুচ্চুনে সে জাগায়ানরে কন্ সেলা-হম্মলকোৎ (যিয়েনর্ ভেদ্তান্ “ফারক্ ওইয়্যে মুড়ো”)। 29 দায়ূদে সিয়োত্তুন্ ঐন-গদীর কেম্প দোক্কেন্ জাগায়ানিত্ যেইনে বজত্তি গরা ধুরিলো। |
Copyright © 2021 Bangladesh Bible Society
Bangladesh Bible Society