Biblia Todo Logo
Bìoball air-loidhne

- Sanasan -

১ শমূয়েল 13 - Chakma Bible


পলেষ্টীয়গুনো সমারে যুদ্ধোত্তে যুক্কোল্‌ অনা

1-2 শৌল গাবুজ্যে বয়জত্‌ রাজা ওইনে ইস্রায়েল দেজত্‌ কয়েক বজর্‌ রাজাগিরি গরানার পরেন্দি ইস্রায়েলীয়গুনো ভিদিরেত্তুন তিন আজার মান্‌জ্যরে বেঈ ললঅ। তারা ভিদিরে দ্বিআজার মানুচ্‌ তা সমারে মিক্‌মসেদত্‌ আর বৈথেলর মুড়ো-মুড়ি চাগালাত্‌ রলাক্ আর এক আজার রলাক্ বিন্যামীন-গুট্টির চাগালার্‌ গিবিয়াদত্‌ যোনাথন সমারে। অন্য বেক্‌ ইস্রায়েলীয়গুনোরে তে তারার ঘরত্‌ পাধেই দিলো।

3 গেবাতদ্‌ পলেষ্টীয় সৈন্যগুনোর যে তাম্বুলানি এলঅ যোনাথনে সিয়েনি আক্রমণ গুরিলো আর পলেষ্টীয়গুনে সেই কধানি শুনিলাক্। সেক্কে শৌল দেজর বেক্‌ জাগানিত্‌ হেঙগরং বাজেইনে কলদে, “ইব্রীয়গুনে শুনোদোক্।”

4 সেক্কে বেক্‌ ইস্রায়েলীয়গুনে শুনিলাক্, শৌল পলেষ্টীয়গুনোর সৈন্য-তাম্বুলানি আক্রমণ গোজ্যে আর পলেষ্টীয়গুনে ইস্রায়েলীয়গুনোরে ইংসের্‌ চোগেন্দি দেখ্যন্‌। সেক্কে ইস্রায়েলীয়গুনোরে ডাগা অলঅ যেনে তারা গিল্‌গলত যেইনে শৌল সমারে মিজেন্‌।

5 পলেষ্টীয়গুনে সেক্কে ইস্রায়েলীয়গুনোর লগে যুদ্ধো গুরিবাত্তে একলগে এগত্তর্‌ অলাক। তারা সমারে ত্রিশ আজার রথ এলঅ, ছয় আজার ঘোড়া উগুরে সৈন্য সাগর-পারর্ ধূল্যে-চড় ধোক্ক্যেন গুণি ন-পুড়েয়্যে বোউত্ সৈন্য। তারা বেক্কুনে বৈৎ-আবনর পূগেন্দি মিক্‌মসত্‌ তাম্বুলানি ফেলেলাক্।

6 ইস্রায়েলর সৈন্যগুনে যেক্কে দেগিলাক্, তারা অমহদ চাপর্‌ মুয়োত্‌ পুরিনে দযাদ্‌ পড়ি যেইয়োন সেক্কে তারা যেইনে চুরুঙোত্‌, ঝুব-ঝাড়ত্‌, মুড়ো-মুড়ির ফাদা জাগাত, খাত্তো আর গাদত্‌ লুগিই রলাক্।

7 ভালোক্কুন ইব্রীয় যর্দন গাঙান্‌ পার ওইনে গাদ আর গিলিয়দ চাগালাত্‌ আঢি গেলাক্। শৌল গিল্‌গলদই থেই গেলঅ, আর তা সমারে সৈন্যগুনে দরে গির্‌গিরাদন।

8 শমূয়েলে তারে যে সময়ানর কধা কোইয়্যে সেই মজিম্ শৌল তাত্তে সাত দিন সং বাজ্জেই থেলঅ, মাত্তর্‌ শমূয়েলে গিল্‌গলত্‌ ন-এলঅ। ইন্দি তার সৈন্যগুনেয়ো তারে ছাড়িনে ইন্দি-উন্দি আঢি যাহ্ ধুরিলাক্।

9 সেনত্তেই শৌল পুজ্যে আর উদোলোলি-উৎসর্বর জিনিস তাইদু আনিবাত্তে কলঅ। সে পরেন্দি তে নিজেই পুজ্যে-উৎসর্বর অনুষ্ঠান গুরিলো।

10 তে উৎসর্বগান শেজ্‌ গরানার লগে লগে শমূয়েলে এইনে লুমিলো। সেক্কে শৌল তারে পাত্তুরু তুরু জানেবাত্তে তার লগে দেগা গুরিবাত্তে গেলঅ।

11 শমূয়েলে তারে কলঅ, “তুই ইয়েন কি গোজ্যস্‌?” জোবত্‌ শৌল কলঅ, “মুই দেগিলুঙে, মানুচ্চুনে মঅ মুজুঙেত্তুন আঢি যাদন্‌ আর ঠিগ্ সময়োত্‌ তুইয়ো ন-এলে, আরঅ পলেষ্টীয়গুনেয়ো ইন্দি মিক্‌মসত্‌ এইনে এগত্তর্‌ ওইয়োন।

12 সেনত্তে মুই মনে মনে কলুং, পলেষ্টীয়গুনে গিল্‌গলত্‌ মরে আক্রমণ গুরিবাত্তে এত্তন্‌ অদচ মুই লগেপ্রভুর দোয়্যে পেবার চেট্ট্যা ন-গরং। সেনত্তেই মর্‌ আওজ্ ন-থেলেয়ো মুই পুজ্যে-উৎসর্বর অনুষ্ঠান গুরিলুং।”

13 শমূয়েলে কলঅ, “তুই বেদমা ধোক্ক্যেন কাম্‌ গোজ্যস্‌। তর্‌ গোজেন লগেপ্রভু যে উগুমান তরে দিয়্যে সিয়েন তুই পালন্‌ ন-গরচ্‌। যুনি তুই সিয়েনি গুরিদে সালে ইস্রায়েল উগুরে তর্‌ রাজাগিরি তে চির জিংকানিবর্‌ থিদেবর্ গুরি দিদো।

14 মাত্তর্‌ ইক্কিনে তর্‌ রাজাগিরিগান আর ভালোকদিন ন-টিগিবো। লগেপ্রভু তার মনে মন্‌জক্কাগুরি এক্কো মান্‌জ্যরে তোগেই নেযেয়্যে আর তারেই তা মানুচ্চুনোর নেতা নেযেয়্যে, কিত্যে তা উগুমানি তুই পালন ন-গরচ্‌।”

15 ইয়েনর্ পরেন্দি শমূয়েলে গিল্‌গল ছাড়িনে বিন্যামীন চাগালার্‌ গিবিয়াতদ্‌ আঢি গেলঅ। শৌল তা সমারে মানুচ্চুনোরে গুণি চেলদে, তারা মান্‌জ্যন্দি প্রায় ছয়শত জন এলাক্।


ইস্রায়েলীয়গুনোর অাত্যেরানি

16 পরেন্দি শৌল আর তা পূঅ যোনাথনে আর তারা সমারে মানুচ্চুনে বিন্যামীন চাগালার্‌ গেবাতদ্‌ যেইনে থাহ্ ধুরিলাক আর ইন্দি পলেষ্টীয়গুনে মিক্‌মসে জাগানত্‌ তাম্বুল টাঙেলাক্।

17 পলেষ্টীয়গুনোর তাম্বুলোত্তুন্‌ তিন দল সৈন্য নিগিলি এলাক্। তারাত্তুন্‌ এক দল অফ্রা আদামর পদেন্দি শূয়াল চাগালা ইন্দি গেলাক্।

18 আর এক দল বৈৎ-হোরোণর ইন্দি গেলাক্ আর অন্য দল্লো গেলঅ সেই মুড়ো-মুড়ি চাগালাত্ যিয়েনত্তুন্‌ ধূল্যে-চর চাগালার্ সিবোয়িম কিঝিঙান্‌ দেগা যায়।

19 সেই অক্তত্‌ ইস্রায়েল দেজ ভিদিরে কনঅ কামার পাহ্ ন-যেদঅ, কিত্যে পলেষ্টীয়গুনে মনে গুরিদাক্ কামার থেলে ইব্রীয়গুনে তলোয়ার বা শেল্‌ বানেই নেযেদাক্।

20 সেনত্তেই নাঙলর্ ফাল, আদ-কদাল, কুড়োল আর তাগলানি দারেবাত্তে তারার বেক্কুনোত্তুন্‌ পলেষ্টীয়গুনোর ইদু যাহ্ পুরিদো।

21 নাঙলর্‌ ফাল, আদ-কদাল, তিনকুন্যে শেল্‌, কুড়োল আর কাদা বোজেয়ে লুদিগোত্‌ দারেবার দাম ইজেবে আস্‌টো গ্রাম রূপো লাগিদো।

22 সেনত্তেই যুদ্ধোর সময়োত্‌ দেগা গেলদে, শৌল আর তার পূঅ যোনাথন বাদে তারা সমারে কনঅ সৈন্যর আঢত্‌ তলোয়ার বা শেল্‌ নেই।

23 পলেষ্টীয়গুনোর তাম্বুলোর্ সৈন্যগুনে নিগিলিনে মিক্‌মসর গিরিপদথ্‌ যেইনে রলাক।

Copyright © 2021 Bangladesh Bible Society

Bangladesh Bible Society
Lean sinn:



Sanasan