১ শমূয়েল 12 - Chakma Bibleইস্রায়েলীয়গুনো ইদু শমূয়েলর শেজ্ কধাগান 1 ইয়েনর্ পরেন্দি শমূয়েলে ইস্রায়েলর বেক্ মানুচ্চুনোরে কলঅ, “তুমি মরে যিয়েনি যিয়েনি কোইয়ো মুই সিয়েনি বেক্কানি শুন্যং আর তমা উগুরে এক্কো রাজা নেযেয়োং। 2 চঅ, ইক্কিনে তমারে চালেবাত্তে তমার এক্কো রাজা আঘে। মুই দঅ বুড়ো ওই যেইয়োং, মর্ চুলানিয়ো পাগি যেইয়্যে, আর মর্ পূঅগুনেয়ো তমা সমারে আগন্। সেই গাবুজ্যে বয়জত্তুন্ ধুরি এচ্চ্যে সং মুই তমারে চালেই এজঙর্। 3 মুই ইয়োদোই আগং; মর্ বিরুদ্ধে যুনি তমার কিজু কবার্ থায় সালে লগেপ্রভু আর তার অভিষেগ-গোজ্যে মানুচ্চোর মুজুঙোত্ সিয়েনিই কঅ। তুমি সাক্ষি দুয়ো, মুই কার্ বলত্তো বা কার্ গাধাবো অন্যেয়গুরি নেযেয়োং? মুই কার উগুরে অত্যেচার গোজ্যং? কার উগুরে বজং বেবহার গোজ্যং? কাত্তুন্ ঘুষ নেযেইনে মুয়োন বন্ধ গুরি রাগেয়োং? ইয়েনির কনগান যুনি মুই গুরি থাং সালে সিয়েনির ক্ষতিপূরণ দিম।” 4 মানুচ্চুনে কলাক্, “না, তুই আমার কারঅ উগুরে অত্যেচার ন-গরচ্, কারঅ উগুরে ভান্ন্যেই বেবহার ন-গরচ্ আর কারত্তুন্ কিচ্ছু ন-নেযাচ্।” 5 শমূয়েলে তারারে কলদে, “এচ্চ্যে লগেপ্রভু সাক্ষী আর তার অভিষেগ গোজ্যে মানুচ্চোয়ো সাক্ষী, তুমি মত্তুন্ তমার কনঅ জিনিস ন-পঅ।” সেক্কে মানুচ্চুনে কলাক্, “তে সাক্ষী।” 6 শমূয়েলে মানুচ্চুনোরে আরঅ কলদে, অয়, লগেপ্রভুই সাক্ষী, যিবে মোশি আর হারোণরে নেযেয়্যে আর তমার পুরোণি মানুচ্চুনোরে মিসর দেজত্তুন্ নিগিলেই আন্যে। 7 সালে এবেরা তুমি যুক্কোল্ অ। লগেপ্রভু তমার আর তমার পুরোণি মানুচ্চুনোত্তে যেদক্কানি অন্যেয় কাম্ গোজ্যন্ মুই সেই বেক্কানি লগেপ্রভুর মুজুঙোত্ তমার দুষছানি দেগেই দিম। 8 যাকোবে মিসর দেজত্ গেলঅ, আর পরেন্দি যেক্কে তমার পুরোণি মানুচ্চুনে লগেপ্রভুর ইদু কানাকুদি গুরিলাক্ সেক্কে লগেপ্রভু মোশি আর হারোণরে পাধেই দিলো। তারা মিসর দেজত্তুন্ তমার পুরোণি মানুচ্চুনোরে নিগিলেই আনিলাক্ আর এই দেজত্ তারারে বজত্তি গুরিবার বেবস্থা গুরিলো। 9 মাত্তর্ তারা তারার গোজেন লগেপ্রভুরে ভুলি গেলাক্। সেনত্তেই তে চাগর্ অবাত্তে হাৎসোরর সেনাপতি সীষরার আঢত্, পলেষ্টীয়গুনোর আঢত্ আর মোয়াব দেজর রাজাবোর আঢত্ তারারে তুলি দিলো। তমার পুরোণি মানুচ্চুনো সমারে তারা যুদ্ধো গুরিলাক্। 10 সেক্কে তমার পূরোণি মানুচ্চুনে লগেপ্রভুর ইদু কানাকুদি গুরিনে কলাক্, আমি পাপ গোজ্যেই; আমি লগেপ্রভুরে বাদ দিইনে বাল দেবেদাগুনোরে আর অষ্টারোৎ দেবীগুনোরে পূজো গোজ্যেই; ইক্কিনে তুই শত্রুগুনোর আঢত্তুন আমারে রোক্ষে গর্, আমি তরই সেবা গুরিবোং। 11 সেক্কে লগেপ্রভু যিরুব্বাল, বদান, যিপ্তহ আর শমূয়েলরে পাদেইনে তমার চেরোকিত্তে শত্রুগুনোর আঢত্তুন তমারে রোক্ষে গুরিলো। সে পরেন্দি তুমি দোলেদালে বসত্তি গুরি পারিলে। 12 মাত্তর্ অম্মোনীয়গুনোর রাজা নাহশরে যেক্কে তুমি তমার বিরুদ্ধে যুদ্ধো গুরিবাত্তে এত্তে দেগিলে সেক্কে যুনিয়ো তমার গোজেন লগেপ্রভুই এলদে তমার রাজা তো তুমি মরে কলাদে, না, আমি চেই আমা উগুরে এক্কো রাজা রাজাগিরি গোরোক। 13 ইক্কিনে চঅ, ইবেয়ই তমার রাজা, যিবেরে তুমি চেইয়ো আর বেঈ লোইয়ো। লগেপ্রভু তমা উগুরে এক্কো রাজা নেযেয়্যে। 14 তুমি যুনি লগেপ্রভুরে ভোক্তি গুরিনে দরঅ, তারে সেবা গরঅ আর তার বাধ্য ওইনে তা উগুমোর বিরুদ্ধে ন-চলঅ, আর যিবে তমারে শাজন্ গুরিবো সেই রাজাবো আর তুমি যুনি তমার গোজেন লগেপ্রভুর আওজ্ মজিম্ আদঅ, সালে গম্ অবঅ। 15 মাত্তর্ যুনি তুমি লগেপ্রভুর বাধ্য ন-অ আর তার উগুমোর বিরুদ্ধে আদঅ, সালে তে যেধোক্ক্যেন তমার পূরোণি মানুচ্চুনোরে সাজা দিয়্যে সেধোক্ক্যেন তমারেয়ো দিবো। 16 “এবেরা তুমি যুক্কোল অ; লগেপ্রভু তমার চোগো মুজুঙোত্ যে মহৎ কাম্ গুরিবো সিয়েনি চঅ। 17 ইক্কিনে দঅ গম কাবিবার অক্ত, নয় নি? মুই লগেপ্রভুরে কোম্ যেনে তে দেবা পেরাগ আর ঝড় পাধেই দে। সেক্কে তুমি হবর্ পেবাদে আর দেগিবাদে, রাজা চেইনে তুমি লগেপ্রভুর ইদু কত্তমান্ অন্যেয় গোজ্য।” 18 ইয়েনর্ পরেন্দি শমূয়েলে লগেপ্রভুর ইদু তবনা গুরিলো আর তে সেদিন্যে মেগর্ গুজুরোনি আহ্ ঝড় পাধেই দিলো। সেক্কে বেক্কুনে লগেপ্রভু আর শমূয়েলরে দরা ধুরিলাক্। 19 বেক্কুনে সেক্কে শমূয়েলরে কলাক্, “তুই তর্ গোজেন লগেপ্রভুর ইদু তর্ এই চাগরুনোত্তেই তবনা গুরিচ্ যেনে আমি মারা ন-পুরিই, কিত্যে রাজাবো চেইনে আমি আমার অন্য বেক্ পাপ্পানির লগে এই পাপ্পানিয়ো মিজেয়্যেই।” 20 জোবত্ শমূয়েলে কলদে, “তুমি ন-দোরেয়ো। তুমি যুনিয়ো এই বেক্ অন্যেয়ানি গোজ্য তো লগেপ্রভুর ইত্তুন্ সুরি ন-যেইনে বেক্ মনান্ দিইনে তারে সেবা গরঅ। 21 তুমি তাত্তুন্ সুরি ন-যেইয়ো, কিত্যে সিয়েন গুরিলে তুমি অসার দেব-দেবেদাগুনোর পিজেন্দি যেবা। সিগুন অসার বিলিনে তমার কনঅ উপকারঅ গুরি ন-পারিবাক্ আর তমারে রোক্ষেয়ো গুরি ন-পারিবাক্। 22 লগেপ্রভু তার দাঙর্ নাঙানত্তে তার মানুচ্চুনোরে কনদিনঅ ছাড়ি ন-যেবঅ, কিত্যে তে নিজোর্ আওজ্লোই তমারে তার নিজোর মানুচ্ ইজেবে নেযেয়্যে। 23 মুই যেনে কনদিন্অ তমাত্তে তবনা গরানা বন্ধ গুরিনে লগেপ্রভুর বিরুদ্ধে পাপ ন-গরং। মুই তমারে সৎ আর ন্যায়পদেন্দি আদিবাত্তে শিক্ষা দিম্। 24 তুমি বানা লগেপ্রভুরে ভোক্তি গুরিনে দোরেবা আর তমার বেক্ মনানি দিইনে বিশ্বেজ্ গুরিনে তার সেবা গুরিবা। চিন্তে গুরি চঅ, তে তমাত্তে কদক্কানি দাঙর্ দাঙর্ কাম্ গোজ্যে। 25 মাত্তর্ যুনি তুমি অন্যেয় কাম্ গুরি থাগঅ সালে তুমি আর তমার রাজাবো বেক্কুনে ভস্ত ওই যেবা।” |
Copyright © 2021 Bangladesh Bible Society
Bangladesh Bible Society