১ শমূয়েল 1 - Chakma Bibleশমূয়েলর জর্ম 1 ইফ্রয়িমর মুড়োমুড়ি চাগালাত্ রামাথয়িম-সোফীম শঅরত্ ইল্কানা নাঙে এক্কো মানুচ্ ইফ্রয়িম-গুট্টির মানুচ্চুনো লগে বজত্তি গুরিদো। তা বাপ্পোর নাঙান্ এলদে যিরোহম। যিরোহম অলদে ইলীহূর পূঅ, ইলীহূ এলদে তোহেরর পূঅ আর তোহ এলদে সুফেরর পূঅ। 2 ইল্কানার দ্বিবে মোক্ এলাক; এক্কোর নাঙ্ হান্না আর অন্যবোর নাঙ্ পনিন্না। পনিন্নার ঝি-পূঅ ওইয়োন মাত্তর্ হান্নার কনঅ ঝি-পূঅ ন-অন্। 3 ইল্কানা পত্তি বজর তা শঅরত্তুন শীলোত যেদঅ। তে সিদু যেইনে গোদা সংসারানর গিরোজ্ লগেপ্রভুর তবনা আর তা নাঙে য়েমান উৎসর্ব গুরিদো। সেক্কে সিদু ধর্মগুরু এলির দ্বিবে পূঅ লগেপ্রভুর ধর্মগুরু এলাক্। তারার নাঙানি এলদে হফ্নি আর পীনহস। 4 য়েমান-উৎসর্গর্ দিন্নোত্ ইল্কানা তা মোক্কো পনিন্নারে আর তার বেক্ ঝি-পূঅগুনোরে তার উৎসর্গ গোজ্যে য়েরাত্তুন এক্কোত্ দরে ভাগ দিদো। 5 মাত্তর্ হান্নারে দিদো দ্বিভাগ, কিত্যে তে হান্নারে কোচ্পেদ। লগেপ্রভু মাত্তর্ হান্নারে ভাজ্ গুরি রাগেয়্যে। 6 লগেপ্রভু সিয়েন গোজ্যে বিলিনে তা যাল্লো তারে দেচ্যেয়ে-মেচ্যেয়ে কধা কোইনে তার মনান্ যাগুলুক্ গুরি দিলো। 7 বজর্কে বজর্ এসাইন্যাগুরি চলের্। হান্না যেক্কে লগেপ্রভুর ঘরত্ যেদঅ পনিন্না তারে দেচ্যেয়ে-মেচ্যেয়ে কধা কদঅ। সেনত্যেই তে কানাকুদি গুরিদো আরে কিচ্ছু ন-খেদঅ। 8 এ অবস্থা দেগিনে তা নেক্কো ইল্কানা তারে কদঅ, “হান্না, তুই কিত্তে কানর্? কিত্তে কিচ্ছু ন-খর্? কিত্তে তর্ এদক দুঃখো? মুই কি তইদু দোচ্ছুয়ো পূঅত্তুনঅ বেশ্ ন-ওম্?” 9 এক সময়োত্ শীলোদত্ খানা-দানা শেজ্ গুরিনে হান্না উদিনে উবোসনা-ঘরত গেলঅ। ধর্মগুরু এলি সেক্কে লগেপ্রভুর সেই ঘরর্ দোরান ইদু এক্কান আসনত্ বোই এলঅ। 10 মনত্ দুগে হান্না লগেপ্রভু ইদু অমহদ কানি কানি তবনা গরা ধুরিলো। 11 তে লগেপ্রভুর ইদু মানত্ গুরিনে কলঅ, “ও দুনিয়ের গিরোজ্ লগেপ্রভু, তুই যুনি তর্ এই চাগরানীবোর মনত্ দুঘ্কান ইন্দি একবার চাজ্ আর মইন্দি মনযোগ দে আর মরে পুরি ন-ফেলেইনে যুনি তর্ এই চাগরানীবোরে এক্কো পূঅ দুয়োচ্ সালে সারা ঝিংকানিবর্ মুই তারে তর্ নাঙে দান গুরিম। তার মাদাবোত্ কনদিনঅ ক্ষুর বাজানা ন-অবঅ।” 12 হান্না ভালক্কন্ সং লগেপ্রভুর ইদু যেক্কে তবনা গরের্ সেক্কে এলি তার মুয়োন্দি চেই রোইয়্যে। 13 হান্না মনে মনে তবনা গোজ্যে বিলিনে তার ঠুত্তো লড়ের্ মাত্তর্ মুয়োর রঅবো শুনো ন-যার্। সেনত্যেই এলি মনে গুরিলো মিলেবো মাত্তল্ ওইয়্যে। 14 তে তারে কলঅ, “তুই মদ খেইনে আর কদক্ষণ নিজোরে মাত্তল্ গুরি রাগেবে? মদ আর ন-খেচ্।” 15 জোবত্ হান্না তারে কলদে, “ও মর্ প্রভু, সিয়েন নয়। মুই অমহদ দুঃখী; মুই আংগুর-রসও ন-খাং, মদঅ ন-খাং। মুই লগেপ্রভুর মুজুঙোত্ মর্ মনান্ ঢালি দুয়ঙর্। 16 তর্ এই চাগরানীবোরে তুই এক্কো বাজে মিলে মনে ন-গুরিচ্। অমহদ ভান্ন্যেই চিদে-চজ্জালোই আর মনত্ দুঘে মুই এদক্ষণ সং তবনা গরঙর্।” 17 সেক্কে এলি কলঅ, “তর্ মনান্ শান্ত ওক্। ইস্রায়েলীয়গুনোর গোজেন ইদু তুই যিয়েনি চেয়োচ্ সিয়েনি যেনে তে তরে দে।” 18 হান্না কলদে, “এই চাগরানীবো উগুরে তর্ মেইয়্যে থোক্।” ইয়েন কোইনে তে গেলঅ আর হানা-দানা গুরিলোগোই। তার মুয়োন আর সুদোমু দেগা ন-গেলঅ। 19 তার কেল্যে বেন্যেপোত্যে তারা ঘুমোত্তুন্ উদিনে উবোসনা-ঘরত্ যেইনে লগেপ্রভুরে তবনা গুরিলাক্। সে পরেন্দি তারা রামাত্ তারার নিজো ঘরত্ ফিরি গেলাক্। পরেন্দি ইল্কানা তা মোক্কো হান্না সমারে মিজেল আর লগেপ্রভুয়ো হান্নার ইন্দি মনযোগ দিলো। 20 সেক্কে হান্না পিদিলী অলঅ আর অক্তবো অলে তার এক্কো পূঅ অলঅ। “মুই লগেপ্রভুর ইত্তুন্ তারে চেই নেযেয়োং,” ইয়েন কোইনে হান্না পূঅবোর নাঙান্ রাগেল শমূয়েল। শমূয়েলরে গোজেনর নাঙে দান গরানা 21 পরেন্দি ইল্কানা পত্তি বজর ধোক্ক্যেন তা গিরির্ বেক্কুনোরে নেযেইনে লগেপ্রভুর নাঙে য়েমান-উৎসর্ব আর মান্যা ছিড়েবাত্তে গেলঅ। 22 মাত্তর্ হান্না ন-গেলঅ। তে তা নেক্কোরে কলঅ, “পূঅবোরে বুগোর দুধ ছাড়ানার পরেন্দি মুই তারে নেযেইনে লগেপ্রভুর মুজুঙোত্ আঝিল্ ওম্ যেনে তে সারা ঝিংকানিবর্ সিয়োদোই থেই পারে।” 23 তার নেক্কো ইল্কানা তারে কলদে, “তুই যিয়েন গম্ বিলি মনে গরচ্ সিয়েনই গর্। পূঅবোরে দুধ ন-এরানা সং তুই ইদু থাক্। লগেপ্রভু যেনে তার মান্যাগান পূরোণ গরে।” সেনত্যেই হান্না ঘরত্ রলঅ আর পূঅবোরে দুধ ন-ছাড়ানা সং দেগাশুনো গরা ধুরিলো। 24 পূঅবোরে দুধ এরানার পরেন্দি হান্না তিন্নো দামাড়া গোরু, আদার কেজি মোইদে, চামর্ থৈইলেত্ গুরিনে এক থৈল্যে আংগুর-রস আর পূঅবোরে লগে নেযেইনে শীলোদত্ লগেপ্রভুর ঘরত্ গেলঅ। পূঅবো সেক্কেয়ো চিগোন এলঅ। 25 তারা সিদু এক্কো দামাড়া গোরু কাবিনে উৎসর্গ গুরিলাক্ আর পূঅবোরে এলির ইদু নেযেলাক্। 26 হান্না কলদে, “ও মর্ প্রভু, তরে সাক্ষী রাগেইনে মুই শমক্ খেইনে কঙর্, মুয়ই সেই মিলেবো, যে ইদু তর্ মুজুঙোত্ ঠিয়্যেইনে লগেপ্রভুর ইদু তবনা গোজ্যে। 27 মুই এই পূঅবোরে চেইনেই তবনা গোজ্যং, আর লগেপ্রভুর ইদু যিয়েন চেইয়োং সিয়েন তে মরে দিয়্যে। 28 সেনত্যেই পূঅবোরে মুইয়ো লগেপ্রভুরে দিলুং। তে যেদকদিন বাঁজি থেবঅ সেদকদিন সং লগেপ্রভুরই থেবঅ।” পরেন্দি তারা সিদু মাদা নিগিরিনে লগেপ্রভুর নাঙে তারার ভোক্তি জানেলাক্। |
Copyright © 2021 Bangladesh Bible Society
Bangladesh Bible Society