১ শমূয়েল 18 - Chakma Bibleদায়ূদো উগুরে শৌলর মনভাব 1 শৌল সমারে দায়ূদোর কধাবার্তা থুম্ ওই যানার পরেন্দি যোনাথনর পরাণান আর দায়ূদোর পরাণান্ যেনে একলগে বান্যেদে ধোক্ক্যেন ওই গেলঅ। তে দায়ূদোরে নিজো ধোক্ক্যেন কোচ্পা ধুরিলো। 2 শৌলে সেদিনোত্তুন ধুরিনে দায়ূদোরে নিজোর কায়-কুরে রাগেল; তা বাব ইদু আর তারে ফিরি যেবাত্তে ন-দিলো। 3 দায়ূদরে নিজো ধোক্ক্যেন কোচ্পেদঅ বিলিনে যোনাথনে তা সমারে এক্কো চুক্তি গুরিলো। 4 তে তার কিয়্যে উগুরে লাম্বা সিলুম্মো খুলিনে দায়ূদোরে দিলো, আর তার যুদ্ধোর পোজাক্কানি, এন কি, তার তলোয়ারান, ধনুগান আর কমর-বাননিগান্অ তারে দিলো। 5 শৌল দায়ূদোরে যিয়েনত্ পাধেদ দায়ূদে সিয়েনত্ যেদঅ আর বুদ্ধির পরিচয় দিইনে সফলতা লাভ গুরিদো। সেনত্যেই শৌল তারে সৈন্যদলর এক্কো সেনাপতি বানেল। সেক্কে বেক্ মানুচ্চুনে হুজি অলাক্ আর শৌলর কামগুরিয়্যেগুনেয়ো হুজি অলািক্। 6 দায়ূদে সেই পলেষ্টীয় গলিয়াত্রে মারে ফেলানার পরেন্দি মানুচ্চুনে যেক্কে ঘরত্ ফিরি এত্তন্ সেক্কে ইস্রায়েলর বেক্ আদাম আর শঅরানিত্তুন্ মিলেগুনে নাজি নাজি হুজির্ গান গেইনে আর ঝোন্ঝোনী আহ্ তিনতারা বাজাদে বাজাদে রাজা শৌলরে ভালেদি জানেবাত্তে নিগিলি এলাক্। 7 তারা নাজদে নাজদে এই গান্নো গেইয়োন, “শৌল মারিলোদে আজার আজার, আর দায়ূদে মারিলোদে অযুত অযুত।” 8 এই গান্নো শুনিনে শৌলর অমকদ রাগ অলঅ। তে বেজার্ ওইনে কলদে, “তারা দায়ূদো পৌইদ্যেনে অযুত অযুতোর কধা কলাক্ অদচ আমা পৌইদ্যেনে কলাক্ আজার আজার। ইয়েনর পরেন্দি রেজ্যগান বাদে দায়ূদোর আর কি পেবার্ বাগী রলঅ?” 9 সে অক্তত্তুন্ ধুরিনে শৌলে দায়ূদোরে ইংসের চোগেন্দি দেগা ধুরিলো। 10 তার কেল্যে গোজেন ইত্তুন্ এক্কান ভান্ন্যেই আত্মা শৌল উগুরে এলঅ। তে নিজোর ঘর ভিদিরে আবোল-তাবোল কধা কুয়া ধোজ্যে। সেক্কে দায়ূদে অন্য দিনো ধোক্ক্যেন তা মুজুঙোত্ বীণা বাজা ধুরিলো। শৌলর আঢত্ এলদে এক্কো সেল্। 11 তে মনে মনে কলঅ, “মুই দায়ূদরে দেবাল সমারে আবেরেই দিম্।” ইয়েন ভাবিনে তে সেল্লো মারিলো, মাত্তর্ দায়ূদে দ্বিবার সিবে পাযারা পারিনে গেলঅ। 12 শৌল দায়ূদরে দরা ধুরিলো, কিত্যে লগেপ্রভু দায়ূদো সমারে এলঅ মাত্তর্ শৌলরে তে ছাড়িনে যেইয়্যে। 13 সেনত্যে শৌল দায়ূদোরে নিজোর কায়-কুরেত্তুন্ সোরেই দিলো আর তারে সৈন্যদলর্ আজার উগুরে নেতা ইজেবে নেযেল। সেক্কে দায়ূদে সৈন্যদলর নেতা ওইনে তারারে পরিচালনা গরা ধুরিলো। 14 লগেপ্রভু সমারে এলঅ বিলিনে তে বেক্কানিত্ বুদ্ধির পরিচয় দিইনে সফলতা লাভ গরা ধুরিলো। 15 দায়ূদে বেশ্ সফলতা লাভ গুরিলো দেগিনে শৌল তারে দর্গরেদে চোগেন্দি দেগা ধুরিলো। 16 মাত্তর্ ইস্রায়েল আর যিহূদার বেক্ মানুচ্চুনে দায়ূদোরে কোচ্পেদাক্, কিত্যে সৈন্যদলর নেতা ওইনে তে তারারে পরিচালনা গুরিদো। 17 শৌল একদিন্যে দায়ূদোরে কলঅ, “মর্ দাঙর্ ঝিবো মেরবরে মুই তত্তেই বৌ দিম্। তুই বানা মর্ পক্ষেন্দি বীরো ধোক্ক্যেন লগেপ্রভুত্তে যুদ্ধো গুরিবাক্।” মাত্তর্ শৌলর মনর্ কধাগান এলদে ইয়েন, তে দায়ূদো উগুরে আত্তান্ ন-তুলিলেয়ো দায়ূদে যেনে পলেষ্টীয়গুনোর আঢত্ মারা পড়ে। 18 দায়ূদ শৌলরে কলদে, “মুয়ই বা কন্না আহ্ মর্ গিরির্ আর ইস্রায়েল ভিদিরে মর্ বাবর্ বংশবো বা এন্ কি ওইয়্যেদে, মুই রাজার জামেই ওই পারং?” 19 মাত্তর্ দায়ূদো সমারে শৌলর ঝি মেরবর মেলার অক্তবো অলে দেগা গেলদে দায়ূদরে বাদ দিইনে মহোলাৎ আদামর্ অদ্রীয়েল সমারে মেরবরে বৌ দিয়্যে ওই যেইয়্যে। 20 মাত্তর্ শৌলর আর এক্কো ঝি মীখল দায়ূদোরে কোচ্পেদঅ। মানুচ্চুনে যেক্কে সেই কধানি শৌলরে জানেলাক্ সেক্কে শৌল হুজি অলঅ। 21 তে মনে মনে কলঅ, “মুই দায়ূদোরে মর্ ঝিবো দিম্বে যেনে ঝিবো তাইদু এক্কো ফাল্ অয় আর পলেষ্টীয়গুনে তার বিরুদ্ধে উদোন্।” ইয়েন ভাবিনে শৌল দায়ূদোরে কলঅ, “মর্ জামেই অবাত্তে ইবেয়ই তর্ দ্বিলম্বর সুযোগ।” 22 শৌল তার কামগুরিয়েগুনোরে এই উগুমান দিলো, “তুমি ভিদিরে ভিদিরে দায়ূদোর লগে কধা কোইনে তারে এই কধাগান কঅ, ‘রাজা তঅ উগুরে হুজি ওইয়্যে, আর তার কামগুরিয়্যেগুনে বেক্কুনে তারে কোচ্পান। সেনত্যেই তুই এবেরা রাজার জামেই অ।’” 23 তারা এই বেক্ কধানি দায়ূদোরে জানানার পরেন্দি তে কলদে, “রাজার জামেই অনাগান কি তুমি এক্কান সামান্য বেপার বিলিনে মনে গরর্? মুইদ নাদা, একজন সামান্য মানুচ্।” 24 দায়ূদে যিয়েনি কোইয়্যে শৌলর কামগুরিয়্যেগুনে সিয়েনি শৌলরে কলাক্। 25 সেক্কে শৌল কলদে, “তুমি দায়ূদোরে কোই দুয়ো, রাজা বানা তার শত্রুগুনো উগুরে হেনা সুজোনা ইজেবে একশঅ জন পলেষ্টীয়র চুনুগুলোবোর মুজুঙেন্দি চামান চায়, অন্য কনকিচ্ছু ন-চায়।” ইঙিরিনে পলেষ্টীয়গুনোর আঢত্ যেনে দায়ূদে শেজ্ ওই যায়, ইয়েনই এলদে শৌলর মনভাব। 26-27 কামগুরিয়্যেগুনে দায়ূদোরে বেক্ কধানি জানানার পরেন্দি দায়ূদে হুজি ওইনে রাজার জামেই অবাত্যে রাজী অলঅ। ইয়েনত্যেই দায়ূদোরে যে সময়ান দিয়্যে ওইয়্যে সে সময়ান পার্ ওই যানার আগেন্দি দায়ূদ আর তার মানুচ্চুনে যেইনে দ্বিশত পলেষ্টীয়রে মারে ফেলেয়োন। সে পরেন্দি দায়ূদে রাজার জামেই অবাত্যে সেই বেক্ পলেষ্টীয়গুনোর চুনুগুলোবোর মুজুঙেন্দি চামান্ আনিনে শৌলরে দিলো। সেক্কে শৌল তার ঝি মীখল সমারে দায়ূদোর মেলা গুরি দিলো। 28 শৌল যেক্কে বুঝি পারিলো, লগেপ্রভু দায়ূদো সমারে আগে আর তার ঝি মীখলেয়ো দায়ূদোরে কোচ্পায়, 29 সেক্কে দায়ূদো উগুরে তার দরান্ আরঅ বাড়িলো। 30 ইয়েনর্ পরেন্দি পলেষ্টীয়গুনোর সেনাপতিগুনে যুদ্ধো গুরিবাত্তে নিগিলি এজা ধুরিলাক্। যেদকবার্ তারা নিগিলি এলাক্ সেদকবারই শৌলর অন্য কামগুরিয়্যেগুনোত্তুন্ দায়ূদে বেশ্ বুদ্ধির পরিচয় দিইনে সফলতা লাভ গুরিলো। সেক্কে তার অমকদ সুনাম অলঅ। |
Copyright © 2021 Bangladesh Bible Society
Bangladesh Bible Society