১ শমূয়েল 14 - Chakma Bibleপলেষ্টীয়গুনে উদি গেলাক্ 1 ইন্দি শৌলর পূঅ যোনাথনে একদিনোত্ তার বন্দুক বোইয়্যে গাবুজ্যেবোরে কলদে, “আদিচ্, আমি উইপারত্ পলেষ্টীয়গুনোর তাম্বুলোত্ যেই।” মাত্তর্ কধাগান তে তা বাপ্পোরে ন-জানেল। 2 শৌলে সেক্কে গিবিয়ার দুঝিত্ মিগ্রোণ নাঙে এক্কান জাগাত্ ডালোম গাজর্ তলে বোই এলঅ। তা সমারে ছয়শত্ মানুচ্ এলাক্, 3 আর তারা ভিদিরে অহিয় এলঅ, যিবের্ কিয়্যেত্ এফোদ এলঅ। অহিয় অহীটুবর পূঅ এলঅ, অহীটুবে ঈখাবোদর ভেই এলঅ, ঈখাবোদে পীনহসর পূঅ এলঅ আর পীনহসে এলির পূঅ এলঅ; এলি শীলোদত্ লগেপ্রভুর ধর্মগুরু এলঅ। যোনাথনে যে নিগিলি যেইয়্যে সিয়েন কনজনে হবর্ ন-পেদাক্। 4 যে মুড়োমুড়ি পথ্তান্ পার্ ওইনে যোনাথনে পলেষ্টীয়গুনোর সৈন্যগুনোর-তাম্বুলো ইদু যেবার কধা কোইয়্যে সেই মুড়োমুড়ি পধর্ দ্বিকিত্তেন্দি অজল্ গুরি পাত্তরর্ দেবাল ধোক্ক্যেন। সিয়েনর এক কিত্তেন্দি নাঙান্ বোৎসেস আর অন্য কিত্তেন্দি নাঙান্ সেনি। 5 সিয়েনর্ এক্কান এলদে উত্তোরর মিক্মসর ইন্দি আর অন্য কট্টাগান এলঅ দোগিণে গেবারর্ ইন্দি। 6 যোনাথনে তার বন্দুক বোইয়্যে গাবুজ্যেবোরে কলদে, “আদঅ, আমি উই পারত্ সেই চুনুগুলোবো তনা ন-গোজ্যে মানুচ্চুনোর তাম্বুলোত্ যেই। অয়ত লগেপ্রভু আমাত্তে কিজু গুরিবো, কিত্যে তে তার নিজোর মনে মন্জক্কাগুরি কম মানুচ্চোই ওক্ বা বেশ্ মানুচ্চোই ওক্ জিদি যেই পারে।” 7 বন্দুক বোইয়্যে মানুচ্চো সেক্কে কলঅ, “তর্ মনানে যিয়েন কয় সিয়েনই গর্। আদিচ্, তর্ মনে মন্জক্কাগুরি মুই চলিম।” 8 যোনাথনে কলঅ, “সালে আদিচ্, আমি উই পারত্ তারা ইন্দি যেইনে তারারে দেগা দিবোং। 9 তারা যুনি আমারে কন্, ‘থিও, আমি তমা কায়-কুরে এঝির্,’ সালে আমি যিয়েনত্ থেবং সিয়েনত্তুন্ আর তারা ইদু ন-উদিবোং। 10 মাত্তর্ তারা যুনি কন্, ‘আমা ইদু উদি এজঅ,’ সালে আমি উদিবোং। লগেপ্রভু যে আমা আঢত্ তারারে তুলি দিয়্যে সিয়েনই অবঅ আমা ইদু তার চিহ্নো।” 11 ইয়েন কোইনে পলেষ্টীয় সৈন্যগুনোর মুজুঙোত্ যেইনে তারা দ্বিজনে দেগা দিলাক্। সেক্কে পলেষ্টীয়গুনে কলাক্, “উই চঅ, গাদত্ লুগি থেইয়্যে ইব্রীয়গুনে নিগিলি এত্তন্।” 12 তারার তাম্বুলোর্ সৈন্যগুনে যোনাথন আর তার বন্দুক বোইয়্যে মানুচ্চোরে কলাক্, “আমা ইদু উদি আয়, তমারে দেগেই দুয়োঙর্।” সেক্কে যোনাথনে তার বন্দুক বোইয়্যে মানুচ্চোরে কলদে, “মর্ পিজে পিজে উদি আয়। লগেপ্রভু ইস্রায়েলীয়গুনোর আঢত্ তারারে দি রাগেয়্যে।” 13 যোনাথনে চেরান আত্-টেংগোই উগুরে উদি গেলঅ আর তার বন্দুক বোইয়্যে মানুচ্চোয়ো তার পিজে পিজে উদি গেলঅ। পলেষ্টীয়গুনে যোনাথনর আঢত্ মারা পড়িলাক আর তার বন্দুক বোইয়্যে মানুচ্চোয়ো তার পিজে পিজে পলেষ্টীয়গুনোরে মারা ধুরিলো। 14 যোনাথন আর তার বন্দুক বোইয়্যে মানুচ্চোর আক্রমণর আরাম্ভত্ কমপক্ষে আধা একর জাগা ভিদিরে প্রায় কুড়িজন মানুচ্ মারা পড়িলাক্। ইস্রায়েলীয়গুনোর জিদেনা 15 ইয়েনর্ কারণে পলেষ্টীয়গুনোর যুদ্ধোর মাদর্ তাম্বুলোত্ আর বেক্ সৈন্যগুনো ভিদিরে এক্কান দর্বুক দেগা দিলো; এন্ কি, তারার মিক্মসর তাম্বুলোত্ আর আর্মিগুনেয়ো দরে গির্গিরা ধুরিলাক্, আর সেই লগে ভূজোল্অ বেলঅ। সেই অমহদ দরান্ গোজেনর ইত্তুন্ এচ্চ্যে। 16 বিন্যামীন চাগালার্ গিবিয়াদত্ শৌলর পারাদিয়্যে সৈন্যগুনে দেগিলাক্, পলেষ্টীয় সৈন্যগুনে দল্লো ভাঙিনে চেরোকিত্তে ছিদি পোজ্যন। 17 শৌল সেক্কে তা লগে মানুচ্চুনোরে কলদে, “সৈন্যগুনোরে এগত্তর্ গুরিনে সাজেই চঅ, কন্না আমা ভিদিরেত্তুন যেয়েগোই।” সেক্কে তারা দেগিলাক্ যোনাথন আর তার বন্দুক বোইয়্যে মানুচ্চো সিয়েনত্ নেই। 18 শৌল সেক্কে অহিয়রে কলদে, “তুই গোজেনর সুন্দুক্কো আন্।” (সেই অক্তত্ সুন্দুক্কো ইস্রায়েলীয়গুনো ইদু এলঅ।) 19 শৌল যেক্কে ধর্মগুরুগুনো সমারে কধা কোইয়্যে সেক্কে পলেষ্টীয়গুনোর তাম্বুলোত্ ঝাগুলুক্ চলের্ আর সিয়েন বেজত্তুন্ বেশ্ অর্। সেনত্তেই শৌল ধর্মগুরুবোরে কলদে, “থাক্, ন-লাগিবো।” 20 সে পরেন্দি শৌল আর তার বেক্ সৈন্যগুনে যুদ্ধোর ডাগে সাড়া দিইনে এগত্তর্ ওইনে যুদ্ধো গুরিবাত্তে গেলাক্। তারা দেগিলাক্, পলেষ্টীয়গুনে একজনে আরেকজন উগুরে তলোয়ার চালার্ আর তারা ভিদিরে অমহদ ঝাগুলুক্ দেগা দিয়্যে। 21 ইয়েনর্ আগেন্দি যিদুক্কুন ইব্রীয় মানুচ্ পলেষ্টীয়গুনো ভিদিরে থেদাক্ আর তারা সমারে তাম্বুলোত্ যেইয়োন তারায়ো সেক্কে ফিরি যেইনে শৌল আর যোনাথন সমারে থেইয়্যে ইস্রায়েলীয়গুনো সমারে মিজেলাক্। 22 ইফ্রয়িমর মুড়ো-মুড়ি চাগালাত্ পৌইল্যে থেইয়্যে ইস্রায়েলীয়গুনেয়ো যেক্কে শুনিলাক্ পলেষ্টীয়গুনে ধেই যাদন্ সেক্কে তারায়ো নিগিলি এইনে যুদ্ধোত্ মিজেলাক আর পলেষ্টীয়গুনোর পিজেন্দি লোড়েলাক্। 23 এধোক্ক্যেনগুরি লগেপ্রভু সেদিন্যে ইস্রায়েলীয়গুনোরে উদ্ধোর্ গুরিলো, আর বৈৎ-আবন পার ওইনেয়ো যুদ্ধো গরা ধুরিলাক্। যোনাথনে মধু খেলঅ 24 সে দিন্নো ইস্রায়েলীয়গুনোর অমহদ দুঘে কাদিলো, কিত্যে শৌল তারারে দিইনে এক্কান শমক্ গুরি নেযেয়্যে, তে সাজোন্যের্ আগেন্দি সং, শত্রুগুনো উগুরে হেনা ন সুজোনা সং যুুদি কেঅ কিজু খায় সালে তা উগুরে যেনে অভিশাব পড়ে। সেনত্যে সেদিন্যে মানুচ্চুনে কেঅ কিচ্ছু ন খান্। 25 তারা বেক্কুনে যেইনে এন্ এক্কান জাগাত্ সোমেলাক্ যিয়েনত্ গাছ-গাজারা আঘন্। সিয়েনত্ মাদি উগুরে কিজু মধু তারার চোগোত্ পুরিলো। 26 তারা দেগিলাক্, এক্কো চাগত্তুন্ মধু ঝুরি পড়ের্ মাত্তর্ শমক্ ভাঙিবার্ দরে সিয়েন মুয়োত্ ন-দিলাক্। 27 যোনাথনে ন-শুনে, তা বাপ্পো মানুচ্চুনোরে এধোক্ক্যেন এক্কান শমক্ খাবেয়্যে। সেনত্তে তে তার আঢঅ লুদিক্কোর আগাগান বাবেইনে মুবাগানত্ গুদেল আর মধু আঢেত্ নেযেইনে খা ধুরিলো। সেক্কে তা কিয়্যেত্ বল্ ফিরি এলঅ। 28 সেক্কে সৈন্যগুনোর একজনে তারে কলাক্, “তর্ বাপ্পো সৈন্যগুনোরে এক্কান দরমর শমক্ খাবেয়্যে আর কোইয়্যে, ‘এচ্চ্যে যুনি কনজনে কিজু খান্ সালে তা উগুরে অভিশাব পুরিবো।’ সেনত্তেই মানুচ্চুনে এদক্ বল্পোজ্যে ওই পোজ্যন্।” 29 সেক্কে যোনাথনে কলঅ, “মর্ বাপ্পো দঅ মানুচ্চুনোরে দুখ্ দের্। চঅ, এই মধুগান এক্কেনাগুরি মুয়োত্ দেনার লগে লগে মর্ কিয়্যেত্ কেনজান্ বল্ ফিরি এচ্চ্যে। 30 শত্রুগুনো ইত্তুন্ লুদে নেযেয়্যে খানাত্তুন্ যুনি এচ্চ্যে মানুচ্চুনে খেই পেদাক্ সালে বোউত্ গম্ অদঅ, আর পলেষ্টীয়গুনেয়ো আরঅ বোউত্ মুরি যেদাক্।” 31 ইস্রায়েলীয়গুনে সেদিন্যে মিক মক্মসত্তুন্ অয়ালোন সং পলেষ্টীয়গুনোরে পিদদে পিদদে বল্পোজ্যে ওই পোজ্যন্। 32 সেনত্তেই তারা লুদেয়্যে জিনিসছানি উগুরে ঝাবেই পুরিনে ভেড়াছাগল, গোরু, গোরু ছঅগুনোরে ধুরি মাদিত্ পোড়েইনে কাবিকাবাই লো সুমুত্তো য়েরা খা ধুরিলাক্। 33 সেক্কে মানুচ্চুনে যেইনে শৌলরে কলাক্কে, “চাহ্, তারা বেক্কুনে লো সুমুত্তো য়েরা খেইনে লগেপ্রভুর বিরুদ্ধে পাপ গোজ্যন্।” তে কলদে, “তুমি অবিশ্বেজী ওইয়ো। ইক্কিনে আর দেরী ন-গুরিনে এক্কো দাঙর্ পাত্তর্ ইয়েনত্ লোই এজঅ।” 34 সে পরেন্দি তে কলঅ, “তুমি মানুচ্চুনোরে যেইনে কঅ যেনে তারা তারার বলদ বা ভেড়াছাগলুন ইয়েনত্ মর্ কায়-কুরে আনিনে কাবন্ আর সে পরেন্দি খান্। লো সুমুত্তো য়েরা খেইনে কনজনে যেন লগেপ্রভুর বিরুদ্ধে পাপ ন-গরন্।” সেই রেদোত্ মানুচ্চুনে নিজোর বলদ গোরুগুন আনিনে সিয়েনত্ কাবিলাক্। 35 লগেপ্রভুর নাঙে শৌল সিয়েনত্ এক্কো পূজো যুক্কোল্ গুরিলো। ইবেয়ই অলঅ লগেপ্রভুর নাঙে তার বানেয়্যে পত্তম্ ডালিপুজো। 36 পরেন্দি শৌল কলদে, “আদঅ, এচ্চ্যে রেদোত্ আমি পলেষ্টীয়গুনোরে লোড়েই আর বেন্যে সং তারার্ পযাপিরানি লুদেয়োই। তারার একজনরেয়ো আমি বাঁজেই ন-রাগেবং।” জোবত্ মানুচ্চুনে কলাক্, “তুই যিয়েন্ গম্ মনে গরচ্ সিয়েনই গর্।” মাত্তর্ ধর্মগুরুবো কলঅ, “আদঅ, ইয়েনত্ আমি পত্তমে গোজেন ইদু পুযোর্ গুরিই।” 37 সেক্কে শৌল গোজেনরে পুযোর্ গুরিলো, “মুই কি পলেষ্টীয়গুনোরে লোড়েম? ইস্রায়েলীয়গুনোর আঢত্ কি তুই তারারে তুলি দিবে?” মাত্তর্ গোজেনে সেদিন্যে শৌলরে কনঅ জোব্ ন-দিলো। 38 সেনত্তেই শৌল কলদে, “সৈন্যদলর নেতাগুন, তুমি ইয়েনত্ এজঅ। এচ্চ্যে এই পাপ্পান কেন্জান্ গুরি অলঅ এজঅ, আমি সিয়েন তোগেই চেই। 39 ইস্রায়েলীয়গুনোর উদ্ধোর্ গুরিয়্যে জেদা লগেপ্রভুর শমক্, মর্ পূঅ যোনাথনেয়ো যুনি সিয়েন গুরি থায় হামাক্কায় তাত্তুনো মরা পুরিবো।” মাত্তর্ মানুচ্চুনে বেক্কুনে অলর্ গুরি থেলাক্। 40 শৌল সেক্কে বেক্ ইস্রায়েলীয়গুনোরে কলঅ, “তুমি এককিত্তেন্দি থিয়ো, আর মুই আর মর্ পূঅ যোনাথনে আরেক কিত্তেন্দি থিয়্যেইয়্যে।” মানুচ্চুনে কলাক্, “তুই যিয়েন গম্ বিলি মনে গরচ্ সিয়েনই গর্।” 41 শৌল সেক্কে ইস্রায়েলীয়গুনোর গোজেন লগেপ্রভুরে কলঅ, “ইয়েনর আজল্ জোব্পান্ মরে দে।” সেক্কে দুষছান্ পুরিলো শৌল আর যোনাথন উগুরে আর বাদবাগি মানুচ্চুনে ছড়ান্ পেলাক্। 42 শৌল কলদে, “মর্ আর মর্ পূঅ যোনাথনর্ মধ্যে লটারী দিয়্যে ওক্।” সেক্কে যোনাথন উগুরে দুষছান্ পুরিলো। 43 শৌল সেক্কে যোনাথনরে কলঅ, “মরে কঅ, তুই কি গোজ্যস্?” যোনাথনে তারে কলঅ, “মর্ লুদিক্কোলোই মুই এক্কেনাগুরি মধু খেইয়োং, সেনত্তেই মত্তুন্ মরা পুড়িবো।” 44 শৌল কলঅ, “অয় যোনাথন, তত্তুনোই মরা পুড়িবো। গোজেনে যেন তরে শাস্তি দে, হামাক্কায় শাস্তি দে।” 45 মাত্তর্ মানুচ্চুনে শৌলরে কলাক্, “কি? যিবেত্যে ইস্রায়েলীয়গুনে এই দাঙর্ উদ্ধোরান্ পেইয়োন সেই যোনাথনত্তুন মরা পুরিবো? কনদিনঅ নয়; জেদা লগেপ্রভুর শমক্, তা এক্কান চুলঅ মাদিত্ ন-পুরিবো, কিত্যে তে এচ্চ্যে যিয়েনি গোজ্যে সিয়েনি গোজেন লগে থেইনেই গোজ্যে।” মানুচ্চুনে এধোক্ক্যেনগুরি যোনাথনরে রোক্ষে গুরিলাক্, তারে মারে ফেলা ন-অলঅ। 46 ইয়েনর্ পরেন্দি শৌলে আর পলেষ্টীয়গুনোরে ন-লোড়েল, আর পলেষ্টীয়গুনেয়ো নিজোর দেজত্ গেলাক্। 47 শৌল ইস্রায়েলীয়গুনোর রাজা অনার পরেন্দি দেজর্ চেরোকিত্তে বেক্ শত্রুগুনো সমারে, অত্তাৎ মোয়াবীয়, অম্মোনীয়, ইদোমীয়, সোবার রাজাগুনো সমারে আর পলেষ্টীয়গুনো সমারে যুদ্ধো গোজ্যে। তে যিন্দি যেদঅ সিন্দি অমহদ ক্ষোতি গুরিদো। 48 তে বীরো ধোক্ক্যেন যুদ্ধো গুরিনে অমালেকীয়গুনোরে ওদেই দিইনে লুদেয়্যেগুনোর আঢত্তুন্ ইস্রায়েলীয়গুনোরে রোক্ষে গোজ্যে। 49 যোনাথন, যিশ্বি আর মল্কীশূয় নাঙে শৌলর তিন্নো পূঅ এলাক্। তার দাঙর্ ঝিবোর নাঙান্ এলদে মেরব আর চিগোন ঝিবোর নাঙান্ এলঅ মীখল। 50 তা মোক্কোর নাঙান্ এলদে অহীনোয়ম। তে এলদে অহীমাসর ঝি। শৌলর বেগঅ দাঙর্ সেনাপতিবোর নাঙান্ এলদে অব্নের। তে শৌল কুট্টোবো নেরের পূঅ। 51 শৌলর বাপ্পো কীশ আর অব্নেরের পাপ্পো নের এলদে অবীয়েলর পূঅ। 52 শৌলে রাজাগিরি গুরিবার অক্তত্ পলেষ্টীয়গুনো সমারে অমহদ যুদ্ধো ওইয়্যে। কনঅ বোলী মানুচ্ বা সাহসী মানুচ্ দেগিলে তে তারে তার সৈন্যদলত্ নেযেদ। |
Copyright © 2021 Bangladesh Bible Society
Bangladesh Bible Society