১ শমূয়েল 15 - Chakma Bibleলগেপ্রভু রাজা শৌলরে এলাফেলা গুরিলো 1 শমূয়েল শৌলরে কলঅ, “লগেপ্রভু তা মানুচ্ ইস্রায়েলীয়গুনো উগুরে তরে রাজা ইজেবে অভিষেগ্ গুরিবাত্তে মরে পাদেয়্যে। ইক্কিনে তুই লগেপ্রভুর কধানি শুনিচ্। 2 বেগত্তুন্ খেমতাবলা লগেপ্রভু কত্তে, ‘ইস্রায়েলীয়গুনে মিসর দেজত্তুন্ এজানার পদথ্ অমালেকীয়গুনে তারার পিজেন্দি থিয়্যেয়োন্ বিলি মুই তারারে সাজা দিম। 3 ইক্কিনে তুই যেইনে অমালেকীয়গুনোরে আক্রমণ গুরিবে আর তারার্ যিয়েনি আঘে বেক্কানি ভস্ত গুরি ফেলেবে; তারা উগুরে কনঅ দোয়্যে ন-গুরিবে। তারার মিলে-মরদ, ঝি-পূঅ, দুধ-খাইদে চিগোন চিঝি, গোরু-ভেড়াছাগল, উট, গাধা বেক্কুন্ মারে ফেলেবে।’” 4 শৌল সেক্কে মানুচ্চুনোরে টলায়ীম শঅরত্ ডাগিনে এগত্তর্ গুরিলো। সেক্কে ইস্রায়েলর সৈন্যর্ সোংখ্যে দ্বিলাখ অলাক্ আর যিহূদা-গুট্টির সৈন্যর্ সোংখ্যে দশ আজার অলাক্। 5 শৌল অমালেকীয়গুনোর শঅরর্ ইদু যেইনে সিয়েনত্ শুগেই যেইয়্যে গাঙর্ খাদ্তোগানর্ সংমোধ্যে উৎ পাদি থেলঅ। 6 তে কেনিয়গুনোরে কলঅ, “ইস্রায়েলীয়গুনে যেক্কে মিসর দেজত্তুন্ নিগিলি এচ্ছোন্ সেক্কে তুমি তারা উগুরে দোয়্যে দেগেয়ো। তুমি অমালেকীয়গুনো ভিদিরেত্তুন্ অন্য কনঅ জাগাত্ যগোই, যেনে অমালেকীয়গুনো সমারে মুই তমারেয়ো ভস্ত গুরি ন-ফেলাং।” সেক্কে কেনীয়গুনে অমালেকীয়গুনোত্তুন্ গেলক্কোই। 7 শৌলে সেক্কে হবীলা চাগালাত্তুন্ মিসরর্ পূগেন্দি শূর-ধূল্যেচর-চাগালা সং বেক্ অমালেকীয়গুনোরে ওদেই দিলো। 8 তে অমালেকীয়গুনোর রাজা অগাগরে জেদাবাদে ধুরিলো আর অন্য বেক্কুনোরে মারে ফেলেল। 9 মাত্তর্ শৌল আর তার সৈন্যগুনে অগাগরে বাঁজেই রাগেলাক্ আর অমালেকীয়গুনোর গম্ গম্ গোরুগুন, ভেড়াছাগলুন, পক্তা-মক্তা গোরুছঅগুন আর ভেড়াছাগল ছঅগুন, এক কধায় তারার যিয়েনি গম্ এলঅ সিয়েনি তারা বাঁজেই রাগেলাক্। সিয়েনিরে ভস্ত গুরি দেদে তারা রাজী ন-অলাক্, মাত্তর্ অকেজো আর পিড়েদোজ্যেগুনোরে তারা এক্কুবারে শেজ্ গুরি দিলাক্। 10 সেক্কে লগেপ্রভুর এই কধানি শমূয়েলর্ ইদু ফগদাং অলঅ, 11 “শৌলরে রাজা বানানা মর্ দুঘোর্ বেপার্ ওইয়্যে, কিত্যে তে মত্তুন্ সুরি যেয়েগোই আর মর্ উগুমান অমান্য গোজ্যে।” এই কধাগান শুনিনে শমুয়েলে তাদি উদিলো আর পুরো রেত্তো তে লগেপ্রভুর ইদু কানাকুদি গরা ধুরিলো। 12 তারকেল্যে বেন্যে উদিনে শমূয়েলে শৌল সমারে দেগা গুরিবাত্তে গেলঅ। সিয়েনত্ তারে কুয়া অলঅ, শৌল কর্মিল মুড়োবোত্ যেইনে নিজোর সর্মানত্তে সিয়েনত্ এক্কো খুদো বানানার পরেন্দি গিল্গলত্ গেলগোই। 13 শমূয়েলে সেক্কে শৌল ইদু গেলঅ। শৌল তারে কলঅ, “লগেপ্রভু তরে ভালেদি গোরোক্। লগেপ্রভুর উগুমান মুই পালন গোজ্যং।” 14 শমূয়েলে কলঅ, “সালে ভেড়াছাগলর রবো মর্ কানত্ এজের্ কিত্তে? গোরুর রবো বা মুই শুনোঙর্ কিত্তে?” 15 জোবত্ শৌল কলঅ, “অমালেকীয়গুনো ইত্তুন্ ইগুনোরে আনা ওইয়্যে। তর্ গোজেন লগেপ্রভুর নাঙে উৎসর্ব গুরিবাত্তে সৈন্যগুনে গম্ গম্ গোরু আর ভেড়াছাগল রাগেই দুয়োন; মাত্তর্ বাদ্বাগি বেক্কানি আমি এক্কুবারে শেজ্ গুরি দিয়্যেই।” 16 শমূয়েলে সেক্কে শৌলরে কলঅ, “জুরো গুরি থাক্। কেল্যে রেদোত্ লগেপ্রভু মরে যিয়েনি কোইয়্যে সিয়েনি মুই তরে কং।” শৌল কলঅ, “কঅ সালেন্।” 17 শমূয়েলে কলঅ, “একদিন তুই নিজোর্ চোগেন্দি চিগোন্ এলে, মাত্তর্ তো কি তুই ইস্রায়েলীয়গুনোর বেক্ গুট্টিগুনোর চেলা ন-অচ্? লগেপ্রভুই তরে ইস্রায়েল দেজ উগুরে রাজা ইজেবে অভিষেগ্ গোজ্যে। 18 তে তরে এক্কান কামত্ পাদেয়্যে আর কোইয়্যেদে, ‘তুই যেইনে সেই পাপীগুনোরে, অত্তাৎ অমালেকীয়গুনোরে এক্কুবারে শেজ্ ন-অনা সং তারা সমারে যুদ্ধো গুরিবে।’ 19 তুই লগেপ্রভুর উগুমান কিত্তে ন-পালাচ্? কিত্তে তুই লুদেয়্যে পযাপিরানি উগুরে ঝাবেই পুড়িলে আর লগেপ্রভুর চোগোত্ যিয়েনি বজং সিয়েনি গুরিলে?” 20 শৌল কলদে, “মাত্তর্ মুই দঅ লগেপ্রভুর উগুমান পালেয়োং। যে কামত্ লগেপ্রভু মরে পাদেয়্যে মুই সেই কামান্ গোজ্যং। মুই অমালেকীয়গুনোরে এক্কুবারে শেজ্ গুরি দুয়োং আর তারার রাজাবো অগাগরে ধুরিনে আন্যং। 21 মাত্তর্ ভস্ত গুরিবাত্তে ঠিগ্ গুরি রাগেয়্যে পযাপিরাত্তুন্ সৈন্যগুনে কদুক্কুন গম্ গম্ গোরু আর ভেড়াছাগল আন্যন্, যেনে গিল্গলত্ তর্ গোজেন লগেপ্রভুর নাঙে সিগুনোরে তারা উৎসর্ব গুরি পারন।” 22 সেক্কে শমূয়েলে কলদে, “লগেপ্রভুর উগুমান পালেবাত্তে তে যেদক্ হুজি অয়, পুজ্যে-উৎসর্ব আর য়েমান-উৎসর্বত্তে কি তে সেদক হুজি অয়? য়েমান-উৎসর্বত্তুন তাঁর উগুমান পালানা আর ভেড়াছাগল তেলত্তুন্ তাঁর কধানির্ বাধ্য অনা বোউত্ গম্। 23 উল্লোমি গরানা আর যাদু-মন্ত্রর কাম গরানা এক্কুই পাপ; অবাধ্য অনা আর মূত্তি পূজোনা এক্কুই অন্যেয়। তুই লগেপ্রভুর উগুম এলাফেলা গোজ্যস্ সেনত্তে তেয়ো তরে রাজা ইজেবে এলাফেলা গোজ্যে।” 24 শৌল সেক্কে শমূয়েলরে কলঅ, “মুই পাপ গোজ্যং। লগেপ্রভুর উগুম আর তর্ উগুম মুই হামাক্কায় অমান্য গোজ্যং। মানুচ্চুনোর দরে মুই তারার কধা মজিম্ কাম গোজ্যং। 25 ইক্কিনে মঅ উগুরে দোয়্যে গুরিনে মর্ পাপ্পানি তুই ক্ষেমা গুরি দে, আর মঅ সমারে আদিচ্ যেনে মুই লগেপ্রভুর উবোসনা গুরি পারং।” 26 মাত্তর্ শমূয়েলে তারে কলঅ, “মুই তঅ সমারে ন-যেম্। তুই লগেপ্রভুর উগুম এলাফেলা গোজ্যচ্ সেনত্তেই লগেপ্রভুয়ো তরে ইস্রায়েলীয়গুনোর রাজা ইজেবে এলাফেলা গোজ্যে।” 27 ইয়েন কোইনে শমূয়েলে আদি যেবাত্তে ঘুরিনে থিয়্যেলে শৌলে তার কাবড়র্ এক কিত্তেন্দি টানিনে ধুরিলো; সেক্কে তার কাবড়ান ফাদি গেলঅ। 28 সেক্কে শমূয়েলে তারে কলঅ, “লগেপ্রভু এচ্চ্যে তঅ সিত্তুন্ ইস্রায়েলীয়গুনোর রেজ্যগানঅ এবাবোত্যেগুরি কারি নিলো আর তত্তুনো গম্ তর্ এক্কো দেজর্ মান্জ্যরে কাম ভারান্ দিলো। 29 যিবে ইস্রায়েলর বাঈনী পেবার্ তে মিজে কধা ন-কয় বা মনান্অ ন-বদলায়। তে মানুচ্ নয়দে যে, মনান্অ বোদোলেব।” 30 শৌলে কলঅ, “মুই পাপ গোজ্যং; তো মর্ কোজোলীগান্ ইয়েন, মঅ জাদর্ বুড়ো নেতাগুনো ইদু আর ইস্রায়েলীয়গুনোর মুজুঙোত্ মর্ সর্মানান্ রাগঅ। মুই যেনে তর্ গোজেন লগেপ্রভুর উবোসনা গুরি পারং সেনত্তেই তুই মঅ সমারে আদিচ্।” 31 সেনত্তেই শমূয়েলে শৌল সমারে গেলঅ আর শৌল লগেপ্রভুর উবোসনা গুরিলো। 32 পরেন্দি শমূয়েলে কলঅ, “অমালেকীয়গুনোর রাজাবো অগাগরে মইদু আন্।” এই কধাগান শুনিনে অগাগ তার পক্তা-মক্তা কিয়্যেগান্দোই দুলোং-দালংগুরি শমূয়েলর ইদু এলঅ। তে মনে গুরিলো মরণর যন্ত্রণাগান্ ইক্কিনে আর নেই। 33 মাত্তর্ শমূয়েলে কলঅ, “তর্ লাম্বা কিরিচ্ছান্দোই বোউত্ মিলে যেবাবোত্যে পূঅ-ছা আরা ওইয়োন, সেবাবোত্যে মিলেগুনো ভিদিরে তর্ মাবোয়ো পূঅ-ছা আরা অবঅ।” এই কধাগান কোইনে শমূয়েলে গিল্গলত্ লগেপ্রভুর মুজুঙোত্ অগাগরে কট্টা কট্টা গুরি কাবি ফেলেল। 34 সে পরেন্দি তে রামাত্ গেলঅ আর শৌল গিবিয়াৎ-শৌল শঅরত্ তার নিজোর ঘরত্ গেলঅ। 35 শমূয়েলে যেদকদিন বাঁজি এলঅ সেদকদিন তে শৌল সমারে আর দেগা ন-গরে। ইস্রায়েলীয়গুনো উগুরে শৌলরে রাজা গরানাগান লগেপ্রভুর দুঘোর্ বেপার ওইয়্যে বিলি শমূয়েলে তাত্তে দুঃখো গুরিলো। |
Copyright © 2021 Bangladesh Bible Society
Bangladesh Bible Society