১ শমূয়েল 2 - Chakma Bibleহান্নার তবনা 1 সে পরেন্দি হান্না তবনা গুরিনে কলঅ, “লগেপ্রভুরে নেযেইনে মুই হুজি গরং; লগেপ্রভুই মরে জিদেনাগান্ দান গোজ্যে। মর্ শত্রুগুনো মুজুঙোদোই মুই মুয়োন খুলিনে হুজির্-গীত্ গাঙর্; তুই মরে শত্রুগুনো আঢত্তুন উদ্ধোর গোজ্যচ্ বিলি মুই হুজি। 2 লগেপ্রভু ধোক্ক্যেন পবিত্র আর কনজন নেই, কিত্যে তুই বাদে আর কনঅ গোজেন নেই; আমা গোজেন ধোক্ক্যেন ঝিরেবার-মুড়ো আর নেই। 3 তুমি আর বার্বো কধা ন-কোইয়ো, অহংকারর্ কধা তমা মুয়োত্তুন্ ন নিগিলোক্; কিত্যে লগেপ্রভু এধোক্ক্যেন গোজেন যে বেক্কানি হবর্ পাই, আর তেয়ই কামানি মাবি চাই। 4 বোলী মান্জ্যর ধনু ভাঙি যেইয়্যে, মাত্তর্ যিগুনে পড়ি যেইয়োন তারা বোলী ওই উদিনে ঠিয়্যেইয়োন। 5 যিগুনোর পেট্তুন ভরা এলাক্ তারা খানাত্যে ইক্কিনে অন্যগুনোর্ কাম্ গত্তন; মাত্তর্ যিগুনোর পেট্ পুরের্ তারার পেট্ পুরোনা কাদে যেয়েগোই। যে ভাজ্ এলঅ তে সাত্তো পূঅর মা ওইয়্যে, মাত্তর্ যিবের ভালোক্কুন পূঅ তে ইক্কিনে বল্পোজ্যে, ঝি-পূঅর জর্ম দি ন-পারে। 6 লগেপ্রভুই মারে ফেলে পারে আর লগেপ্রভুই বাঁজেই পারে; তেয়ই মরেদে জাগাত্ লামায় আর তেয়ই সিয়োত্তুন্ তুলে 7 লগেপ্রভুই মান্জ্যরে তাগোয়্যে বা নাদা গরে; অয়, তেয়ই তলে ফেলায় আর তেয়ই উগুরে তুলে। 8 তে নাদামান্জ্যরে ধুল্যেত্তুন তুলে, আর অভাবীরে তুলে ছেইয়োর কুরোত্তুন্। দাঙর্ পোজিশন মান্জ্যর্ লগে তে তারারে ববাত্তে দে, আর সর্মানর সিংহাসন দে; কিত্যে পিত্থিমীর খুদো বেক্কুন লগেপ্রভুরই, তে সিগুনো উগুরে দুনিয়েগানরে থিদেবর্ গোজ্যে। 9 তে তার ভক্তগুনোরে উজোত্ খানাত্তুন্ রোক্ষ্যে গোজ্যে, মাত্তর্ পাজি মানুচ্চুনে আন্ধারত্ ভস্ত ওই যান; কিত্যে নিজোর বল্লোই কনঅ মানুচ্ ঝিদি ন-পারন্। 10 লগেপ্রভুর শত্রুগুনে ভস্ত ওই যেবাক্, তে আগাজত্ তারার বিরুদ্ধে গুজুরিবো; পিত্থিমীর থুম দুঝি সং তে মানুচ্চুনোর বিচের্ গুরিবো। তে তার রাজাবোরে বল্ দিবো আর তার বর্ দিয়্যে মানুচ্চুনোরে ঝিদেই দিবো।” 11 ইয়েনর্ পরেন্দি ইল্কানা রামাত্ তার নিজোর ঘরত্ ফিরি গেলঅ, মাত্তর্ শমূয়েলে ধর্মগুরু এলির অধীনোত্তুন্ লগেপ্রভুর সেবা গরা ধুরিলো। এলির পাজি পূঅগুন 12 এলির পূঅগুনে এলাক অমহদ পাজি। লগেপ্রভু উগুরে তারার কনঅ মনযোগ ন-এলঅ। 13 ধর্মগুরু ইজেবে মানুচ্চুনোর লগে তারার বেবহার এলদে অন্যধোক্ক্যেন: কনঅ মান্জ্যর্ য়েমান-উৎসর্বর য়েরা যেক্কে উজো ধুরিদাক্ সেক্কে ধর্মগুরুবোর্ চাগরুনে তিন কাদাবাবোত্যে এক্কান দাঙর্ চামেচ্ আনিদাক্। 14 সিবেলোই তে মাত্যে আড়িত্ বা গাবালাত বা কোড়েয়েত্ বা পিলেত্ গুদেইদাক্ আর কাদা চামেচ্চোই যে য়েরাগান উদি এদঅ সিয়েন বেক্কান ধর্মগুরুবো নিজোত্তে নেযেদ। ইস্রায়েলীয়গুনোর যিদুক্কুন মানুচ্ শীলোত এদাক্ তারা উগুরে তারা এধোক্ক্যেন বেবহার গুরিদাক্। 15 সিয়েনি বাদেয়ো, তেলানি আগুনোত্ দিবার আগেন্দি ধর্মগুরুবোর্ চাগর্বো এইনে যে মানুচ্চো য়েমান-উৎসর্গ গোজ্যে তারে কদঅ, “আগুনোত্ ভাজেবাত্যেই ধর্মগুরুবোরে য়েরা দে। তে তত্তুন্ উজুনো য়েরা ন-নিবো, কাজা য়েরায়ই নিবো।” 16 সেই মানুচ্চো যুনি কদঅ, “পত্তমে তেলানি পুড়ো পুরিবো, সে পরেন্দি তুই তর্ আওজ্ মজিম য়েরা নেযেচ্,” তো তে কদঅ, “না, ইক্কিনেই সিয়েন দিয়্যে পুরিবো; ন-দিলে মুই জোর গুরিনে নেযেম।” 17 লগেপ্রভুর চোগোত্ সেই গাবুজ্যে ধর্মগুরুগুনোর্ পাপ্পানি অমহদ ওইনে দেগা দিলো, কিত্যে তারা লগেপ্রভুর নাঙে এই বেক্ উৎসর্বর জিনিসছানি ঈচ্ গুরিদাক্। 18 মাত্তর্ চিগোন চিঝি শমূয়েল মসীনা সুদোলোই এফোদ উরিনে লগেপ্রভুর সেবা কাম্ গরা ধুরিলো। 19 পত্তিবারত্ নেক্কোর লগে এক বোজোজ্যে য়েমান-উৎসর্ব গুরিবাত্তে যেবার সময়োত্ শমূয়েলর মাবো এক্কো চিগোন্ সুলুম বানেইনে তাত্তে নেযেদ। 20 সেক্কে ইল্কানা আর তা মোক্কোরে আশিদ্বাদ গুরিনে এলি কদঅ, “এই মিলেবো লগেপ্রভুর ইদু যে পূঅবোরে দিয়্যে তার বদলে লগেপ্রভু এই মিলেবোর পেদত্ তরে আরঅ ঝি-পূঅ দুয়োক্।” ইয়েনর্ পরেন্দি তারা তারার ঘরত্ আদি যেদাক্। 21 লগেপ্রভু জদবদে হান্নারে মেইয়্যে গুরিলো। সেক্কে হান্না পিদিলী অলঅ আর তার্ বেক্কুনে তিন্নো পূঅ আর দ্বিবে মিলে অলাক্। ইন্দি চিগোন শমূয়েলে লগেপ্রভুর লগে থেইনে দাঙর্ উয়ো ধুরিলো। 22 এলি সেক্কে অমহদ বুড়ো ওই গেলঅ। ইস্রায়েলীয়গুনো উগুরে তার পূঅগুনোর বেবহারর্ কধা আর যিদুক্কুন মিলে সেবা-কামত্তে মিলন-তাম্বুর দোরান ইদু এদাক্ তারার লগে তারার সিনেলীর কধা তা কানত্ গেলঅ। 23 তে তারারে কলঅ, “তুমি ইয়েন কি গরর্? তমার ভাজ্ন্যেই কামানির কধা মুই এই মানুচ্চুনোত্তুন শুনোঙর্। 24 নাদে, নাদে, মর্ পূঅগুন, লগেপ্রভুর মানুচ্চুনোর যেদক্কানি কধা কুয়ো কি গত্তে শূন্যং সিয়েনি গম্ নয়। 25 মান্জ্যে যুনি মান্জ্য বিরুদ্ধে পাপ গরন্ সালে গোজেনে সিয়েনর মীমাংসা গুরি দি পারে; মাত্তর্ মান্জ্যে যুনি লগেপ্রভুর বিরুদ্ধে পাপ গরন্ সালে তাত্তে কনা কোজোলী গুরি পারিবো?” মাত্তর্ তারা তারার বাবর্ কধালোই কান ন-পাদিলাক্, কিত্যে লগেপ্রভু তারারে মারে ফেলেব বিলি ঠিগ্ গোজ্যে। 26 চিগোন চিঝি শমূয়েলে দাঙর্ উয়ো ধুরিলো আর লগেপ্রভু আহ্ মানুচ্চুনো ইদু কোচ্পানা পাহ্ ধুরিলো। এলির বংশর মানুচ্চুনোর সাজা 27 একদিন্যে গোজেনর এক্কো মানুচ্ এলির ইদু এইনে কলঅ, লগেপ্রভু কত্তে, তর্ পুরোণি মানুচ্চুনে যেক্কে মিসরত্ ফরৌণর অধীনোত এলাক সেক্কে তারা ইদু কি মুই নিজোরে আভাংপাং গুরি ফগদাং ন-গরং? 28 ইস্রায়েলীয়গুনোর পুরো গুট্টির ভিদিরেত্তুন কি মুই লেবীয়গুনোরে বেঈ ন-লং, যেনে তারা মর্ ধর্মগুরু ওইনে মর্ পূজোবো ইদু যেইনে পৌইরেক জ্বালেই পারন আর এফোদ উরিনে মর্ মুজুঙোত্ এই পারন? ইস্রায়েলীয়গুনোর বেক্ পুজ্যে-উৎসর্বর ভাগ কি মুই তারারে আর তারার বংশগুনোরে ন-দুয়োং? 29 সালে মর্ ঘরত্ যেদক্কানি উৎসর্ব গুরিবাত্তে মুই উগুম দুয়োং তুমি কিত্তে সিদুক্কুন য়েমান-উৎসর্ব আর অন্য উৎসর্বগুনোর অসর্মান গরর্? মর্ মানুচ্ ইস্রায়েলীয়গুনোর উৎসর্বগুনোর বেগত্তুন গম্ ভাক্কুন দিইনে নিজোরে পক্তামক্তা গুরিনে কিত্তে তুই মত্তুন্ বেশ্ তর্ পূঅগুনোরে দাঙর্ গুরি দেগর্? 30 “সেনত্তেই ইস্রায়েলীয়গুনোর গোজেন লগেপ্রভু কত্তে, ‘মুই হামাক্কায় কোইয়োঙে, তর্ আর তর্ পুরোণি মানুচ্চুনোর বংশর মানুচ্চুনে সারা জিংকানিবর্ মর্ সেবা কাম গুরিবাক্’; মাত্তর্ ইক্কিনে লগেপ্রভু কত্তে, ‘সিয়েন আর ন-চলিবো। যিগুনে মরে সর্মান গুরিবাক্ মুই তারারে সর্মান গুরিম আর যিগুনে মরে ঈচ্ গুরিবাক্ তারারে ঈচ্ গরা অবঅ। 31 চেইয়ো, সময় এজের্ যেক্কে মুই তর্ বংশর্ আর তর্ পুরোণি মানুচ্চুনোর বংশর মানুচ্চুনোর বলানি এধোক্কেনগুরি কমেই দিম, তর্ বংশত্ এক্কো মানুচ্অ বুড়ো অয় সং ন-বাঁজিবো। 32 তুই মর্ ঘরর্ তামাজা চেই পেবে। ইস্রায়েলীয়গুনোরে যেদক্ ভালেদি মুই গুরিদুং সাৎ তর্ বংশর কনজনে কনদিন্অ বুড়ো অয় সং বাঁজি ন-পারিবাক্। 33 তো তর্ বংশর বেক্কুনোরে মুই মর্ পূজোবোত্তুন বাদ ন-দিম যেনে তারাত্যে চোগো পানিলোই তর্ দিগিবার খেমতাগান্ কুমি যায় আর তুই মনত্ দুঘ পাজ্; আর তর্ বংশর বেক্ মানুচ্চুনে গাবুজ্যে বয়জত্ মুরি যেবাক্। 34 তর্ দ্বিবে পূঅ হফ্নি আর পীনহস একই দিনোত্ মুরি যেবাক্, আর সিয়েনই অবঅ তত্তে এক্কান চিহ্নো। 35 মাত্তর্ মুই মত্তে এক্কো বিশ্বেজি ধর্মগুরু বানেম্, যে মর্ মনান্ বুঝিনে মর্ আওজ্ মজিম কাম গুরিবো। মুই তার বংশবোরে থিদেবর্ গুরিম আর তে নিত্য মর্ অভিষেগ-গোজ্যে মানুচ্চুনোরে সেবা গুরিবো। 36 তর্ বংশত্ যিগুনে বাঁজি থেবাক্ তারা এক কট্টা রূবো আর এক্কান রুটিত্তে তাইদু এইনে মাদিত্ মাদা নিগিরিনে জু জু জানেবাক্ আর এক্কান ধর্মগুরু-পদ পেবাত্তে কোজোলী গুরিবাক্ যেনে তে কিজু খেই পায়।’” |
Copyright © 2021 Bangladesh Bible Society
Bangladesh Bible Society