১ শমূয়েল 11 - Chakma Bible

যাবেশ-গিলিয়দরর্‌ উদ্ধোর

¹ পরেন্দি অম্মোনীয় নাহশে যেইনে যাবেশ-গিলিয়দ জাগায়ান ঘিরিলো। সেক্কে যাবেশর্ মানেইয়ুনে নাহশরে কলাক্, “তুই আমা লগে এক্কো চুক্তি গর্‌, সালে আমি তর্‌ অধীনোত্ ওইনে থেবং।”

² অম্মোনীয় নাহশে জোবত্‌ তারারে কলঅ, “মুই এক্কো শর্তলোই তমা লগে চুক্তি গুরি পারং। সিয়েন অলঅ, তমার পত্তিজনর্‌ ডেন্‌ চোক্কো তুলি ফেলা অবঅ। সিয়েন গুরিনে মুই বেক্‌ ইস্রায়েল জাদ্‌‌‌তোরে অসর্মান গুরিম।”

³ এই কধাগান শুনিনে যাবেশর্ বুড়ো নেতাগুনে নাহশরে কলাক্, “তুই আমারে সাত দিন সময় দে। ইয়েন ভিদিরে আমি ইস্রায়েল দেজর্‌ বেক্‌ জাগানিত্‌ মানুচ্‌ পাদেইনে হবর্ দিবোং। যুনি কনজনে আমারে রোক্ষে গুরিবাত্তে ন-এজন্‌ সালে আমি তর্‌ অধীনোত্ অবং।”

⁴ মানুচ্চুনে যেক্কে হবর্ দিবাত্তে শৌলর নিজো শঅর্‌ গিবিয়াদত্‌ যেইনে সিদুগোর্ মানুচ্চুনোরে সেই বেক্‌ কধানি কলাক্ সেক্কে মানুচ্চুনে কিজেক্‌ কারিনে কাঁনা ধুরিলাক্।

⁵ সেই অক্তত্‌ শৌলে মাদত্তুন্‌ তার গোরুর পালুন্দোই ফিরি এজের্‌। তে পুযোর্ গুরিলো, “কি ওইয়্যে? মানুচ্চুনো কিত্তে কানাকুদি গত্তন্‌?” তারা সেক্কে যাবেশর্‌ মানুচ্চুনে যিয়েনি কোইয়োন সিয়েনি তারে জানেলাক্।

⁶ মানুচ্চুনোর কধা শুনোনার পরেন্দি গোজেনর্‌ আত্মাগান্‌ শৌল উগুরে এলঅ, আর তে রাগে ফুলি উদিলো।

⁷ তে দ্বিবে গোরু নেযেইনে কট্টা কট্টা গুরি কাবিলো। সে পরেন্দি সেই কট্টার ভাক্কুন্‌ মান্‌জ্যর মাধ্যমে ইস্রায়েল দেজর্‌ বেক্‌ জাগায়ানিত্‌ পাধেই দিলাক্ আর তারারে এই কধাগান ফগদাং গুরিবাত্তে কলাক্, “যে কেঅ শৌল আর শমূয়েল সমারে ন-মিজেব তা গোরুবোর অবস্থা এধোক্ক্যেন অবঅ।” লগেপ্রভু ইস্রায়েলীয়গুনোর মনত্‌ এক্কান দর্‌বুক জাগেই দিলো, আর তারা বেক্কুনেই এক ওইনে নিগিলি এলাক্।

⁸ শৌল বেষকত্‌ তারারে গুণি নেযেল। সেক্কে ইস্রায়েলর সৈন্যগুনোর মানুচ্‌ অলাক তিন লাখ্‌ আর যিহূদার অলাক ত্রিশ আজার।

⁹ যাবেশত্তুন যে মানুচ্চুনে হবর্ আন্যন্‌ গিবিয়ার মানুচ্চুনে তারারে কলাক্, “যাবেশ-গিলিয়দর মানু্‌চ্চুনোরে যেইনে জানেবাদে, এযেত্যে কেল্যে দিবুজ্যেমাদান ভিদিরে তারারে উদ্ধোর্ গরা পুরিবো।” এই কধাগান যাবেশর্ মানুচ্চুনোরে কুয়া অলে পরেন্দি তারা অমহদ হুুজি অলাক্।

¹⁰ তারা অম্মোনীয়গুনোরে কলাক্, “কেল্যে আমি তমার অধীনোত্‌ অবং। তমার যিয়েন হুজি সিয়েনই তুমি আমা উগুরে গরঅ।”

¹¹ তার্‌কেল্যে শৌল তা মানুচ্চুনোরে তিন্নো দলত্‌ ভাগ গুরিলো। সে পরেন্দি শেজর্‌ রেত্তোত্‌ তারা অম্মোনীয়গুনোর তাম্বুলোত্‌ সুমিনে দিবুজ্যেমাদান সং তারারে মারে ফেলা ধুরিলাক্। যিগুনে পরাণে বাঁজিলাক তারা এবাবোত্যেগুরি ছিদি পড়িলাক্, তারাত্তুন্‌ দ্বিজনে আর একসমারে ন-থেলাক্।

শৌলে রাজা ইজেবে অদে অদে

¹² মানুচ্চুনে এইনে শমূয়েলরে কলাক্, “কন্না কোইয়্যেদে শৌল আমা উগুরে রাজা ওই ন-পারিবো? তুই তারারে আমা আঢত্‌ তুলি দে; আমি তারারে মারে ফেলেবং।”

¹³ মাত্তর্‌ শৌল কলদে, “এচ্চ্যে কাররে মারে ফেলানা ন-চলিবো, কিত্যে এচ্চ্যের দিন্নোত্‌ লগেপ্রভু ইস্রায়েলীয়গুনোরে উদ্ধোর গোজ্যে।”

¹⁴ সেক্কে শমূয়েলে মানুচ্চুনোরে কলঅ, “আদঅ, আমি গিল্‌গলত্‌ যেইনে শৌলর রাজা অনার কধাগান আরঅ ফগদাং গুরিই।”

¹⁵ ইয়েন্দোই মানুচ্চুনে বেক্কুনে গিল্‌গলত্‌ যেইনে লগেপ্রভুর মুজুঙোত্‌ শৌলরে রাজা বানেলাক্। সিয়েনত্‌ তারা লগেপ্রভুর নাঙে উদোলোলি-উৎসর্বর অনুষ্ঠান গুরিলাক্ আর শৌল আর ইস্রায়েলর মানুচ্চুনে অমহদ ফুত্তি গুরিলাক্।