১ শমূয়েল 21 - Chakma Bible

নোব আদামত্‌ দায়ূদে

¹ ইয়েনর্ পরেদি দায়ূদে নোব আদামত্‌ ধর্মগুরু অহীমেলক ইদু গেলঅ। অহীমেলকে সেক্কে দরে গির্‌গিরেদে গির্‌গিরেদে নিগিলিনে দায়ূদো মুজুঙোত্‌ এলঅ। তে দায়ূদোরে পুযোর্‌ গুরিলো, “তুই কিত্তে গায় গায়? কিত্তে তঅ সমারে আর কনজন নেই?”

² জোবত্‌ দায়ূদে ধর্মগুরু অহীমেলকরে কলঅ, “রাজা মরে এক্কান কামর্‌ ভারান্ দিইনে কোইয়্যেদে, তে যে কামর্‌ উগুম দিইনে মরে পাদেয়্যে সিয়েনর কিচ্ছু যেনে আর কনজনে হবর্‌ ন-পান। সেনত্যে মর্‌ মানুচ্চুনোরে মুই এক্কান ঠিগ্‌গোজ্যে জাগাত্‌ মত্তে বাজ্জেই থেবার্‌ কোইয়োং।

³ তইদু কি আঘে? পাচ্‌ছান পিদে মরে দে, বা যিয়েন আঘে সিয়েনই দে।”

⁴ ধর্মগুরুবো জোবত্‌ দায়ূদোরে কলঅ, “মইদু কনঅ চিগোন্-চাগন্ পিদে নেই, মাত্তর্‌ পবিত্র মুজুঙো-পিদে আঘে। যুনি তঅ মানুচ্চুনে কনঅ মিলে ইদু ন-যেইনে থান্‌ সালে সিয়েনি হেই পারিবা।”

⁵ দায়ূদে কলঅ, “আমার সুদোম্ মজিম আমি সত্য সত্য কনঅ মিলে ইদু ন-যেই। সৈন্যগুনোরে নেযেইনে মুই যেক্কে কনঅ সামান্য কামত্‌ নিগিলোং সেক্কেয়ো মর্‌ সৈন্যগুনে সিজি থান্‌। মাত্তর্‌ এচ্চ্যে তারা কদক্‌ সিজি আগন্‌।”

⁶ সেনত্যেই ধর্মগুরুবো দায়ূদোরে সে পবিত্র পিদেনি দিলো, কিত্যে সে পিদেগানি বাদে আর অন্য কনঅ পিদে তাইদু ন-এলঅ। সে দিন্যে সেই পিদেগানি লগেপ্রভুর মুজুঙোত্তুন্‌ সোরেই নেযেইনে তা জাগানত্‌ গরম পিদে রাগা ওইয়্যে।

⁷ দোয়েগ নাঙে শৌলর এক্কো ইদোমীয় কামগুরিয়্যে সেদিন্যে লগেপ্রভুর নাঙে কনঅ কামত্‌ সিয়েনত্‌ আক্‌সো যেয়্যেগোই। তে এলদে শৌলর য়েমানচোরেইয়্যের নেতাবো।

⁸ দায়ূদে অহীমেলকরে পুযোর্ গুরিলো, “ইয়েনত্‌ তইদু কনঅ সেল্‌ বা লাম্বা ছুড়ি নেই? রাজার কামান জরুরী এলঅ বিলিনে মুই নিজোর্‌ লাম্বা ছুড়িলোই বা অন্য কনঅ অাত্যের্ আনি ন-পারং।”

⁹ ধর্মগুরুবো কলঅ, “এলা কিঝিঙোত্‌ তুই যে পলেষ্টীয় গলিয়াতরে মারে ফেলেয়োচ্‌ তার লাম্বা ছুড়িগান ইয়েনত্‌ আঘে। সিয়েন এফোদর পিজেন্দি কাবড়লোই বানি রাগা ওইয়্যে। মন চেলে তুই সিবে নেযেই পারচ্‌। সিবে বাদে আর কনঅ লাম্বা ছুড়ি ইয়েনত্‌ নেই।” দায়ূদে কলঅ, “সিয়েন ধোক্ক্যেন তলোয়ার আর কুদু আঘে? সিয়েনই মরে দে।”

গাৎ শঅরত্‌ দায়ূদে

¹⁰ দায়ূদে সেদিন্যে শৌল ইত্তুন্‌ ধেই যেইনে গাৎ শঅরর্‌ রাজা আখীশোর ইদু আঝিল্ অলঅ;

¹¹ মাত্তর্‌ আখীশোর মানুচ্চুনে আখীশোরে কলাক্, “ইবে কি তার দেজর্‌ রাজা নয়? ইয়েনর্ পৌইদ্যেনে কি মানুচ্চুনে নাজি নাজি গান গেইনে ন-কন্‌, ‘শৌল মারিলোদে আজার আজার আর দায়ূদে মারিলো অযুত অযুত?’ ”

¹² এ কধাগান শুনিনে দায়ূদে চিদেত্ পড়িলো আর গাতর্‌ রাজা আখীশরে অমকদ দরা ধুরিলো।

¹³ সেনত্যেই যেদকদিন তে তারা ইদু এলঅ সেদকদিন তারা মুজুঙোত্‌ পাগলর্‌ ভান্ গরা ধুরিলো। যেক্কে তারা তারে ধুরিলাক্ সেক্কে তে পাগল ধোক্ক্যেন দোরো উগুরে আবিজাবি লেগানা আর নিজোর দাড়িগানি উগুরে মুয়োত্তুন্‌ লেট্টো ফেলা ধুরিলো।

¹⁴ সেক্কে আখীশে তা মানুচ্চুনোরে কলঅ, “তুমি দঅ দেগর্‌ মানুচ্চো পাগল, সালে কিত্তে তারে মইদু আন্য?

¹⁵ পাগলর কি মর্‌ এদক্‌ অভাব ওইয়্যেদে, তুমি মঅ মুজুঙোত্‌ পাগলামী গুরিবাত্তে এ মানুচ্চোরে ধুরি আন্য? এ ধোক্ক্যেন্‌ এক্কো মান্‌জ্যরে মঅ ঘরত্‌ কিত্যে আন্য?”