১ শমূয়েল 19 - Chakma Bible

দায়ূদরে মারে ফেলেবার চেট্ট্যা

¹ শৌল তার পূঅ যোনাথনরে আর বেক্‌ কামগুরিয়্যেগুনোরে কলঅ যেনে তারা দায়ূদরে মারে ফেলান। মাত্তর্‌ দায়ূদো উগুরে শৌলর পূঅ যোনাথনর অমকদ টান্ এলঅ।

² তে দায়ূদোরে কলঅ, “মঅ বাপ্‌‌পো শৌল তরে মারে ফেলেবার চেট্ট্যা গরের্‌। শুনিচ্‌, তুই কেল্যে বেন্যে গমেডালে থেচ্‌। এক্কান গুমুরো জাগাত্‌ যেইনে পৌল্যেই থেচ্‌।

³ তুই যে মাদঠ্‌ পৌল্যেই থেবে মুই মর্‌ বাবারে নেযেইনে সিয়েনত্‌ যেইনে থিয়্যেম্‌। মুই তাইদু তর্‌ কধানি কোম্‌ আর যিয়েনি হবর্‌ পেম্‌ সিয়েনি তরে জানেম।”

⁴ যোনাথনে তা বাপ্পো শৌল ইদু দায়ূদোরে নাঙ্‌ গিনেনে কলদে, “মহারাজ, তর্‌ চাগর্‌ দায়ূদো বিরুদ্ধে তুই কনঅ পাপ ন-গুরিবে, বরং তে যিয়েনি গোজ্যে সিয়েনি তর্‌ বোউত্‌ উপকার ওইয়্যে।

⁵ তে তার পরাণানরে নেযেইনে সেই পলেষ্টীয়গুনোরে মারে ফেলেয়্যে, আর লগেপ্রভু বেক্‌ ইস্রায়েলীয়গুনোরে জদবদে জিদেনাগান্ দান গোজ্যে; তুই দঅ সিয়েনি দেগিনে হুজি ওইয়োচ্‌। সালে ইক্কিনে তুই এনেবাদে দায়ূদোরে মারে ফেলেইনে কিত্তে একজন দুষ নেইয়্যে মান্‌জ্যর্‌ লো ঝোরেইনে তার বিরুদ্ধে পাপ গুরিবে?”

⁶ সেক্কে শৌল যোনাথনর কধানি শুনিনে শমক্ খেইনে কলদে, “জেদা লগেপ্রভুর দিব্য তারে মারে ফেলা ন-অবঅ।”

⁷ পরেন্দি যোনাথন দায়ূদোরে ডাগিনে তারে বেক্‌ কধানি জানেল। তে তারে শৌল ইদু নেযেল আর দায়ূদে আগঅ ধোক্ক্যেন্‌ শৌলর্‌ ইদু রলঅ।

⁸ সে পরেন্দি আরঅ যেক্কে যুদ্ধো আরাম্ভ ওই গেলঅ সেক্কে দায়ূদে নিগিলি এইনে পলেষ্টীয়গুনো সমারে যুদ্ধো গুরিবাত্তে গেলঅ। তে তারার্‌ এদক মান্‌জ্যরে মারে ফেলেল, তারা তার মুজুঙোত্তুন্‌ ধেই গেলাক্।

⁹ পরেন্দি লগেপ্রভুর ইত্তুন্‌ এক্কান্‌ ভান্ন্যেই আত্মা শৌল উগুরে এলঅ। শৌল সেক্কে তার্‌ ঘরত্‌ বোইদে এলঅ আর তা আঢত্‌ এক্কো সেল্‌ এলঅ, আর দায়ূদে বীণা বাজার্‌।

¹⁰ তে সেল্‌ দিইনে দায়ূদোরে দেবাল সমারে মিজেবার চেট্ট্যা গুরিলো, মাত্তর্‌ দায়ূদে তার মুজুঙেত্তুন্‌ সুরি গেলঅ বিলিনে সেল্লো দেবালত্‌ সুমিলোগোই। সেই রেদোত্‌ দায়ূদে ধেই যেইনে রোক্ষে পেলঅ।

¹¹ দায়ূদো উগুরে নজর্‌ রাগেবাত্যে শৌল তার ঘরত্‌ মানুচ্‌ পাধেই দিলো যেনে তারকেল্যে বেন্যে তারে মারে ফেলা অয়। মাত্তর্‌ তা মোক্কো মীখল তারে বেক্কানি জানেইনে কলঅ, “এচ্চ্যে রেদোত্‌ তুই যুনি পরাণান্‌দোই ধেই ন-যাচ্‌ সালে কেল্যেই তুই মারা পুরিবে।”

¹² সেনত্যেই মীখল দায়ূদোরে জান্দালা ইন্দি তলেন্দি লামেই দিলো আর তে ধেই যেইনে রোক্ষে পেলঅ।

¹³ মীখলে সেক্কে গিরির্‌ দেবেদা মূত্তিগুন নেযেইনে বিচ্ছোনত্‌ রাগেল আর বিচ্ছোনান্ মাদা উগুরেন্দি দিলো ছাগল কেজর্‌ এক্কো বালোশ্‌; সে পরেন্দি সিগুন কাপড়লোই ঢাগি দিলো।

¹⁴ দায়ূদোরে ধুরিবাত্তে শৌল মানুচ্‌ পাদেলে মীখলে কলঅ, “তে অসুখ্‌।”

¹⁵ এ হবরান্ শুনিনে শৌল দায়ূদোরে চেবাত্তে সেই মানুচ্চুনোরে আরঅ পাদেল আর কোই দিলো, “দায়ূদোরে খাট সুদ্ধো লোই এজঅ; মুই তারে মারে ফেলেম।”

¹⁶ মানুচ্চুনে ঘরত্‌ সুমিনে বিচ্ছোন উগুরে সেই দেবেদামূত্তিগুন আর বিচ্ছোনান্ মাদা উগুরেন্দি ছাগল কেজর্‌ বালোচ্‌সো দেগিলো।

¹⁷ পরেন্দি শৌল মীখলরে কলঅ, “তুই কিত্তে ইঙিরিনে মরে ঠোগেলে? তুই মর্‌ শত্রুবোরে ইরি দেনায় তে ধেই যেইয়্যে।” মীখলে তারে কলঅ, “তে কোইয়্যেদে, ‘মরে যেবাত্তে দে, নলে মুই তরে খুন্ গুরিম।’”

¹⁸ ইন্দি দায়ূদে ধেই যেইনে পরাণান বাজেল। তে রামাত্‌ শমূয়েল ইদু গেলঅ আর শৌলে তা উগুরে যিয়েনি গোজ্যে সিয়েনি বেক্কানিই তারে জানেল। ইয়েনর্ পরেন্দি দায়ূদে আর শমূয়েলে যেইনে নায়োৎ আদামত্‌ যেইনে বজত্তি গরা ধুরিলো।

¹⁹ শৌল হবর্‌ পেলদে, দায়ূদে রামার নায়োৎ আদামত্‌ আঘে।

²⁰ এ কধাগান শুনিনে তে দায়ূদোরে ধুরি আনিবাত্তে মানুচ্‌ পাধেই দিলো। সে মানুচ্চুনে যেইনে দেগিলাক্ এক ঝাক্‌ ভাববাদী শমূয়েলর অধীনোত্‌ গোজেনর কধা কদন্‌। গোজেনর আত্মাগানে সেক্কে শৌলর মানুচ্চুনো উগুরেয়ো এলঅ আর তারায়ো ভাববাদী ইজেবে গোজেনর কধা কুয়ো ধুরিলাক্।

²¹ শৌলরে সেই হবরান জানেলে তে আরঅ মানুচ্‌ পাদেল মাত্তর্‌ তারায়ো যেইনে ভাববাদী ইজেবে গোজেনর কধা কুয়ো ধুরিলাক্। শৌল তিনবার মানুচ্‌ পাদেল আর তারায়ো যেইনে ভাববাদী ইজেবে গোজেনর কধা কুয়ো ধুরিলাক্।

²² যেরেন্দি শৌল নিজেই রামাত্‌ গেলঅ আর সেখূতদ্ পানি জমা গুরি রাগেবার যে দাঙর্‌ জাগা এলঅ সিয়েনত্‌ যেইনে পুযোর্ গুরিলো, “শমূয়েল আর দায়ূদে কুদু?”

²³ সেনত্যেই শৌল রামার নায়োৎ আদামর ইন্দি রওনা অলঅ। মাত্তর্‌ গোজেনর আত্মাগান তা উগুরেয়ো এলঅ; সেক্কে তে গোদা পথ্‌‌তান্‌ ভাববাদী ইজেবে গোজেনর কধা কদে কদে নায়োদত্‌ লুমিলো।

²⁴ তে তার পোজাক্কান্‌ খুলি ফেলেইনে শমূয়েলর মুজুঙোত্‌ ভাববাদী ইজেবে গোজেনর কধা কুয়ো ধুরিলো। তে পুরো দিন্নো আর পুরো রেত্তো কাবড়-চুগোর নেইয়্যে গুরি পড়ি রলঅ। সেনত্যেই মান্‌জ্যে কন্‌, “শৌলেয়ো কি সালে ভাববাদীগুনো ভিদিরে এক্কো?”